ডিজিটেল সংবাদ, টেঙাখাত : বৃহত্তৰ টেঙাখাত অঞ্চলৰ ৰাইজৰ সহযোগত ৩৫ সংখ্যক নিজ টেঙাখাত ব'হাগী বিদায় সন্মিলন দেওবাৰৰে পৰা তিনিদিনীয়া বিভিন্ন কাৰ্যসূচীৰে টেঙাখাতৰ সুধাকণ্ঠ ড° ভূপেন হাজৰিকা ৰঙ্গমঞ্চত আৰম্ভ হয়। পুৱা উদযাপন সমিতিৰ সভাপতি ললিত চমুৱাই বিহু পতাকা উত্তোলন কৰাৰ পিছতে স্মৃতি তৰ্পন আৰু বন্তি প্ৰজ্বলন কাৰ্যসূচী ৰাপায়ন কৰে উদযাপন সমিতিৰ মুখ্য সম্পাদক অজয় গগৈয়ে ।
ইয়াৰ পিছত সমীপত অৱস্থিত সুধাকণ্ঠ ড° ভূপেন হাজৰিকা স্থায়ী প্ৰতিমূৰ্তিত বন্তি প্ৰজ্বলন কাৰ্যসূচী সমাপন কৰে অসম গেছ কোম্পানীৰ উপাধ্যক্ষ ইন্দ্ৰ গগৈয়ে । উদযাপন সমিতিৰ সাংস্কৃতিক সম্পাদক দীপক গগৈয়ে আঁত ধৰা উল্লেখিত কাৰ্যসূচীত উদযাপন সমিতিৰ মুখ্য বিষয়ববীয়া একাংশ প্ৰাক্তন বিষয়ববীয়া তথা শুভাকাংক্ষীক ফুলাম গামোচাৰে বিহুৰ ওলগ জনোৱা হয় । উল্লেখ্য যে, তিনিদিনীয়া কাৰ্যসূচী অনুসৰি আজি ঢোলবাদন পেঁপা বাদন প্ৰতিযোগিতা, মইনা দলৰ গছতলৰ বিহু, মইনা দলৰ হুঁচৰি প্ৰতিযোগিতা বিহুনাচ প্ৰতিযোগিতাৰ অন্তত বহু নবীন প্ৰবিন শিল্গীৰ দ্বাৰা সাংস্কৃতিক অনুষ্ঠান অনুষ্ঠিত হ'ব ।
উল্লেখ্য যে, ১৫ মে'ত যুৱতী দলৰ জেং-বিহু প্ৰতিযোগিতা, বোৱাৰী বিহু প্ৰতিযোগিতা, যুৱক দলৰ হুঁচৰি প্ৰতিযোগিতা আৰু নিশা বিহুৱতী প্ৰতিযোগিতা অনুষ্ঠিত হ'ব । অন্যহাতে অন্তিম দিনা অৰ্থাৎ ১৬ মে'ত বাঁহী বাদন প্ৰতিযোগিতা, বিহুনাম প্ৰতিযোগিতা, আধুনিক নৃত্য প্ৰতিযোগিতা আদিৰ অন্তত বঁটা বিতৰণী অনুষ্ঠান অনুষ্ঠিত হ'ব।
স্মৰ্তব্য যে, শেষৰ দিনা অনুষ্ঠিত হ'ব লগা সাংস্কৃতিক সন্ধ্যাৰ অনুষ্ঠানত আমন্ত্ৰিত জনপ্ৰিয় শিল্পী দীপাম্বিতা ডেকাই গীতৰ শৰাই আগবঢ়াব । উদযাপন সমিতিয়ে সকলো কাৰ্যসূচীত ৰাইজৰ উপস্থিতি কামনা কৰাৰ লগতে প্ৰতিযোগী সকলক ৯১০১২৪৩৩১০, ৯৯৫৪৫৪৬২৯৯ আৰু ৯৯৫৭২৬২৮১১ নম্বৰত যোগাযোগত কৰিবলৈ আহ্বান জনাইছে ।
