ধূপধৰাত আৰক্ষীৰ সহযোগত বনবিভাগৰ অভিযান...

ডিজিটেল সংবাদ, ধূপধৰাঃ গোৱালপাৰা জিলাত অব্যাহত আছে চোৰাং কাঠৰ ৰমৰমীয়া ব্যৱসায় । জিলাখনৰ বিভিন্ন বনাঞ্চলত চোৰাং ব্যৱসায়ীয়ে নিতৌ বনধ্বংস চলাই আহিছে আৰু চোৰাং কাঠৰ ৰমৰমীয়া ব্যৱসায় চলাই গৈছে ৷

ইয়াৰ মাজতে জিলাখনৰ ৰংজুলি বনাঞ্চলিক কাৰ্যালয়ৰ অন্তৰ্গত ধূপধৰাৰ সমীপৰ পদুপাৰা চেলাবড়ী গাঁৱত নিশা বনবিভাগৰ এটা দলে ধূপধৰা আৰক্ষীৰ সহযোগত অভিযান চলাই বৃহৎ পৰিমাণৰ চোৰাং শালগছৰ টুকুৰা জব্দ কৰিবলৈ সক্ষম হয় ৷

অভিযানকাৰী দলটোৱে চেলাবড়ী গাঁওখনেৰে পাৰ হৈ যোৱা দেওশীলা নদীৰ পৰা চোৰাং গছৰ কুণ্ডাসমূহ উদ্ধাৰ কৰে ৷ জানিব পৰামতে ৰংজুলি আৰু ধূপধৰাৰ বনকৰ্মীৰ এটা দলে আৰক্ষীৰ সহযোগত ধূপধৰাৰ সমীপৰ পদুপাৰা চেলাবড়ী গাঁওত চোৰাং কাঠ মজুত কৰি ৰখাৰ বিৰুদ্ধে নিশা এক যৌথ অভিযান চলায় ৷

এই অভিযানত চেলাবড়ী গাঁৱৰ দেওশিলা নৈৰে সৰবৰাহ কৰাৰ উদ্দেশ্যৰে গছৰ কুণ্ডাসমূহ নাঁৱত ভৰ্তি কৰাৰ সময়তে জব্দ কৰা হয় ৷ অৱশ্যে আন্ধাৰৰ সুযোগ লৈ চোৰাং ব্যৱসায়ত জৰিত লোকসকল পলায়ন কৰে ৷

উল্লেখযোগ্য যে এই গছৰ কুণ্ডাসমূহ নৈ পানীৰ বালিৰ তলত লুকুৱাই ৰাখিছিল চোৰাং ব্যৱসায়ীসকলে ৷ অভিযানত শালকে ধৰি মুঠ এঘাৰ টা মূল্যবান গছৰ কুণ্ডা উদ্ধাৰ কৰা হয় ৷ ইফালে এই অভিযানতে আৰক্ষীয়ে পানীৰ পৰা পাঁচটাকৈ বালি উঠোৱা মেচিন জব্দ কৰি বনবিভাগক চমজাই দিয়ে ৷