/asomiyapratidin/media/media_files/2025/01/21/8G3ePA5MfKgtSbbR0wv6.jpg)
ডিজিটেল সংবাদ ধুবুৰীঃ ধুবুৰীৰ ডিএফঅ' হিৰণ্য পাঠক চি এম ভিজিলেন্সৰ ৰোষত পৰাৰ পিচতেই ধৰ্ষণৰ গোচৰত গৌৰীপুৰৰ বিট অফিচৰ এজন বনকৰ্মী ৰঙা ঘৰৰ আলহী হোৱা ঘটনাই ধুবুৰীত চাঞ্চল্যৰ সৃষ্টি কৰিছে। এগৰাকী বিবাহিত মহিলাৰ গোচৰৰ ভিত্তিত গোলকগঞ্জ আৰক্ষীয়ে গ্ৰেপ্তাৰ কৰে বনকৰ্মী খন্দকাৰ ৰেজ্জাক আহমেদক।
অভিযোগ মতে বনকৰ্মী খন্দকাৰ ৰেজ্জাক আহমেদে মহিলাগৰাকীক নিশা আন্ধাৰৰ সুযোগত মুখত সোপা দি বলপূৰ্বক শাৰিৰীক সম্পর্ক স্থাপন কৰিছিল। জানিব পৰামতে খন্দকাৰ ৰেজ্জাকে বিবাহিতা মহিলাগৰাকীক বহু দিনৰ পৰাই অপকর্ম কৰাৰ চেষ্টা চলাই আছিল।
অৱশেষত সুযোগ বুজি দুবাৰকৈ বিবাহ পাশত আবদ্ধ হোৱা বনকৰ্মী খন্দকাৰ ৰেজ্জাক আহমেদে যোৱা নিশা আন্ধাৰৰ সুযোগ গ্ৰহণ কৰি মহিলাগৰাকীৰ লগত অপকৰ্ম কৰিছিল বুলি এজাহাৰত উল্লেখ থাকে। পিচত মহিলাগৰাকীয়ে গোলকগঞ্জ থানাত বনকৰ্মী খন্দকাৰ ৰেজ্জাক আহমেদৰ বিৰুদ্ধে এজাহাৰ দাখিল কৰে।
গোলকগঞ্জ আৰক্ষীয়ে ১৫/২০২৫ নম্বৰত ভাৰতীয় ন্যায় সংহিতাৰ ৬৪ ধাৰাত গোচৰ পঞ্জীয়ন কৰি বনকৰ্মী খন্দকাৰ ৰেজ্জাক আহমেদক গ্ৰেপ্তাৰ কৰি আজি জে'ল হাজোতলৈ প্ৰেৰণ কৰে।