ধেমাজি বঙ্গালমাৰীত বাৰ্ষিক ভাওনা সোণালী জয়ন্তী মহোৎসৱৰ লাইখুঁটা স্থাপন

ডিজিটেল সংবাদ, ধেমাজিঃ ধেমাজিৰ ঐতিহাসিক বঙ্গালমাৰী গাঁৱৰ বাৰ্ষিক ভাওঁনা সোণালী জয়ন্তী মহোৎসৱ অহা ২৫ আৰু ২৬ ডিচেম্বৰত দুদিনীয়াকৈ বৰ্ণিল কাৰ্যসূচীৰে অনুষ্ঠিত কৰিবলৈ বঙ্গালমাৰি বাসী ৰাইজে আয়োজন কৰিছে ৷ সেয়ে শুকুৰবাৰে পুৱা ১১ বজাত গায়ন- বায়ন আৰু আয়তীৰ মংগল উৰুলিৰ মাজৰে আনুষ্ঠানিকভাৱে বঙ্গালমাৰি নামঘৰৰ প্ৰাংগনত মহোৎসৱৰ লাইখুটা স্থাপন অনুষ্ঠান ৰাইজে সম্পন্ন কৰে৷

গুৰুজনাৰ অমৰ সৃষ্টি ৰাজিৰ জীয়াই ৰখাৰ বাবে গাওঁবাসীয়ে অপ্ৰাণ চেষ্টা চলাইছে আৰু ৰাইজৰ সহায় সহযোগিতা আৰু উপস্থিতি কামনা কৰিছে আয়োজক সমিতিয়ে ৷ বাৰ্ষিক ভাওনাৰ সোনালী জয়ন্তী উদযাপন সমিতিৰ দীপ কুমাৰ দিহিঙীয়া আৰু সাধাৰণ সম্পাদক ইন্দ্ৰশ্বৰ বৰগোহাঁইয়ে জানিবলৈ দিয়া মতে, সোনালী জয়ন্তী অনুষ্ঠানৰ প্ৰথম দিনা এখনি স্মৃতি গ্ৰন্থ উন্মোচন কৰা হ'ব।

শেষৰদিনা মুকলি অনুষ্ঠানত অতিথি হিচাপে উপস্থিত থাকিব অসমৰ সত্ৰীয়া সংস্কৃতিৰ ধজ্জা বাহক তথা আউনীটী সত্ৰৰ সত্ৰাধিকাৰ পীতাম্বৰ দেৱগোস্বামী, অসমৰ ভাওনা সন্মিলনৰ সাধাৰণ সম্পাদক ড° মানিক শইকীয়া, লোক সংস্কৃতিৰ গৱেষক ড° অনিল শইকীয়া আৰু প্ৰতিদিন টাইমৰ মুখ্য সম্পাদক নিতুমনি শইকীয়াকে ধৰি অসমৰ বহুকেইগৰাকী বিশিষ্ট ব্যক্তি৷

Also Read: পাকিস্তানৰ বায়ু সেনা ঘাটিত আক্ৰমণ কৰিবলৈ গৈ ৩ সন্ত্ৰাসবাদী নিহত...