প্ৰবীণ গান্ধীবাদী নেতা,মুক্তিযুঁজাৰু টংক বৰাৰ জন্মদিন উদযাপন

ডিজিটেল সংবাদ,ধেমাজি : ধেমাজি জিলাৰ জামুগুৰি কোচ গাঁৱৰ প্ৰবীণ গান্ধীবাদী নেতা,সমাজকৰ্মী তথা মুক্তিযোদ্ধা টংক বৰাৰ ১০৩ সংখ্যক জন্মদিন পালন কৰা হয়। দেওবাৰে তেওঁৰ বাসগৃহত কেক কাটি অতি উলাহ-মালহেৰে উদযাপন কৰা হয় ৷

এই উপলক্ষে পুৱা ১১ বজাত বন্তি প্ৰজ্বলন কৰি আশীৰ্বাদ দিয়ে ধেমাজি বেলগুৰি শাখা সত্ৰৰ সত্ৰাধিকাৰ মুনীন্দ্ৰ নাৰায়ণ মহন্তই ৷ ইয়াৰ পিছতে কেক কটাৰ লগে লগে আয়তীৰ মংগল উৰুলিৰে মুক্তিযোদ্ধাগৰাকীৰ বাসগৃহ মুখৰ হৈ পৰে ৷ কেক কটাত সহযোগ কৰে ধেমাজি জিলা অতিৰিক্ত আয়ুক্ত ঋতুপল্লৱ বৰুৱাই ৷

অতিৰিক্ত জিলা আয়ুক্তগৰাকীয়ে মুক্তিযোদ্ধা টংক বৰাৰ জীৱন,কৰ্মৰাজি আৰু ত্যাগৰ বিষয়ে চমু ভাষণ আগবঢ়াই জন্মদিনৰ শুভেচ্ছা জ্ঞাপন কৰে ৷ প্ৰবীণ গান্ধীবাদী নেতাগৰাকীৰ ১০৩ বছৰীয়া জন্মদিনৰ ওলগ জনাই ধেমাজি প্ৰেছ ক্লাৱৰ হৈ সভাপতি অশ্বিনী কুমাৰ দুৱৰাই ৷

টংক বৰাৰ নাতি নাৰায়ণ বৰাই আতঁ ধৰা জন্মদিনৰ মাংগলিক অনুষ্ঠানত স্থানীয় ৰাইজ আৰু ধেমাজিৰ অগনন শুভাকাংক্ষী ৰাইজে গামোচা,চেলেং চাদৰৰে শুভেচ্ছা জনায় ৷ ইপিনে সংবাদ মাধ্যমৰ আগত মুক্তিযোদ্ধা বৰাই অতীতৰ তিতা মিঠা কথাবোৰ ৰোমন্থন কৰি অসমলৈ অহা মহাত্মা গান্ধীক ৩বাৰ লগ কৰাৰ কথা উল্লেখ কৰে ৷

ইয়াৰোপৰি তেওঁ সেই সময়ত স্বাধীনতা আন্দোলনত অংশগ্ৰহণ কৰাৰ বাবে বৃটিছ চৰকাৰে তেওঁক যোৰহাট জেলত ৬মাহ কাৰাবাস দিয়াৰ কথাও জানিবলৈ দিয়ে ৷ ইপিনে ৰাজ্যখনৰ বৃদ্ধ-বৃদ্ধাসকলৰ বাবে চৰকাৰে দিয়া মাত্ৰ ২৫০ টকা বৃদ্ধপেঞ্চনৰ টকা অতি কম হৈছে বুলি অৱগত কৰে।

এই বৃদ্ধ পেঞ্চনৰ ধন বৃদ্ধিৰ বাবে ২০১৪ চনতেই ৰাষ্ট্ৰপতি ভৱনত ৰাষ্ট্ৰপতি প্ৰতিভা পাটিলে মুক্তিযোদ্ধাগৰাকীক সন্মান জনোৱাৰ সময়ত বৃদ্ধপেঞ্চনৰ ধন বৃদ্ধি কৰিবলৈও তেওঁ লিখিতভাৱে আবেদন জনাইছিল বুলি উল্লেখ কৰে ৷ লগতে তেওঁ পৰৱৰ্তী সময়তো বৃদ্ধপেঞ্চন বৃদ্ধিৰ বাবে প্ৰধানমন্ত্ৰী নৰেন্দ্ৰ মোডীলৈ পত্ৰ লিখি অনুৰোধ কৰাৰ কথা তেওঁ ব্যক্ত কৰে ৷

Also Read: অনন্ত কলিতাৰ বিয়োগত বিভিন্ন দল-সংগঠনৰ শোক প্ৰকাশ