ডিজিটেল সংবাদ ,ধেমাজিঃ ধেমাজি অভিযান্ত্ৰিক মহাবিদ্যালয়ত এগৰাকী মহিলা প্ৰবক্তাক মহাবিদ্যালয়খনৰ অধ্যক্ষই মানসিকভাৱে হাৰাশাস্তি কৰাৰ অভিযোগ উত্থাপন হৈছে। এই লৈ মহাবিদ্যালয়খনৰ ছাত্ৰ-ছাত্ৰীসকলে বৃহস্পতিবাৰে অধ্যক্ষৰ বিৰুদ্ধে ব্যৱস্থা গ্ৰহনৰ দাবীত এক প্ৰতিবাদী কাৰ্যসূচী গ্ৰহণ কৰে।
উল্লেখ্য যে মহিলা প্ৰবক্তা গৰাকীক অধ্যক্ষ ড° দিলীপ বৰাই কৰা মানসিক হাৰাশাস্তিৰ ন্যায়ৰ লগতে অধ্যক্ষৰ স্বৈৰাচাৰী শাসনৰ অৱসান বিচাৰি মহাবিদ্যালয় খনৰ প্ৰায় ৩ শতাধিক ছাত্ৰ-ছাত্ৰীয়ে বৃহস্পতিবাৰে বিয়লি মহাবিদ্যালয়ৰ চৌহদত অধ্যক্ষৰ বিৰুদ্ধে বিক্ষোভ প্ৰদৰ্শন কৰে ৷ প্ৰতিবাদী ছাত্ৰ- ছাত্ৰী সকলে অধ্যক্ষ মুৰ্দাবাদ , আমাক ন্যায় লাগে , প্ৰিন্সিপালক নিলম্বিত কৰক , আমাক ন্যায় লাগিবই ইত্যাদি শ্ল’গানেৰে মহাবিদ্যালয়ৰ চৌহদ উত্তাল কৰি তোলে ৷
ইপিনে ছাত্ৰ-ছাত্ৰী সকলৰ প্ৰতিবাদৰ খবৰৰ পিছতেই ধেমাজি জিলা আয়ুক্ত অংকুৰ ভৰালীৰ নিৰ্দেশ মৰ্মে দণ্ডাধীশ আৰু আৰক্ষীয়ে গৈ প্ৰতিবাদী ছাত্ৰ-ছাত্ৰী সকলক ব্যৱস্থা গ্ৰহনৰ আশ্বাস দিয়ে। তাৰ পিছতে প্ৰতিবাদৰ কাৰ্য্যসূচী প্ৰত্যাহাৰ কৰে ছাত্ৰ-ছাত্ৰীসকলে।
