TET ৰ নতুন সময়সূচী ঘোষণাঃ ৩ জানুৱাৰীৰ পৰা উপলব্ধ হ'ব এডমিট কাৰ্ড

ডিজিটেল ডেস্কঃ অসম মাধ্যমিক শিক্ষা সঞ্চালকে স্নাতক আৰু স্নাতকোত্তৰ TET ৰ নতুন সময় সূচী ঘোষণা কৰিছে। সেই অনুসৰি অহা ১৯ জানুৱাৰীত অনুষ্ঠিত হ'ব TET ৰ লিখিত পৰীক্ষা।

পূৰ্বে ২৯ ডিচেম্বৰত এই পৰীক্ষা অনুষ্ঠিত হোৱাৰ কথা আছিল। পৰীক্ষালৈ মাজত মাত্ৰ কেইটামান দিন বাকী থকাৰ অৱস্থাতে হঠাৎ পৰীক্ষাৰ পাঠ্যক্ৰম সলনি কৰা হৈছিল।

যোৱা ৫ ডিচেম্বৰত নতুনকৈ প্ৰকাশ পোৱা পৰীক্ষাৰ পাঠ্যক্ৰমত ৫০ নম্বৰৰ গণিত বিষয় অন্তৰ্ভুক্ত কৰা হৈছিল। এনে পৰিস্থিতিত একাংশ পৰীক্ষাৰ্থী গুৱাহাটী উচ্চ ন্যায়ালয়ৰ কাষ চাপিছিল।

ন্যায়ালয়েও বিষয়টোৰ গুৰুত্ব উপলব্ধি কৰি শুকুৰবাৰে ২৯ ডিচেম্বৰৰ পৰিবৰ্তে তাৰ পাছত অতি কমেও অতিৰিক্ত ১৫ দিনৰ পাছতহে পৰীক্ষা অনুষ্ঠিত কৰাৰ নিৰ্দেশ প্ৰদান কৰে। সেই নিৰ্দেশনা অনুসৰিয়েই আজি মাধ্যমিক শিক্ষা বিভাগৰ সঞ্চালক মমতা হোজায়ে স্বাক্ষৰ কৰা এক নিৰ্দেশনাৰ জৰিয়তে পৰীক্ষাৰ নতুন সময়ৰ কথা ঘোষণা কৰিছে।

নিৰ্দেশনাত উল্লেখ থকা মতে ৩ জানুৱাৰীৰ পৰা পৰীক্ষাৰ্থীসকলে প্ৰৱেশপত্ৰসমূহ নিৰ্দিষ্ট ৱেবচাইটক মাধ্যমেৰে ডাউনলোড কৰিব পাৰিব।