মণিপুৰক অস্থিৰ কৰাৰ ষড়যন্ত্ৰ কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰা হ'ব : অমিত শ্বাহ
ডিজিটেল সংবাদ,বেকাজান : মণিপুৰক দ্বিখণ্ডিত কৰিবলৈ দিয়া নহ'ব। অস্থিৰ কৰাৰ ষড়যন্ত্ৰ কৰা সকলৰ বিৰুদ্ধে অচিৰেই কঠোৰ ব্যৱস্থা গ্ৰহণ কৰা হ'ব – এই গুৰুত্বপূৰ্ণ মন্তব্য কৰিছে কেন্দ্ৰীয় গৃহমন্ত্ৰী অমিত শ্বাহে।
মণিপুৰৰ ইম্ফলত নিৰ্বাচনী প্ৰচাৰ চলাবলৈ আহি গৃহমন্ত্ৰীগৰাকীয়ে কয় যে মণিপুৰত আগন্তুক দিনত শান্তি দেখা পোৱা যাব। মণিপুৰৰ জনতা এই শান্তিৰ সাক্ষী হ’ব।
নিৰ্বাচনী সভাত ভাষণ দি তেওঁ কয় যে প্ৰধানমন্ত্ৰী নৰেন্দ্ৰ মোডী নেতৃত্বাধীন চৰকাৰৰ অগ্ৰাধিকাৰ হৈছে শান্তি প্ৰতিষ্ঠা আৰু মণিপুৰৰ সকলো সম্প্ৰদায়ৰ মাজত ঐক্য নিশ্চিত কৰা। ইম্ফলৰ হাপ্তা কাংজেইবুং, পেলেচ চৌহদত নিৰ্বাচনী সভাত ভাষণ দি শ্বাহে কয় যে আগন্তুক নিৰ্বাচন মণিপুৰক একত্ৰিত কৰিবলৈ, আৰু ৰাজ্য বিভাজনৰ বিৰুদ্ধে প্ৰতিহত কৰিবলৈ।
সমাৱেশত কেন্দ্ৰীয় গৃহমন্ত্ৰীগৰাকীয়ে লগতে কয়- আমি কোনো মূল্যৰ বিনিময়ত মণিপুৰক বিভাজন কৰিবলৈ অনুমতি নিদিওঁ। যোৱা বছৰৰ ৩ মে’ত মণিপুৰত জনগোষ্ঠীয় সংঘৰ্ষ আৰম্ভ হোৱাৰ পাছৰে পৰা কুকি-জোমি জনগোষ্ঠীৰ অন্তৰ্গত ১০ জন জনজাতীয় বিধায়কৰ লগতে খিলঞ্জীয়া জনজাতি নেতা মঞ্চ আৰু কুকি ইনপি মণিপুৰ (KIM)কে ধৰি কেইবাটাও আগশাৰীৰ জনজাতীয় সংগঠনে পৃথক প্ৰশাসন বা পৃথক ৰাজ্যৰ বাবে দাবী জনাই আহিছে।
উত্তৰ-পূবৰ ৰাজ্যখনৰ জনগাঁথনি সলনি কৰিবলৈ অনুপ্ৰৱেশৰ চেষ্টা চলোৱা হৈছে বুলি দাবী কৰে গৃহমন্ত্ৰী শ্বাহে। এই সন্দৰ্ভত তেঁও কয় যে আগন্তুক সংসদীয় নিৰ্বাচন মণিপুৰক বিভাজিত কৰিবলৈ চেষ্টা কৰা শক্তি আৰু ৰাজ্যখনক একত্ৰিত কৰি ৰাখিবলৈ চেষ্টা কৰা শক্তিৰ মাজত যুঁজ।
প্ৰধানমন্ত্ৰী নৰেন্দ্ৰ মোডীয়ে সদায় কৈ আহিছে যে উত্তৰ-পূব আৰু মণিপুৰৰ ভাগ্য যেতিয়া ৰূপান্তৰিত হ’ব তেতিয়া দেশৰ ভাগ্য সলনি হ’ব। মোডীয়ে কেৱল অঞ্চল আৰু দেশৰ উন্নয়নেই নহয়, মণিপুৰ আৰু ভাৰতকো সুৰক্ষা দিছে বুলি অমিত শ্বাহে ভাষণ প্ৰসংগত উল্লেখ কৰে।
বিজেপি আৰু ইয়াৰ মিত্ৰ দলৰ লোকসভাৰ আসন দুখনত আপোনালোকৰ ভোটে সমগ্ৰ বিশ্বক স্পষ্ট কৰি দিব যে ৰাজ্যৰ জনসাধাৰণ কাৰ ওপৰত আছে। মণিপুৰৰ উন্নয়নৰ বাবে কেন্দ্ৰ আৰু ৰাজ্য উভয়তে কংগ্ৰেছ নেতৃত্বাধীন চৰকাৰৰ সময়ত কোনো গুৰুত্বসহকাৰে কাম কৰা হোৱা নাছিল বুলি গৃহমন্ত্ৰীগৰাকীয়ে অভিযোগ কৰে।
গৃহমন্ত্ৰীগৰাকীয়ে কয় যে প্ৰধানমন্ত্ৰী মোডী নেতৃত্বাধীন চৰকাৰে ৰাজ্যখনৰ সামগ্ৰিক উন্নয়নৰ বাবে হাজাৰ হাজাৰ কোটি টকা আগবঢ়াই আহিছে। ইম্ফল-মৰেহ ৰে’ল লাইনৰ বাবে ১৩০০ কোটি, ৰাষ্ট্ৰীয় ঘাইপথ উন্নয়নৰ বাবে ২০০০ কোটি আৰু ইম্ফল সংযোগৰ বাবে নিৰ্মাণাধীন ৰে’ল লাইনৰ বাবে ১০ হাজাৰ কোটি টকা অনুমোদন কৰা হৈছে। পূৰ্বৰ কংগ্ৰেছ চৰকাৰে মণিপুৰৰ স্বাৰ্থৰ বাবে ব্ৰিটিছৰ বিৰুদ্ধে যুঁজ দিয়া পূৰ্বৰ ৰজাসকলৰ সন্মান আৰু স্মৃতি ৰক্ষাৰ বাবে একোৱেই কৰা নাছিল।
কংগ্ৰেছৰ দিনত মণিপুৰে ৩৯ হাজাৰ কোটি টকা পোৱাৰ বিপৰীতে প্ৰধানমন্ত্ৰী মোডী নেতৃত্বাধীন চৰকাৰে চাৰিগুণ বৃদ্ধি কৰি অসংখ্য প্ৰকল্প আৰু আঁচনি ৰূপায়ণৰ বাবে ১.২০ লাখ কোটি টকা অনুমোদন জনাইছে। মণিপুৰৰ খিলঞ্জীয়া লোকসকলক সুৰক্ষা প্ৰদানৰ বাবে কেন্দ্ৰই ইনাৰ লাইন পাৰ্মিট (আই এল পি) ব্যৱস্থাও জাৰি কৰিছে বুলি শ্বাহে কয়।
এইখিনিতে উল্লেখ কৰা প্ৰয়োজন যে মণিপুৰৰ মুখ্যমন্ত্ৰী এন বীৰেণ সিং, ৰাজ্যিক বিজেপিৰ সভাপতি অধিকাৰীমায়ুম শাৰদা দেৱী, শিক্ষামন্ত্ৰী তথা আভ্যন্তৰীণ মণিপুৰ আসনৰ বিজেপিৰ প্ৰাৰ্থী থৌনাওজাম বসন্ত কুমাৰ সিঙ আদিয়েও এই সমাৱেশত ৰাইজক সম্বোধন কৰে। উল্লেখযোগ্য যে ৩ মে’ত মণিপুৰত হিংসাত্মক পৰিস্থিতিৰ সৃষ্টি হোৱাৰ পিছত মণিপুৰৰ দুখন লোকসভা আসনৰ নিৰ্বাচন দুটা পৰ্যায়ত অনুষ্ঠিত হ’ব।
ইনাৰ মণিপুৰৰ লোকসভা সমষ্টিৰ আসনত ৬ গৰাকী প্ৰাৰ্থীয়ে প্ৰতিদ্বন্দ্বিতা কৰাৰ বিপৰীতে জনজাতিসকলৰ বাবে সংৰক্ষিত বাহ্যিক মণিপুৰ আসনত চাৰিগৰাকী প্ৰাৰ্থীয়ে প্ৰতিদ্বন্দ্বিতা কৰিছে। বাহ্যিক মণিপুৰ সমষ্টিৰ কিছু অংশৰ লগতে ১৯ এপ্ৰিলত প্ৰথম পৰ্যায়ত নিৰ্বাচনলৈ যাব অন্তৰ্নিহিত মণিপুৰৰ আসনখন।
বাহ্যিক মণিপুৰৰ বাকী অংশত ২৬ এপ্ৰিলত দ্বিতীয় পৰ্যায়ত ভোটদান কৰা হ’ব। বিজেপিয়ে ইনাৰ মণিপুৰত থৌনাওজাম বসন্ত কুমাৰ সিঙক প্ৰক্ষেপ কৰি জনজাতিৰ বাবে সংৰক্ষিত আউটাৰ মণিপুৰ আসনত এন পি এফৰ প্ৰাৰ্থী কে টিমথি জিমিকক সমৰ্থন আগবঢ়াইছে বিৰোধী কংগ্ৰেছ নেতৃত্বাধীন INDIA ব্লকে।
আনহাতে ইনাৰ মণিপুৰৰ আসনৰ বাবে অংগমচা বিমোল আকোইজামক প্ৰাৰ্থিত্ব দিয়াৰ বিপৰীতে আলফ্ৰেড কাংগাম এছ আৰ্থাৰক আউটাৰ মণিপুৰ (এছ টি)ত প্ৰক্ষেপ কৰা হৈছে।