জেৰাৰ নামত কি চলিছে? মনিষ চিছোদিয়াই ক'লে আদালতক...
ডিজিটেল ডেস্কঃ দিল্লীৰ আবকাৰী নীতিয়ে মনিষ চিছোদিয়াৰ বিপদ বঢ়াইছে। পুনৰ ১৪ দিনৰ বাবে তেওঁক প্ৰেৰণ কৰা হৈছে চি বি আইৰ জিম্মালৈ। সুৰা কেলেংকাৰী গোচৰত ৩ এপ্ৰিললৈ চি বি আইৰ জিম্মাত থাকিব।
উল্লেখ্য যে একেটা গোচৰত তেওঁ ২২ মাৰ্চলৈ ই ডিৰ জিম্মাত আছে। দেশৰ শীৰ্ষ দুই তদন্তকাৰী সংস্থা চি বি আই আৰু ই ডি দুয়োটাই সুৰা নীতিৰ কেলেংকাৰীৰ গোচৰৰ তদন্ত চলাই আছে।
আজি ই ডিয়ে ভিডিঅ' কনফাৰেন্সৰ জৰিয়তে ৰাউজ এভিনিউ আদালতত উপস্থাপন কৰিছিল। বিশেষ ন্যায়াধীশ এম কে নাগপালে ই ডিৰ জিম্মাৰ দিন ৩ এপ্ৰিললৈ বৃদ্ধি কৰাৰ পাছত চিছোদিয়াৰ জামিন শুনানি ২১ মাৰ্চ মঙ্গলবাৰে অনুষ্ঠিত হ'ব।
ইডিয়ে আদালতত উল্লেখ কৰা অনুসৰি যেতিয়া সুৰা কেলংকাৰীৰ বিষয়টোৰ সন্দৰ্ভত অভিযোগ উত্থাপন হৈছিল সেই সময়ত মনিষ চিছোদিয়াই তেওঁৰ মোবাইল নম্বৰ সলনি কৰিছিল। অৱশ্যে ই ডিয়ে পুৰণি মোবাইল নম্বৰৰ সকলো ডাটা সংগ্ৰহ কৰিছে বুলিও অৱগত কৰিছে।
এতিয়া সংস্থাটোৱে তেওঁৰ ইমেইল আৰু মোবাইল ফোনৰ পৰা আহৰণ কৰা তথ্য বিশ্লেষণ কৰি আছে বুলি জনাইছে। সেয়েহে মনিষ চিছোদিয়াক তেওঁলোকৰ আৰু বহু প্ৰশ্ন সুধিবলৈ আছে বুলি জনাইছে।
ই ডিৰ পৰামৰ্শদাতা জোহাইব হুছেইনে কয়, চিছোদিয়াৰ সহকাৰী বিজয় নায়াৰে সমগ্ৰ ষড়যন্ত্ৰটত সমন্বয় ৰক্ষা কৰি আছিল। এই কেলেংকাৰীত চৰকাৰী সংস্থা, মধ্যস্থতাকাৰী আৰু আন বহু জড়িত আছে।
বিজয় নায়াৰ, মনিষ চিছোদিয়া, তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ কন্যা কে কবিতা আৰু আন কেইবাজনো লোকে এই ষড়যন্ত্ৰ ৰচনা কৰিছিল। এই ক্ষেত্ৰত, ২১৯ কোটি টকাৰ লেনদেন হৈছিল।
ইফালে আদালতত চিছোদিয়াৰ পৰামৰ্শদাতাই কয় যে, ইডিয়ে প্ৰাক্তন উপ-মুখ্যমন্ত্ৰীৰ বিৰুদ্ধে কোনো অপৰাধৰ কথা উল্লেখ কৰা নাই। কি অপৰাধ ঘটিছিল সেয়া ক'ব নালাগে। স্বীকাৰোক্তিৰ বাবে আটক কৰাৰ প্ৰয়োজন নাই।
তেওঁ প্ৰশ্ন উত্থাপন কৰি কয়, যিহেতু চি বি আইয়ে জেৰা কৰিছে গতিকে ইডিয়ে তেওঁক জেৰা কৰাৰ কি প্ৰয়োজন? তেওঁৰ মতে ই ডিয়ে এতিয়া চি বি আইৰ 'প্ৰক্সি' সংস্থা হিচাপে কাম কৰি আছে।
আনহাতে মনিষ চিছোদিয়াই আদালতক জনায়, ই ডিয়ে যোৱা সাত দিন ধৰি তেওঁক দৈনিক মাত্ৰ আধাৰ পৰা এক ঘণ্টা সোধা-পোছা কৰিছে। কেৱল বৃহস্পতিবাৰে, তেওঁক নিশালৈকে সোধা-পোছা কৰা হৈছিল।