অস্বাভাৱিকভাৱে শুকাইছে মহাবাহু ব্ৰহ্মপুত্ৰ...
ডিজিটেল সংবাদ,চাবুৱাঃ ভীষণ সংকটত অসমীয়া জাতীয় জীৱনৰ আয়ুস ৰেখা মহাবাহু ব্ৰহ্মপুত্ৰ । খৰালি আহিলেই বুঢ়া লুইত পৰ্যবসিত হয় মৰুভূমিলৈ ৷ ইটো বছৰৰ পিছত সিটো বছৰত উদ্বেগজনকভাৱে হ্ৰাস পাইছে ব্ৰহ্মপুত্ৰৰ জলস্তৰ ।
যাৰ ফলত ব্ৰহ্মপুত্ৰৰ পাৰত বসবাস কৰা লোক সকলে জীৱন জীৱিকাৰ বাবে এতিয়া চিন্তিত হৈ পৰা পৰিলক্ষিত হৈছে ৷ নৈ-পৰীয়া লোকসকলে ব্ৰহ্মপুত্ৰৰ পৰাই মৎস্য চিকাৰ কৰি হাজাৰ হাজাৰ পৰিয়াল চলি আছে ৷ আনহাতে কেৱল চাবুৱাতে নহয় ৰাজ্যৰ উজনিৰ পৰা নামনিলৈ শুকাইছে মহাবাহু ব্ৰহ্মপুত্ৰ । ব্ৰহ্মপুত্ৰৰ জলস্তৰ হ্ৰাস পোৱাৰ বাবে এতিয়া ১০/১৫ কিলোমিটাৰলৈ এতিয়া কেৱল বালি আৰু বালি।
উল্লেখ্য যে, দুবছৰৰ আগলৈকে খেতি পথাৰে ভৰপূৰ এখন গাঁও ,এতিয়া ব্ৰহ্মপুত্ৰৰ মাজত এটা দ্বীপলৈ যেন পৰ্যবসিত হ'ল ! এশতকৈ অধিক পৰিয়াল থকা অঞ্চলটোত খেতি পথাৰৰ লগতে আছিল চাহ বাগিচা । ভুক্তভোগী ৰাইজে জনোৱা অনুসৰি দুবছৰৰ আগতে উক্ত অঞ্চলটোলৈ ৰাইজে বাইক চলাই অহা যোৱা কৰিব পাৰিছিল । কিন্তু এতিয়া বালি - পলসৰ মাজেৰে খোজকাঢ়ি যাব লাগে।
ব্ৰহ্মপুত্ৰৰ খহনীয়াৰ ফলত অঞ্চলটোৰ প্ৰায় ১৫ - ২০ বিঘা মানহে মাটি বাছি আছে। গৃহহীন পৰিয়ালসমূহে আজিও আশ্ৰয়ৰ বাবে হাহাকাৰ কৰিবলগীয়া হৈছে ।
উক্ত কাৰকসমূহৰ প্ৰতি লক্ষ্য কৰিলে হয়তো অনাগত দিনত অসমৰ মানচিত্ৰৰ পৰা নিশ্চিহ্ন হৈ যাব ৰংমলা অঞ্চল। অঞ্চলটোত বাছি থকা কিছু অংশত গৃহহীন প্ৰায় ৮ জন কৃষকে খেতি কৰিছে যদিও কৃষি বিভাগে অঞ্চলটোৰ কৃষকসকলক সহায় নকৰাৰ অভিযোগ উত্থাপন কৰি ক্ষোভিত হৈ পৰিছে গৃহহীন কৃষকসকল ।
আৰু পঢ়কঃ নাই শীতৰ প্ৰকোপ, কুঁৱলীৰ বগা আস্বাদন ! বতৰ বিজ্ঞান কেন্দ্ৰৰ ভয়ংকৰ তথ্য...