জামুগুৰিহাটৰ বালিজুৰি কেন্দ্ৰীয় ৰঙালী বিহু উদযাপন সমাৰোহৰ সফল সামৰণি...

ডিজিটেল ডেস্কঃ জামুগুৰিহাটৰ সোণালী জয়ন্তীবৰ্ষ গড়কা বালিজুৰি কেন্দ্ৰীয় ৰঙালী বিহু উদযাপন সমাৰোহৰ শনিবাৰে নিশা সফল সামৰণি পৰে ৷ সমাৰোহৰ অন্তিম দিনা মূখ্য অতিথি হিচাপে অংশগ্ৰহণ কৰে চতিয়া সমষ্টিৰ বিধায়ক পদ্ম হাজৰিকাই ।

অনুষ্ঠানটিত উপস্থিত থাকি বিধায়কগৰাকীয়ে বিহুগীত গাই দৰ্শক ৰাইজৰ মন জয় কৰে ৷ বিধায়ক গৰাকীৰ বিহুগীতৰ তালে তালে নাচনী সকলে কঁকাল ভাঙি নচা পৰিলক্ষিত হয় ৷

বালিজুৰিৰ সংগীতসূৰ্য্য ড° ভূপেন হাজৰিকাৰ ৰংগমঞ্চত সন্ধিয়া বাৰেবৰণীয়া সাংস্কৃতিক অনুষ্ঠানৰ শুভ উদ্ধোধন কৰে গোৰ্খা লোক সংস্কৃতিৰ সাধক কলাশ্ৰী বিনোদ খনালে ৷

একেখন মঞ্চত অসমীয়া, গোৰ্খা, বড়ো, আদিবাসী আদি বিভিন্ন সম্প্ৰদায়ৰ লোক সকলে বিহু গীত নৃত্য, বাগুৰুমবা নৃত্য, মাৰুলী নৃত্য আৰু ঝুমুৰ নৃত্য আদি পৰিবেশন কৰি অঞ্চলটোক সমন্বয়ৰ তীৰ্থভূমিত পৰিণত কৰে ৷

জনপ্ৰিয় কন্ঠশিল্পী সুজিত তচাৰ গীতৰ শৰাইয়ে পুৱতি নিশালৈকে শ্ৰোতা দৰ্শকৰ মন মুগ্ধ কৰে ৷