দিন উকলিব যোগানকাৰী, ঠিকাদাৰৰঃ ৰাজ্যৰ কৃষকৰ বাবে বীজ উৎপাদন কৰিব কৃষি বিভাগে
ডিজিটেল সংবাদ, নগাঁওঃ দীৰ্ঘ দিনে ৰাজ্যৰ কৃষি বিভাগত সংঘটিত বীজ কেলেংকাৰী ওৰ পেলাবলৈ বিচাৰিছে এজন বিষয়াই ৷ যোগানকাৰী আৰু ঠিকাদাৰৰ জৰিয়তে ৰাজ্যত প্ৰতি বৰ্ষত সংঘটিত হয় কোটি কোটি টকাৰ বীজ কেলেংকাৰী ৷
মুষ্টিমেয় ঠিকাদাৰ আৰু যোগানকাৰীৰে মিলি একাংশ ৰাজনৈতিক ব্যক্তি আৰু বিষয়াই কৃষকক বীজ যোগান ধৰাৰ নামত কোটি কোটি টকাৰ কেলেংকাৰী সংঘটিত কৰি আহিছিল ৷ বীজ কেলেংকাৰী ওৰ পেলোৱাৰ লগতে প্ৰকৃতাৰ্থত কৃষকে সময় অনুসৰি বীজ লাভ কৰি কৃষি উৎপাদন কৰিব পাৰে তাৰ বাবে আঁচনি হাতত লোৱাৰ কথা ঘোষণা কৰিছে কৃষি বিভাগৰ অতিৰিক্ত মুখ্য সচিব ড° আশিস কুমাৰ ভুটানীয়ে ৷
নগাঁৱত কৃষি বিভাগৰ শীৰ্ষ আমোলাজনে কয় যে যোগানকাৰী বা ঠিকাদাৰৰ পৰা আগন্তক দিনত বীজ লোৱা নহব ৷ কৃষি বিভাগে নিজে বীজ উৎপাদন কৰি সময়ত কৃষকক বীজ যোগান ধৰিব ৷
ৰাজ্যত কৃষি বিভাগৰ পঞ্চাছ খন বীজ উৎপাদন কৰিব পৰা পাম আছে ৷ মৃতপ্ৰায় এই পাম সমূহক পুনৰ জীৱন দি বীজ উৎপাদনৰ পৰিকল্পনা কৰিছে ৰাজ্য চৰকাৰে ৷ আগন্তক ছয়মাহৰত আটাইকেইখন পাম সাজু কৰি বীজ উৎপাদন কৰিব কৃষি বিভাগটোয়ে ৷
শুকুৰবাৰে নগাঁও চহৰৰ শেনচোৱাত থকা বীজপাম খনি পৰিদৰ্শন কৰি অতিৰিক্ত মুখ্য সচিব ড° আশীস কুমাৰ ভুটানীয়ে চৰকাৰে হাতত লোৱা বীজ উৎপাদনৰ পৰিকল্পনাৰ কথা ব্যক্ত কৰে ৷ এইক ক্ষেত্ৰত কৃষি বিভাগ কিমান কৃতকাৰ্য হব সেই কথা সময়তহে কব পৰা যাব ৷