উত্তৰাখণ্ডত উদ্ধাৰ অভিযান অব্যাহতঃ ১৫ জনৰ সন্ধান, সন্ধানহীন ১০০ৰো অধিক…

ডিজিটেল ডেস্কঃ উত্তৰাখণ্ডৰ চামোলি জিলাৰ অলাকানন্দা নদীত হিমবাহ বিস্ফোৰণৰ ফলত এক ভয়ংকৰ পৰিস্থিতিৰ সৃষ্টি হৈছে। কেদাৰনাথৰ ৮ বছৰ পূৰ্বৰ ভয়ংকৰ স্মৃতিহে যেন বহন কৰিছে এই ঘটনাই।আনহাতে ঘটনা সংঘটিত হোৱাৰ পিছৰে পৰা আৰম্ভ হয় তুষাৰ বৃষ্টিপাত।

উত্তৰাখণ্ডৰ চৰকাৰী তথ্য অনুসৰি এই ঘটনাত প্ৰায় ১৫০ জন লোক সন্ধানহীন। বহুকেইজন লোক বৰ্তমানেও আবদ্ধ হৈ থকাৰ সন্দেহ ব্যক্ত কৰা হৈছে। ইফালে, ধৌলিগঙ্গা নদীৰ পানীৰ স্তৰো বৃদ্ধি পাইছে দ্ৰুতগতিত । ৰাষ্ট্ৰীয় সংবাদ মাধ্যমৰ খবৰ অনুসৰি নদীৰ বাঢ়নি পানীৰ ফলত জলমগ্ন হৈছে কাষৰীয়া গাওঁবোৰো।

এই আকস্মিক ঘটনাটোৰ ফলত বহুকেইখন গাওঁৰ বিস্তৰ ক্ষতি হৈছে। ইয়াৰ লগতে বিশেষভাৱে ক্ষতিগ্ৰস্ত হৈছে ঋষিগংগা নদীৰ ওপৰত থকা বিদ্যুৎ প্ৰকল্পটিৰো। উল্লেখ্য যে বহু শ্ৰমিকে কাম কৰিছিল এই নিৰ্মীয়মান প্ৰকল্পটিত।

এই ঘটনাত উদ্বেগ প্ৰকাশ কৰিছে দেশৰ প্ৰধানমন্ত্ৰী নৰেন্দ্ৰ মোডীয়ে। ঢেকীয়াজুলিৰ বিশাল জনসভাত ভাগ লোৱাৰ সময়তে প্ৰধানমন্ত্ৰী জনে লাভ কৰিছিল এই খবৰ। অনুষ্ঠানৰ পৰাই ঘটনা সন্দৰ্ভত যোগাযোগ অব্যাহত ৰাখিছে প্ৰধানমন্ত্ৰীজনে। তেওঁ মন্তব্য কৰিছে যে উত্তৰাখণ্ডৰ এই পৰিস্থিতিৰ ওপৰত তেওঁ দৃষ্টি আবদ্ধ। তেওঁ সকলোৰে সুৰক্ষাৰ বাবে প্ৰাৰ্থনা জনোৱাৰ লগতে উচ্চপদস্থ কৰ্তৃপক্ষৰ লগত সঘনাই যোগাযোগ ৰখাৰ কথাও জনাইছে প্ৰধানমন্ত্ৰী জনে।

এই ঘটনা সম্পৰ্কত বলিউডৰ পৰিচালক ঔনিৰেও টুইটাৰযোগে নিজৰ মন্তব্য প্ৰকাশ কৰিছে।তেওঁ উত্তৰাখণ্ডৰ হিমবাহ বিস্ফোৰণৰ ফটো চেয়াৰ কৰি সেয়া ভয়ানক বুলি মন্তব্য কৰিছে।

This is frightening #PrayersForUttrakhandhttps://t.co/wuuVls6ta6

— iamOnir (@IamOnir) February 7, 2021

উত্তৰাখণ্ডৰ মুখ্যমন্ত্ৰী ত্ৰিবেন্দ্ৰ সিং ৰাউতে টুইটযোগে এটা হেল্প লাইন নম্বৰো মুকলি কৰিছে ঘটনা সম্পৰ্কত। তেওঁ টুইটাৰ যোগে আবদ্ধ লোক সকলক ক্ষতিগ্ৰস্ত ঠাইত আবদ্ধ থাকিলে আৰু কোনো সাহায্যৰ প্ৰয়োজন হ'লে দুৰ্যোগ নিবাৰণ বিভাগৰ নম্বৰ ১০৭০ বা ৯৫৫৭৪৪৪৪৮৬ নম্বৰত যোগাযোগ কৰিবৰ বাবে আহ্বান জনাইছে।

अगर आप प्रभावित क्षेत्र में फंसे हैं, आपको किसी तरह की मदद की जरूरत है तो कृपया आपदा परिचालन केंद्र के नम्बर 1070 या 9557444486 पर संपर्क करें। कृपया घटना के बारे में पुराने वीडियो से अफवाह न फैलाएं।

— Trivendra Singh Rawat (@tsrawatbjp) February 7, 2021

উল্লেখ্য যে, ধৌলিগঙ্গাৰ কাষৰীয় ৰেনি গাঁৱত প্ৰচুৰ ক্ষতিৰ আশংকা কৰা হৈছে। উদ্ধাৰ অভিযানৰ বাবে শতাধিক আইটিবিপি, এনডিআৰএফ, এছডিআৰএফ জোৱানক ঘটনাস্থলীলৈ প্ৰেৰণ কৰা হৈছে। তেওঁলোকে ৩ টা মৃতদেহৰ লগতে ১৫ জন লোকক জীৱন্তে উদ্ধাৰ কৰিবলৈ সক্ষম হৈছে।