ডিজিটেল সংবাদ, দিখৌঃ শিৱসাগৰ চহৰত অঘটন। আজি পুবতি নিশা আমগুৰি ঘাটৰ দিখৌ দলঙৰ ওপৰৰ পৰা নদীত জঁপিয়াই এগৰাকী মহিলা সন্ধানহীন হোৱা ঘটনাই চাঞ্চল্যৰ সৃষ্টি কৰিছে । সন্ধানহীন মহিলা গৰাকীৰ নাম শিখা শইকীয়া ৷ জয়সাগৰৰ নিৱাসী পংকজ গায়নৰ সৈতে ২০০৭ চনত বিবাহ পাশত আবদ্ধ হোৱা শিখা শইকীয়া এটি তেৰ বছৰীয়া সন্তানৰ মাতৃ।
কালুগাওঁ উপ স্বাস্থ্য কেন্দ্ৰত কৰ্মৰত শিখাৰ প্ৰকৃত ঘৰ আখৈফুটীয়া জয়ৰাপাৰ অঞ্চলত ৷ মাতৃৰ চাকৰিৰ সূত্ৰে জয়সাগৰ চিকিৎসালয়ৰ আৱাসীক এলেকাত থাকে ৷ আজি পুৱতি নিশা দিখৌ দলঙৰ ওপৰত আৰক্ষীয়ে ষ্ট্ৰাট হৈ থকা অৱস্থাত লাভ কৰে শিখাৰ স্কুটিখন।
বৰ্তমান ঘটনাস্থলীত আৰক্ষী, এচ ডি আৰ এফৰ দল উপস্থিত হৈ উদ্ধাৰ অভিযান আৰম্ভ কৰিছে । এনে অঘটনৰ কাৰণ পাৰিৱাৰিক সংঘাত বুলি আৰক্ষীয়ে সন্দেহ প্ৰকাশ কৰিছে।উল্লেখযোগ্য যে ২০০৭ চনত উক্ত স্থানৰ পৰাই শিখাৰ পিতৃ অপূৰ্ব শইকীয়াই দিখৌ নদীত জঁপিয়াই আত্মহত্যা কৰিছিল।
