ডিজিটেল সংবাদ, গৰৈমাৰীঃ কামৰূপ জিলাৰ বকো সমষ্টিৰ অন্তৰ্গত সোণতলীৰ মাহতলী সাপ্তাহিক মঙলবৰীয়া বজাৰত মংগলবাৰে বন বিভাগে অভিযান চলাই বৃহৎ পৰিমাণৰ ফলা কাঠ জব্দ কৰিবলৈ সমৰ্থ হয়৷ জানিব পৰামতে পশ্চিম কামৰূপ বন সংমণ্ডল প্ৰাধিকাৰী কাৰ্যালয়ৰ ডি এফ অ' ডিম্পী বৰাৰ নিৰ্দেশমৰ্মে ৰেঞ্জাৰ বাপধন মজুমদাৰৰ নেতৃত্বত সোণতলী আৰক্ষীৰ সহযোগত মংগলবাৰে সোণতলীৰ মাহতলী সাপ্তাহিক মঙলবৰীয়া বজাৰত আকস্মিকভাৱে অভিযান চলায়৷
বন বিভাগৰ অভিযানকালত মাহতলী বজাৰৰ ৯ খন অবৈধ কাঠৰ দোকানৰ তলা ভাঙি বিক্ৰীৰ বাবে জমা ৰখা বিভিন্ন ধৰণৰ অবৈধ ফলা কাঠখিনি জব্দ কৰে৷ ইপিনে বন বিভাগৰ লোক অহাৰ উমান পাই অবৈধ কাঠৰ দোকানীসকলে দোকানত তলা লগাই আতৰি যায়৷ জব্দকৃত অবৈধ ফলা কাঠখিনিৰ মূল্য কেবা লক্ষাধিক টকা হ'ব৷ আনহাতে জব্দকৃত অবৈধ ফলা কাঠখিনি বামুণীগাঁও, বকো, বন্দাপাৰাৰ বন বিষয়াৰ কাৰ্যালয়লৈ নিয়া বুলি জানিব পৰা গৈছে৷
