অৱশেষত খেলাৰ অন্ত পৰিল । নিৰ্বাচন আয়োগৰ নিৰ্বাচনী ফলাফল ঘোষণাৰ লগে লগে অন্ত পৰিল ৫ ৰাজ্যৰ নিৰ্বাচনী লীগ । অসমত হিমন্ত বিশ্ব শৰ্মা আৰু পশ্চিম বংগত মমতা বেনাৰ্জীয়ে খেলা দেখুৱালে । পুনৰ এবাৰ ৰাজ্যত বিজেপিৰ চৰকাৰ হোৱাটো নিশ্চিত হ'ল ।
অন্তিম মুহুৰ্তত সপোনৰ পৰা বাস্তৱলৈ ঘূৰি আহিবলৈ বাধ্য হ"ল কংগ্ৰেছ নেতৃত্বধীন মহাজোঁট । চৰকাৰ গঠন কৰিম বুলি তালফাল লগাই থকা কংগ্ৰেছৰ ভালে কেইজন বীৰ এইবাৰ নিৰ্বাচনী ৰণত পৰিল । আনহে নালাগে প্ৰদেশ কংগ্ৰেছৰ সভাপতি গৰাকীয়ে নিজৰ ভেটি ৰক্ষা কৰিব নোৱাৰিলে ।
সৌ সেই দিনালৈকে বিজেপিয়ে কংগ্ৰেছৰ বিধায়কক চৰকাৰ গঠনৰ বাবে ক্ৰয় কৰিব বুলি ভয় কৰি সোনাপুৰৰ বিলাসী ৰিজৰ্টত ৰখোৱা ভালে কেইগৰাকী হেভীৱেট প্ৰাৰ্থীয়ে এইবাৰ ৰাইজৰ আস্থা লাভ কৰিবলৈ সক্ষম নহ'ল ।
বিহপুৰীয়াত ভূপেন বৰা পৰাস্ত হ'ল বিজেপি প্ৰাৰ্থী অমিয় ভূঞাৰ হাতত । মন্ত্ৰী হোৱাৰ সপোন দেখা আৰু বিভাগ ভাগ বতৰা কৰি লোৱা নতুন কংগ্ৰেছীও এইবাৰ বেয়াকৈ মুখ থেকেচা খালে । ৰিপুন বৰা মুখ্যমন্ত্ৰী আৰু তেওঁ সাংস্কৃতিক মন্ত্ৰী হ'ব বুলি দম্ভ মৰা সকলে নিশ্চয় বুজিব পাৰিলে ৰাজনীতি ইমান সহজ নহয় ।
অৱশ্যে এইবাৰ নিৰ্বাচনত আটাইতকৈ ইতিবাচক দিশটো হ'ল শিৱসাগৰত ৰাইজৰ দলৰ প্ৰাৰ্থী তথা দলটোৰ সভাপতি অখিল গগৈ জয়ী হৈছে । দীৰ্ঘ দিনৰ সংগ্ৰামৰ অন্তত ৰাজনীতিত প্ৰবেশ কৰা অখিল গগৈয়ে সংসদীয় ৰাজনীতিত অসমৰ সংগ্ৰামী সত্ত্বাক তুলি ধৰি জাতি,মাটি আৰু ভেটিৰ হকে মাত মাতিব বুলি ৰাইজে বিশ্বাস ৰাখিছে ।
লুৰীণ জ্যেতি গগৈয়ে দুটা সমষ্টিত প্ৰতিদ্বন্দ্বিতা কৰিলেও অসম জাতীয় পৰিষদৰ সভাপতি গৰাকী পৰাজয় অসমৰ অঞ্চলিকতাবাদত বিশ্বাসী সকলৰ বাবে এক দুখবৰ হৈ ৰ'ল । এইবাৰ নিৰ্বাচনত কংগ্ৰেছৰ অধিক আত্মবিশ্বাসেই কাল হ'ল ।
বদৰুদ্দিন আজমল অসমৰ ৰাজনীতিত ইতিবাচক বা নেতিবাচক দিশত আকৌ এবাৰ কাৰক হৈ পৰিল । উজনি অসমত কংগ্ৰেছে এআইইউডিএফৰ সৈতে কৰা মিত্ৰতাৰ ফল লাভ কৰিলে । সেই ফল কংগ্ৰেছৰ সপক্ষে হোৱাৰ বিপৰীতে বিজেপিৰ পক্ষেহে গ'ল ।
জয়ৰ প্ৰচুৰ সম্ভাৱনা থকা স্বত্বেও উজনি অসমৰ বহু কেইটা সমষ্টিত কংগ্ৰেছে ইয়াৰ ফল ভুগিব লগা হ'ল। বিজেপিৰে সম্প্ৰদায়িক মেৰু বিভাজনৰ জৰিয়তে সাধাৰণ ৰাইজৰ মাজলৈ এই বাৰ্তা প্ৰেৰণ কৰাত সফল হ'ল যে নিৰ্বাচনত জয়লাভ কৰিলে এআইইউডিএফে কংগ্ৰেছৰ ত্ৰাণকৰ্তা হ'ব ।
অঞ্চলিকতাবাদৰ ধ্বজ্জা উৰুৱা দুই নতুন দলৰ এইবাৰ নিৰ্বাচনত সংখ্যাগত ভাবে ভাল ফলাফল লাভ নকৰিলেও কিমান শতাংশ ভোট লাভ কৰিছে সেয়া অনাগত ভবিষ্যতৰ ৰাজ্যৰ ৰাজনীতিৰ বাবে লক্ষণীয় হ'ব ।
নিৰ্বাচনী প্ৰচাৰত অত্যুসাহ প্ৰকাশ কৰি এআইইউডিএফৰ নেতাই দিছপুৰত লুঙী টুপী পিন্ধা লোকৰ চৰকাৰ হ'ব বুলি কৰা ঘোষণাই খিলঞ্জীয়া লোকৰ নিশ্চিত ভাবে অসন্ত্ুষ্ট কৰিছিল । কংগ্ৰেছে 'কা'ক লৈ দিয়া প্ৰতিশ্ৰুতি আছিল অঞ্চল ভেদে পৃথক ।
দলটোৰ ৫ টা গেৰান্টীৰ ভিতৰত ব্ৰহ্মপুত্ৰ উপত্যকাত দিয়া গেৰান্টী সমূহৰ ভিতৰত সন্নিবিষ্ট আছিল কা বাতিল কৰা গেৰান্টী । বৰাক উপত্যকাত উহ্য হৈ ৰৈছিল এই গেৰান্টী । তেনে চতুৰ ৰণ কৌশলেও দলটোৰ প্ৰতি ভোটাৰক আকৰ্ষিত কৰিব নোৱাৰিলে ।
শেষ ফলাফল পোহৰলৈ আহিল । পুনৰবাৰ কংগ্ৰেছে পৰাজয় স্বীকাৰ কৰিব লগা হ'ল । ইয়াৰ বিপৰীতে কংগ্ৰেছৰ অক্সিজেনেৰে এআইইউডিএএফে পূৰ্বতকৈ তেওঁলোকৰ আসনৰ সংখ্যা বৃদ্ধি কৰিলে । এইবাৰ নিৰ্বাচনত আনুষ্ঠানিক ভাবে এই মুহুৰ্তলৈকে আয়োগে ফলাফল ঘোষণা নকৰিলেও কোন সমষ্টিত কোন কোন প্ৰাৰ্থীয়ে জয়লাভ কৰিছে সেই ফলাফল হ'ল এই ধৰণৰ –
এনে ফলাফল লাভ কৰাৰ পিছত মৰ্ত্যলৈ নামিবলৈ বাধ্য হ'ল প্ৰদেশ কংগ্ৰেছৰ সভাপতি ৰিপুন বৰা । কেন্দ্ৰীয় নেতৃত্বলৈ তেওঁ পৰাজয় স্বীকাৰ কৰি প্ৰেৰণ কৰিলে প্ৰদেশ কংগ্ৰেছৰ সভাপতি পদৰ পৰা পদত্যাগ কৰা পত্ৰ ।
এই নিৰ্বাচনে বিশেষকৈ বিৰোধীক কেইবাটাও শিক্ষা দি গ'ল ।পুনৰ বিজেপি চৰকাৰ হ'ব । এতিয়া সেয়া নিশ্চিত হোৱাৰ পিছত বিজেপি শিবিৰত চৰ্চা চলিছে কোন হ'ব পৰৱৰ্তী মুখ্যমন্ত্ৰী । সৰ্বানন্দ সোণোৱাল দ্বিতীয়টো কাৰ্যকালৰ বাবে মুখ্যমন্ত্ৰী হ'ব নে হিমন্ত বিশ্ব শৰ্মাৰ দুৱাৰ মুকলি হ'ব সেয়া এতিয়া আন এক চৰ্চাৰ বিষয় হৈ পৰিছে ।