ডিজিটেল সংবাদ, শিলচৰঃ আৰক্ষীৰ চকুত ধুলি দি শিলচৰত মুকলিভাৱে ড্ৰাগছ বিক্ৰী কৰা এখন দোকানত আক্ৰমণ চলায় ক্ষুদ্ধ জনতাই৷ শিলচৰ থানাৰ নাতি দূৰৈত অৱস্থিত চামগুদামৰ এই পান দোকান খনত আক্ৰমণ চলাই দোকানখন বগৰাই দিয়ে স্হানীয় ৰাইজে ৷ দীৰ্ঘদিন ধৰি ৰকী নামৰ ড্ৰাগছ ব্যৱসায়ীয়ে পান দোকানখনত মুকলি ভাবে বিক্ৰী কৰি আহিছে মাৰাত্মক ড্ৰাগছ৷
নিতৌ এচাম যুৱকে ৰকীৰ এই দোকানৰ পৰা ড্ৰাগছ ক্ৰয় কৰে ৷ ৰকীৰ বিৰুদ্ধে বাৰম্বাৰ শিলচৰ থানাক অৱগত কৰাৰ পিচতো আৰক্ষীয়ে কোনো ব্যৱস্থা নোলোৱাৰ অভিযোগ স্হানীয় লোকৰ ৷ দীৰ্ঘ দিন অভিযোগ দিয়াৰ পিচত বৃহস্পতিবাৰে শিলচৰ থানাৰ আৰক্ষী গৈ ৰকীৰ দোকানত অভিযান চলায় ৷
অভিযান কালত বুজন পৰিমাণৰ ড্ৰাগছ, ড্ৰাগছৰ কন্টেনাৰ আৰু নগদ ধন জব্দ কৰে ৷ লগতে ড্ৰাগছ ব্যৱসায়ী ৰকী আৰু জামাল উদ্দিন লস্কৰক আটক কৰে আৰক্ষীয়ে ৷ আৰক্ষী উভতি যোৱাৰ পিচতে এইদৰে স্হানীয় লোকে ৰকীৰ পান দোকান খনত আক্ৰমণ চলায় ৷
