ডিজিটেল সংবাদ, শালবাৰীঃ "যদি উৰ্খাও গৌৰা ব্ৰহ্মই বড়োলেণ্ড বিচাৰে তেতিয়াহ'লে এআইইউডিএফৰ লগত তেওঁৰ মিত্ৰতাৰ কথা আহিবই নোৱাৰে। এআইইউডিএফৰ নেতাসকলে আমাৰ বিটিচি চুক্তি বাতিলৰ কাৰণে যুঁজিয়ে আছে৷ গতিকে ৰাইজে ইয়াৰ পৰা বুজা উচিত যে, ৰাইজক প্ৰলোভন দি যাতে তেওঁ ভোট আদায় কৰিব নোৱাৰে তাৰবাবে সকলো সজাগ হ'ব লাগে৷ আমি উৰ্খাও গৌৰা ব্ৰহ্মক আহ্বান জনাইছোঁ তেওঁ আমাৰ লগত আহক, আমাৰ লগত আহিলে আমি তেওঁক ভাল আসন দিম৷" এই মন্তব্য সমাগত লোকসভা নিৰ্বাচনৰ ৫ নং কোকৰাঝাৰ লোকসভা সমষ্টিৰ বিপিএফ দলৰ প্ৰাৰ্থী প্ৰমীলা ৰাণী ব্ৰহ্মৰ৷
মঙলবাৰে ভৱানীপুৰ সমষ্টিৰ তাতিকুছিৰ সমীপৰ পাউৰাবাহাত অনুষ্ঠিত হোৱা দলটোৰ এখন নিৰ্বাচনী সভাত ভাষণ প্ৰসংগত প্ৰমীলা ৰাণী ব্ৰহ্মই সন্মিলিত জনগোষ্ঠীয় ঐক্যমঞ্চৰ প্ৰাৰ্থী তথা বৰ্তমানৰ সাংসদ নৱ কুমাৰ শৰণীয়াক সমালোচনা কৰি কয়- "নৱ শৰণীয়াই আমাৰ সাতামপুৰুষীয়া একতাৰ মাজত বিভেদ আনিছে৷ আমি বড়ো-অবড়ো বুলি নহয়, আমি সকলোৱে এক হৈ মিলাপ্ৰীতিৰে পূৰ্বৰ একতাৰ পৰম্পৰা বজাই ৰাখি আগুৱাব লাগে৷"
বিজেপি দলৰ নেতা গোপীৰাম নাথৰ সভাপতিত্বত অনুষ্ঠিত হোৱা আজিৰ নিৰ্বাচনী সভাখনত শৰৎ স্বৰ্গীয়াৰী, সদ্য কংগ্ৰেছ ত্যাগী নেতা ধীৰাজ ডেকা, প্ৰদীপ দেৱনাথ, নাৰায়ণী বসুমতাৰী প্ৰমুখ্যে দলৰ ভালেকেইগৰাকী বিষয়ববীয়া উপস্থিত থাকে৷
