টাৱাঙবাসীয়ে শ্ৰদ্ধাৰে সোঁৱৰিলে স্বাধীন ভাৰতৰ অন্যতম নায়ক মেজৰ বব কাটিঙক…

ডিজিটেল সংবাদ, টাৱাং: মণিপুৰৰ উখ্ৰুল জিলাত ১৯১২ চনৰ ২৮ ফেব্ৰুৱাৰীত জন্ম হৈছিল এজন সাহসী যোদ্ধাৰ। তেওঁৰ নাম আছিল ৰালেংনাও বব কাটিং। ভাৰতীয় সামৰিক ইতিহাসৰ এজন অন্যতম নায়ক। পাহৰণিৰ গৰ্ভত বিলিন হৈ যোৱা এই নগা বীৰজনৰ সাহসীকতাৰ বাবেই আজি ভাৰতৰ মানচিত্ৰত সগৌৰবে জিলিকি আছে পৰ্যটকৰ অন্যতম আকৰ্ষণ অৰুণাচল প্ৰদেশৰ টাৱাং চহৰ ।

বৌদ্ধ ধৰ্মৰ অতি পবিত্ৰ স্থান বুলি বিশ্বজোৰা খ্যাতি থকা টাৱাং চহৰ আৰু ইয়াৰ ভৌগোলিক ভূখণ্ড দ্বিতীয় বিশ্বযুদ্ধৰ সময়লৈকে স্বাধীন তিব্বতৰ অংশ আছিল । ব্ৰিটিছৰ শাসনকালত বৰ্তমানৰ অৰুণাচল প্ৰদেশৰ প্ৰায়খিনি অঞ্চল নেফাৰ অন্তৰ্গত কৰিছিল যদিও টাৱাঙক ব্ৰিটিছৰ অধীনলৈ আনিব পৰা নাছিল। দ্বিতীয় বিশ্বযুদ্ধৰ সময়লৈকে ব্ৰিটিছে বমডিলা পৰ্যন্ত অৰুণাচল প্ৰদেশৰ মনপা জনজাতিৰ বসতিস্থল নেফাৰ অধীনলৈ আনিছিল ।

কিন্তু টাৱাং চহৰখন তিব্বতৰ দখলত থকা বাবে মনপা জনজাতিৰ লোকসকল ভৌগলীক আৰু প্ৰশাসনীয় দিশত দুভাগত বিভক্ত হৈ আছিল । কিন্তু ১৯৪৭ চনত ভাৰত স্বাধীন হোৱাৰ পাছত টাৱাং বাসীয়েও ভাৰতৰ লগত চামিল হ'ব বিচাৰিছিল । ১৯৫০ চনত সেইসময়ৰ অসমৰ ৰাজ্যপাল জয়ৰামদাস দৌলতৰামে টাৱাঙক ভাৰতৰ লগত চামিল কৰাৰ পৰিকল্পনা কৰে । এই অভিযানৰ দায়িত্ব দিয়ে সেইসময়ত নেফাৰ দায়িত্বত থকা সহকাৰী ৰাজনৈতিক বিষয়া আছাম ৰাইফলছৰ মেজৰ ৰালেংনাও বব কাটিঙক ।

আছাম ৰাইফলছৰ ২০০ জোৱান আৰু ৬০০ প'ৰ্টাৰক লগত লৈ টাৱাং অভিমুখে যাত্ৰা কৰে কাটিঙে । টাৱাঙত উপস্থিত হৈ টাৱাঙৰ জ্যেষ্ঠ লোকসকলৰ লগতে তিব্বতৰ বাবে কৰ সংগ্ৰহ কৰা বিষয়া, টাৱাঙৰ ধৰ্মীয় গুৰু সকল আৰু স্থানীয় লোকৰ লগত বৈঠকত মিলিত হয় আৰু টাৱাঙক তিব্বতৰ শাসনৰ পৰা মুক্ত কৰি ভাৰতৰ লগত সংযুক্ত কৰিবলৈ সক্ষম হয় । বিনা ৰক্তক্ষয়েৰে টাৱাং দখল কৰা বব কাটিঙৰ বিচক্ষণতাৰ বাবেই চীনৰ দাস হোৱাৰ পৰা ৰক্ষা পৰে টাৱাঙবাসী ।

তিব্বতৰ লগত থকা হ'লে টাৱাং বাসীৰ আজি কি অৱস্থা হ'ল হয় সেয়া সহজেই অনুমেয় । কাৰণ পৰৱৰ্তী সময়ত চীনে তিব্বত দখল কৰি তিব্বতীয় সকলৰ সকলো অধিকাৰ খৰ্ব কৰাৰ লগতে জীৱন দুৰ্বিসহ কৰি পেলালে । সেয়ে টাৱাসবাসীক এক নতুন জীৱন দিয়া মেজৰ বব কাটিঙক আজি শ্ৰদ্ধাৰে স্মৰণ কৰিছে টাৱাঙবাসীয়ে । টাৱাঙৰ ভূমিত প্ৰথমবাৰৰ বাবে ভাৰতৰ ৰাষ্ট্ৰীয় পতাকা উত্তোলন কৰা বব কাটিঙৰ স্মৃতিত টাৱাঙত এটি স্মাৰক নিৰ্মাণ কৰিছে অৰুণাচল প্ৰদেশ চৰকাৰে ।

টাৱাঙৰ কালাৱাংপ' প্ৰেক্ষাগৃহত দেওবাৰে অনুষ্ঠিত হোৱা এক বৰ্ণাঢ্য অনুষ্ঠানত অৰুণাচল প্ৰদেশৰ ৰাজ্যপাল বি ডি মিশ্ৰই বব কাটিঙৰ এটি আবক্ষ মূৰ্তি উন্মোচন কৰে আৰু স্মাৰক নিৰ্মাণৰ কামৰ শুভাৰম্ভ কৰে । এই অনুষ্ঠানত অৰুণাচল প্ৰদেশৰ মুখ্যমন্ত্ৰী পেমা খান্দু, মেঘালয়ৰ মুখ্যমন্ত্ৰী কনৰাদ চাংমা, কেন্দ্ৰীয় মন্ত্ৰী কিৰেণ ৰিজিজু, ভাৰতৰ মুখ্য সেনাধ্যক্ষ বিপিন ৰাৱাট, বব কাটিঙৰ পুত্ৰ জন কাটিঙো উপস্থিত থাকে ।