নাগালেণ্ডৰ ৪,১২৭ কোটি টকীয়া ৰাষ্ট্ৰীয় ঘাইপথ প্ৰকল্প শুভাৰম্ভ কৰিলে কেন্দ্ৰীয় মন্ত্ৰী নীতিন গাডকাৰীয়ে….

ডিজিটেল সংবাদ, ৱাখাঃ নাগালেণ্ডবাসীৰ দীৰ্ঘদিনীয়া আশা পূৰণ কৰি কেন্দ্ৰীয় পথ পৰিবহন তথা ৰাষ্ট্ৰীয় ঘাইপথ মন্ত্ৰী নীতিন গাডকাৰীয়ে শুকুৰবাৰে শুভাৰম্ভ কৰে নাগালেণ্ডৰ ৪,১২৭ কোটি টকীয়া ডিমাপুৰ চিটি নেচনেল বাইপাছ হাইৱে আৰু ৰাষ্ট্ৰীয় ঘাইপথ প্ৰকল্প । শুকুৰবাৰে দুপৰীয়া কেন্দ্ৰীয় পৰিবহন মন্ত্ৰী গাডকাৰীয়ে এক ভিডিঅ কনফাৰেন্সিঙৰ জৰিয়তে প্ৰায় ২৭০ কিলোমিটাৰ দৈৰ্ঘ্যৰ ৪, ১২৭ কোটি ৰাষ্ট্ৰীয় ঘাইপথ প্ৰকল্পৰ কাম আনুষ্ঠানিক ভাৱে উদ্ধোধন কৰে ।

লগতে তেওঁ ৪৩ কোটি টকাৰ ব্যয় সাপেক্ষে ডিমাপুৰ চিটিৰ ৩৯ নং নেচনেল হাইৱে প্ৰকল্প আৰু ১৫ নং ৰাষ্ট্ৰীয় ঘাইপথৰ আধাৰশিলা উদ্বোধন কৰে । এই বৃহৎ ৰাষ্ট্ৰীয় প্ৰকল্প উদ্বোধন কৰি নীতিন গাডকাৰীয়ে কয় যে কেন্দ্ৰীয় চৰকাৰে উত্তৰ পূৰ্ব বিশেষকৈ নাগালেণ্ডৰ বিকাশ আৰু প্ৰগতিৰ বাবে প্ৰতিশ্ৰুতিবদ্ধ । তেওঁ কয় নাগালেণ্ডৰ খনিজ সম্পদ , আনাসৰস আৰু বাঁহৰ ভাণ্ডাৰ আছে । এই কেঁচা মাল প্ৰয়োগ কৰি উদ্যোগ গঢ়ি নাগালেণ্ডৰ যুৱক- যুৱতীৰ বাবে কৰ্মসংস্থাপনৰ সুযোগ সৃষ্টি কৰিব পৰা সুবিধা আছে ।

গাডকাৰীয়ে নাগালেণ্ডক কেন্দ্ৰীয় চৰকাৰৰ পৰা সকলো ধৰণৰ সহায়ৰ আশ্বাস প্ৰদান কৰে । উল্লেখযোগ্য যে, কেন্দ্ৰীয় মন্ত্ৰী নীতিন গাডকাৰীয়ে নাগালেণ্ডৰ ২০২০-২১ বৰ্ষৰ বাবে অতিৰিক্ত ১,৬০৭ কোটি টকাৰ বিশেষ পেকেজৰ বিষয়ে ঘোষণা কৰে । গাডকাৰীয়ে মুখ্যমন্ত্ৰী নেইফিউ ৰিঅক তৎকালে ৰাষ্ট্ৰীয় ঘাইপথ প্ৰকল্পৰ বাইপাছৰ বাবে ভূমি অধিগ্ৰহণ আৰু ক্ষতিপূৰণৰ আনুমানিক ব্যয় তথ্য প্ৰেৰণ কৰিবলৈ অনুৰোধ জনায় ।

নীতিন গাডকাৰীয়ে উদ্বোধন কৰা ৪,১২৭ কোটি টকাৰ ৰাষ্ট্ৰীয় ঘাইপথ প্ৰকল্পৰ অধীনত এন এছ আই ডি চি এলে পেৰেন – ডিমাপুৰ , ক'হিমা- জেছামি, কহিমা – ফেক ম্যানমাৰ সংযোগী , কহিমা ডিমাপুৰ বাইপাছ আৰু কহিমা – মাও ৰাষ্ট্ৰীয় ঘাইপথ নিৰ্মাণ কৰিব । এই প্ৰকল্প সম্পূৰ্ণ হৈ উঠিলে নাগালেণ্ড উত্তৰ পূৰ্বাঞ্চলৰ ভিতৰত অন্যান্য চুবুৰীয়া ৰাজ্যৰ সৈতে দ্ৰুত অৰ্থনৈতিক উন্নয়ন ঘটিব বুলি নাগালেণ্ডৰ ৰাইজে আশা প্ৰকাশ কৰিছে ।