মোৰাঝাৰ গাওঁ পঞ্চায়তত চৰম দুৰ্নীতি, ৰাইজৰ প্ৰতিবাদ..

ডিজিটেল সংবাদ, মোৰাঝাৰঃ হোজাই জিলাৰ বিন্নাকান্দি উন্নয়ণ খণ্ডৰ মোৰাঝাৰ গাওঁ পঞ্চায়ত আজি ৰাইজৰ প্ৰতিবাদত উত্তাল হৈ পৰে। পঞ্চায়ত সভাপতি হিফজুৰ ৰহমান মুৰ্দাবাদ ,লেকামহীন দূৰ্নীতি বন্ধ কৰক ,হিফজুৰ ৰহমান গ বেক ,সভাপতি হিফজুৰ ৰহমান হুচিয়াৰ ,হিফজুৰ ৰহমান নিপাত যাওক , আব্দুল কৰিম সাৱধান , পঞ্চায়তৰ কামত দূৰ্নীতি কৰা বন্ধ কৰক আদি নানান শ্লোগাণেৰে পদুমণিৰ আকাশ বতাহ কপাই তোলে প্ৰতিবাদী ৰাইজে ।

অৰ্ধ শতাধিক স্থানীয় গঞা ৰাজপথলৈ ওলাই আহি দূৰ্নীতিৰ বিৰুদ্ধে সৰৱ হৈ পৰে । উল্লেখযোগ্য যে ,বিন্নাকান্দি উন্নয়ণ খণ্ডৰ মোৰাঝাৰ গাওঁ পঞ্চায়তৰ পদূমণি ১নং ৱাৰ্ডৰ কবৰস্থানৰ পুখুৰী খননৰ নামত যোৱা ২০১৭-১৮ বিত্তীয় বৰ্ষত এনৰেগাৰ অধীনত ১১.৫০ লাখ টকা মঞ্জুৰ কৰা হয় । তথ্য অনুসৰি শ্ৰমৰ বাবদ ১১.২১ লাখ আৰু সামগ্ৰী বাবদ .২৮ লাখ টকা ধাৰ্য কৰে বিভাগে ।

প্ৰতিবাদকাৰী ৰাইজৰ অভিযোগ মতে ,কবৰস্থানৰ পুখুৰী খননৰ নামত চৰম অনিয়ম দূৰ্নীতি সংঘটিত হৈছে । সভাপতি হিফজুৰ ৰহমানে সাঙু পাঙুক লৈ নাম মাত্ৰ অৰ্ধ লক্ষ টকাৰ কাম কৰিয়েই দায়িত্ব সামৰাৰ গুৰুতৰ অভিযোগ তুলিছে স্থানীয় ৰাইজে ।

মঞ্জুৰকৃত ধনৰ সিংহভাগ ধন অৰ্থাৎ ৮.৩৪ লাখ টকা ইতিমধ্যে সৰকাই নিয়াৰ অভিযোগ প্ৰতিবাদী ৰাইজৰ । নাম মাত্ৰ কাম কৰি সিংহভাগ ধন তুলি নিয়াত ক্ষোভত ফাটি পৰে স্থানীয় গঞা । ক্ষোভিত ৰাইজে আজি আবেলি ৰাজপথত উত্তাল প্ৰতিবাদ সাব্যস্ত কৰে । কবৰস্থানৰ পুখুৰী খননৰ নামত সংঘটিত দূৰ্নীতিৰ বিৰুদ্ধে উচ্চ পৰ্যায়ৰ তদন্ত দাবী কৰিছে প্ৰতিবাদী ৰাইজে ।