‘স্ক’টলেণ্ড অৱ দ্য ইষ্ট’ এতিয়া পৰ্যটকৰ এৰাবাৰীত পৰিণত, কোৰোনাত বিধ্বস্ত মেঘালয়ৰ অৰ্থনীতি…

ডিজিটেল সংবাদ, শ্বিলংঃ সমগ্ৰ দেশজুৰি অব্যাহত আছে কোৰোনা ভাইৰাছৰ সংক্ৰমণ তথা শংকা। এই মহামাৰী পৰিস্থিতি কেতিয়ালৈকে নিয়ন্ত্ৰণ হ'ব সেই কথা স্পষ্টকৈ ক'ব নোৱাৰি। কিন্তু এই ভাইৰাছৰ বাবে কেন্দ্ৰ তথা ৰাজ্যসমূহৰ চৰকাৰে বান্ধি দিয়া নীতি-নিয়মসমূহৰ ফলত সৰ্বসাধাৰণ ৰাইজে বহু সমস্যাৰ সন্মুখীন হৈছে।

চৰকাৰে লোৱা লকডাউন, আন্তঃৰাজ্যিক যাতায়াত বন্ধ আদি সিদ্ধান্তৰ বাবে বিশেষকৈ অৰ্থনীতিত পৰিছে প্ৰভাৱ। পৰ্যটন বিভাগেই অৰ্থনীতিৰ মুল উৎস মেঘালয়ত এই লকডাউনৰ ফলত ইয়াৰ অৰ্থনীতিৰ ওপৰত বাৰুকৈ প্ৰভাৱ পৰা দেখা গৈছে। প্ৰতি বছৰে মে'ৰ পৰা আগষ্টলৈকে দেশ-বিদেশৰ পৰ্যটকসকল আহে মেঘালয়ৰ শ্বিলঙলৈ। ৰাজ্যখনৰ গ্ৰীণ ভেলী, ঝৰ্ণা, মেঘে আৱৰা ওখ ওখ পাহাৰ, লিভিং ৰুট ব্ৰীজ, সুন্দৰ নদী আদিৰে ভৰিথকা স্থানসমূহ উপভোগ কৰিবলৈ প্ৰতি বছৰে হাজাৰ হাজাৰ লোক আহে মেঘালয়লৈ।

কিন্তু চলিত বৰ্ষত বিশ্বৰ আন দেশৰ লগতে ভাৰততো বিয়পি পৰা কোৰোন ভাইৰাছৰ ফলত পূৰ্বৰে নাথাকিল পৰিস্থিতিসমূহ। মে'ৰ পৰা আগষ্টলৈকে লকডাউনৰ মাজতে পাৰ কৰিব লগীয়া হ'ল দেশবাসীয়ে। বছৰটোৰ এই সময়চোৱাত আটাইতকৈ বেছি পৰ্যটকে আহি ভিৰ কৰা শ্বিলঙত পিছে এইবাৰ কোনো পৰ্যটকক আহিবলৈ অনুমতি প্ৰদান কৰা হোৱা নাই।

উল্লেখ্য যে, প্ৰতি বছৰে এই সময়ত শ্বিলঙৰ বাট-পথ যান-বাহনেৰে ভৰি থাকে। কিন্তু ২০২০ত দেখা গৈছে সম্পূৰ্ণ বিপৰীতে ছবি। ৰাজ্যখনৰ হোটেলসমূহ খালী হৈ পৰি আছে, চলা নাই টেক্সী গাড়ীসমূহ। পৰ্যটকৰ পৰাই ধন অৰ্জা হোটেল ব্যৱসায়ী তথা বাহনৰ ব্যৱসায়ী-চালকসকল, টুৰিষ্ট গাইড আদি ভীষণ সমস্যাৰ সন্মুখীন হ'ব লগা হৈছে। পৰ্যটকৰ বাবে ৰাজ্যখনত নিষেধাজ্ঞা জাৰি কৰাৰ পাছতেই এতিয়া এই ৪ মাহত অৰ্থনীতিৰ ওপৰত প্ৰভাৱ পৰা দেখা গৈছে।

কোৰোনা ভাইৰাছৰ ফলত ৰাজ্যখনৰ পৰ্যটন তথা অৰ্থনীতিৰ ওপৰত পৰা এই প্ৰভাৱৰ প্ৰতি লক্ষ্য ৰাখি মেঘালয়ৰ মুখ্যমন্ত্ৰী কনৰাড ছাংমাৰ চৰকাৰে গঠন কৰিছে এটা টাস্ক ফ'ৰ্ছ। কোৰোনাৰ প্ৰভাৱ কি ধৰণে পৰ্যটন ক্ষেত্ৰখনত ওপৰত প্ৰভাৱ পৰিছে আৰু কি কি সমস্যাৰ সন্মুখীন হৈছে তাক লৈ অধ্যয়ন কৰাৰ বাবে গঠন কৰি দিছে এই টাস্ক ফ'ৰ্ছ।

শেহতীয়াকৈ মুখ্যমন্ত্ৰীগৰাকীয়ে প্ৰস্তাৱ আগবঢ়াই 'কোভিড-১৯ ৰিছিলিয়েন্ট ম'ডেল' উন্নত কৰাৰ। ইয়াৰ বাবে তেওঁ প্ৰস্তুতি আৰম্ভ কৰাৰ প্ৰয়োজন থকা আৰু এই ম'ডেলত কিছু সালসলনি কৰাৰ বাবেও আহ্বান জনায়। ইফালে, ৰাজ্য তথা কেন্দ্ৰীয় শাসিত প্ৰদেশৰ মুখ্য সচিবসকললৈ কেন্দ্ৰীয় গৃহ সচিব অজয় ভাল্লাই পত্ৰ প্ৰেৰণ কৰিছে।

এই পত্ৰত কেন্দ্ৰীয় গৃহ সচিবগৰাকীয়ে লিছিছে- এনে বহু খবৰ লাভ কৰা হৈছে যে বিভিন্ন জিলা প্ৰশাসন আৰু ৰাজ্য চৰকাৰে আন্তঃৰাজ্যিক ভ্ৰমণত নিষেধাজ্ঞা প্ৰদান কৰিছে। আনল'ক-৩ৰ নীতি-নিৰ্দেশনাৰ কথা উল্লেখ কৰি তেওঁ লগতে লিখিছে যে, এনে নিষেধাজ্ঞাৰ দ্বাৰা সামগ্ৰী আৰু মানুহৰ আন্তঃৰাজ্যিক যাত্ৰাত বহু অসুবিধাৰ সৃষ্টি হয়। লগতে অৰ্থনীতিৰ ওপৰতো প্ৰভাৱ পৰে। অৱশ্যে কেন্দ্ৰীয় গৃহ সচিব গৰাকীৰ এই পত্ৰৰ পাছত প্ৰশ্ন উত্থাপন হৈছে যে, আন্তঃৰাজ্যিক যাতায়াত পুনৰ আৰম্ভ কৰিলে দেশত কোৰোনাৰ সংক্ৰমণ পুনৰ বৃদ্ধি পাব নেকি? এই উত্তৰ পিচে সময়তহে জানিব পৰা যাব।