সদৌ নিছি যুৱ সন্থাৰ ৩৬ ঘন্টীয়া ইটানগৰ বন্ধ কাৰ্যসূচী স্থগিত…

ডিজিটেল সংবাদ, ইটানগৰ: সদৌ নিছি যুৱ সন্থাই তেওঁলোকৰ আঠ দফীয়া দাবী পূৰণ নকৰাৰ প্ৰতিবাদত অহা ২৭ আগষ্টৰ পুৱাৰে পৰা আহ্বান জনোৱা ৩৬ ঘন্টীয়া ইটানগৰ বন্ধ কাৰ্যসূচী সাময়িকভাৱে স্থগিত ৰাখিছে । মঙলবাৰে এক সংবাদমেলত নিছি যুৱ সন্থাৰ সভাপতি ব্যাবাং জোৰামে এই কথা প্ৰকাশ কৰিছে।

জোৰামে কয় যে- তেওঁলোকৰ আঠদফীয়া দাবী সন্দৰ্ভত মুখ্যমন্ত্ৰী পেমা খান্দুৰ চৰকাৰে শেহতীয়াকৈ গ্ৰহণ কৰা পদক্ষেপত তেওঁলোকৰ দাবীসমূহ পুৰণ কৰিছে বাবেই বন্ধ সাময়িকভাৱে পিছুৱাই দিয়া হৈছে। ৰাজ্যখনৰ শেহতীয়া অৰ্থনৈতিক অৱস্থা সন্দৰ্ভত নিছি যুৱ সন্থাই শ্বেত পত্ৰ প্ৰকাশ কৰিবলৈ দাবী জনাইছিল। অৰুণাচল প্ৰদেশ চৰকাৰে জিলা সমূহৰ পৰা শেহতীয়া তথ্য লাভ নকৰা বাবে শ্বেত পত্ৰ প্ৰকাশ কৰিব পৰা নাই।

অহা ১৫ দিনৰ ভিতৰত ৰাজ্যৰ অৰ্থনৈতিক অৱস্থা আৰু আয়-ব্যয়ৰ সমূদায় তথ্য প্ৰকাশ কৰিব বুলি ৰাজ্য চৰকাৰে সন্থাক প্ৰতিশ্ৰুতি দিছে । অৱশ্যে নিছি যুৱ সন্থাৰ এই বন্ধ কাৰ্যসূচী মূলত: মন স্বায়ত্বশাসিত পৰিষদ আৰু পাটকাই স্বায়ত্বশাসিত পৰিষদ গঠনৰ বাবে ৰাজ্য চৰকাৰে গ্ৰহণ কৰা কেতবোৰ পদক্ষেপহে বন্ধ ঘোষণা কৰাৰ প্ৰকৃত কাৰণ আছিল। যাৰ বাবে নিছি জনগোষ্ঠীৰ লগত মন (টাৱাং আৰু ৱেষ্ট কামেং জিলা অঞ্চল)ৰ মনপা লোক সকলৰ মাজত মতভেদ সৃষ্টি হৈছিল ।

এনে পৰিস্থিতিত বন্ধৰ সময়ত যি কোনো অপ্ৰীতিকৰ আৰু হিংসাত্মক কাৰ্যকলাপ ৰোধ কৰাৰ বাবে ৰাজ্য চৰকাৰে ১৭ টাকৈ অৰ্ধসামৰিক বাহিনীৰ কোম্পানী ইটানগৰত মোতায়েন কৰিছিল । ইয়াৰ ভিতৰত এটাকৈ অৰ্ধসামৰিক বাহিনীৰ কোম্পানী অসমৰ পৰাও অনা হৈছিল । যোৱা বছৰৰ ফেব্ৰুৱাৰী মাহত অনা অৰুণাচলী লোকক পি আৰ চি প্ৰদানৰ বিৰোধিতা কৰি হোৱা আন্দোলনত কেবাশ কোটী টকাৰ ব্যক্তিগত আৰু ৰাজহুৱা সম্পত্তি জ্বলাই দিছিল উন্মত্ত প্ৰতিবাদকাৰীয়ে।

আৰক্ষীৰ গুলিত তিনিজন প্ৰতিবাদকাৰী নিহত হৈছিল । তেনে এক পৰিস্থিতিৰ পুনৰাবৃত্তি যাতে নহয় সেইবাবে ৰাজ্য চৰকাৰে ২৭ আগষ্টৰ পৰা হ'ব লগা বন্ধ প্ৰত্যাহাৰ কৰিবলৈ সৰ্বতো প্ৰকাৰে চেষ্টা কৰিছিল আৰু অৱশেষত সফলো হ'ল । সংবাদমেলত নিছি ইলিট ছ'ছাইটিৰ সভাপতি বেংগিয়া টলুম উপস্থিত আছিল আৰু তেওঁৰ প্ৰত্যক্ষ সহযোগিতাৰ বাবেই নিছি যুৱ সন্থাই বন্ধ পিছুৱাই দিয়াত এক সাম্ভাব্য জটিলতাৰ পৰা ৰক্ষা পৰিল ৰাজধানী ইটানগৰ ।

উল্লেখ্য যে, প্ৰস্তাৱিত বন্ধৰ সময়ত একাংশ অসামাজিক লোকে বন্ধৰ সুযোগ লৈ ব্যাপক হিংসাত্মক কাৰ্যকলাপ সংঘটিত কৰিবলৈ পৰিকল্পনা কৰিছিল বুলি স্বয়ং অৰুণাচল প্ৰদেশ আৰক্ষী সঞ্চালক প্ৰধান আৰ পি উপাধ্যায়ে সংবাদ মাধ্যমৰ আগত প্ৰকাশ কৰিছিল।