অৰুণাচলৰ দুই প্ৰাক্তন মুখ্যমন্ত্ৰীৰ ঘৰত চি বি আইৰ তালাচী

ডিজিটেল সংবাদ, ইটানগৰঃ অৰুণাচল প্ৰদেশৰ প্ৰাক্তন মুখ্যমন্ত্ৰী নাবাম টুকী আৰু গেগং আপাঙৰ ইটানগৰৰ বাসগৃহত কালি চি বি আইৰ দুটা পৃথক দলে দীৰ্ঘসময় ধৰি তালাচী চলায়৷ ইটানগৰৰ স্থানীয় আৰক্ষীৰ সহযোগত নাবাম টুকীৰ ইটানগৰৰ বিধানসভাৰ কাষত থকা প্ৰসাদোপম বাসভৱনত গুৱাহাটীৰ পৰা অহা চি বি আইৰ বৃহৎ দল এটাই এই অভিযান চলায়৷

গড়কাপ্তানী বিভাগৰ মন্ত্ৰী হৈ থকাৰ সময়ত নিজ পৰিয়ালৰ সদস্যক নিবিদা আহ্বান নকৰাকৈয়ে ঠিকা আবন্টন দিয়াৰ এক গোচৰ চলি আছিল নাবাম টুকীৰ বিৰুদ্ধে৷ গুৱাহাটী উচ্চ ন্যায়ালয়ত চলি থকা এই গোচৰটো সন্দৰ্ভত চি বি আয়ে নাবাম টুকীক দোষী সাব্যস্ত কৰিছিল যদিও তদন্ত প্ৰক্ৰিয়া শেষ হোৱা নাছিল৷

আনহাতে আন এজন প্ৰাক্তন মুখ্যমন্ত্ৰী গেগং আপাঙৰ বাসগ়হতো চি বি আইৰ পৃথক দল এটাই দীৰ্ঘসময় ধৰি তালাচি চলায়৷ প্ৰায় ২০ বছৰ পূৰ্বে অৰুণাচলত সংঘটিত হোৱা এহেজাৰ কোটী টকীয়া পিডি এছ কেলেংকাৰী সন্দৰ্ভতে চি বি আইৰ দলটোৱে তালাচী চলায় বুলি সন্দেহ কৰা হৈছে৷

অভিযানকালত দলটোৱে বহু গুৰুত্ৰপূৰ্ণ নথি-পত্ৰ জব্দ কৰে বুলি জানিব পৰা গৈছে৷ উল্লেখ্য যে আপাঙক পূৰ্বে পি ডি এছ কেলেংকাৰীৰ গোচৰত গ্ৰেপ্তাৰ কৰা হৈছিল৷

আনহাতে নাবাম টুকীৰ সম্পৰ্কীয় নাবাম টাগাম নামৰ আন এজন ব্যক্তিৰ ঘৰটো চি বি আইৰ তৃতীয় দল এটাই কালিয়েই তালাচী চলায়৷ টাগামৰ ইউপিয়াত থকা ঘৰত চি বি আয়ে তালাচী চলায়৷ উল্লেখ্য যে চি বি আয়ে চলোৱা এই তালাচী অভিযানৰ সময়ত নাবাম টুকী আৰু গেগং আপাং ঘৰত নাছিল৷