অৰুণাচলৰ ডাপ’ৰিজো আৰু নাহৰলগুনত ভয়াৱহ অগ্নিকাণ্ড, জুইত জাঁহ ৪০ টা গৃহ

ডিজিটেল সংবাদ, ইটানগৰঃ মঙলবাৰে নিশা অৰুণাচলৰ ডাপ'ৰিজোত ভয়াবহ অগ্নিকাণ্ডত ৪০ টা ঘৰ ভস্মীভূত হয় । মঙলবাৰে সন্ধিয়া প্ৰায় ৭ বজাত আপাৰ সোৱনশিৰি জিলাৰ সদৰ ডাপ'ৰিজোৰ আবুটানি কলনিত এটা ঘৰৰ পৰা এই জুইৰ সুত্ৰপাত হয় ৷ জুই মুহূৰ্তৰ ভিতৰতে কাষৰ ঘৰ সমূহলৈও বিয়পি পৰে ৷ কাঠ আৰু বাহেৰে নিৰ্মিত প্ৰায় চল্লিছটা ঘৰ নিমিষতে জুইয়ে চানি ধৰে ৷

অগ্নিকাণ্ডত ভস্মীভূত হোৱা ৪০ টা ঘৰত বসবাস কৰি থকা প্ৰায় ৫০ টা পৰিয়াল গৃহহাৰা হয় বুলি জিলা প্ৰশাসনে জানিবলৈ দিছে ৷ এই অগ্নিকাণ্ডৰ ফলত হোৱা কেইবাটাও ৰন্ধন গেছৰ চিলিণ্ডাৰ বিস্ফোৰণ হয় আৰু চিলিণ্ডাৰৰ জুই লাগি এজন লোক আহত হয় ৷ ঘটনাৰ খবৰ পাই আৰক্ষী আৰু অৰ্ধসামৰিক বাহিনীৰ লোক অগ্নি নিৰ্বাপনৰ বাবে আবুটানি কলনিলৈ ঢাপলি মেলে যদিও অগ্নি নিৰ্বাপক বাহিনীৰ লোক  বহু পলমকৈ ঘটনাস্থলীত উপস্থিত হয় । পাছত জিলা প্ৰশাসনে নিশাই অগ্নিকাণ্ডত সৰ্বস্ব হেৰুওৱা পৰিয়াল সমূহক কম্বল, খাদ্য সামগ্ৰী আৰু বাচন-বৰ্তন যোগান ধৰে ৷

উল্লেখ্য যে মঙলবাৰে  দিনৰ ভাগত অৰুণাচল প্ৰদেশৰ ইটানগৰৰ সমীপৰ নাহৰলগুনতো আন এক ভয়াবহ অগ্নিকাণ্ডত ১৫ টা ভাড়াঘৰ পুৰি ছাই হৈ গৈছিল ৷ নাহৰলগুনৰ ২৩ পৰিয়ালৰ লগতে ভাৰাঘৰৰ কাষতে থকা মালিকৰ পকী ঘৰৰো দুটা কোঠাৰ ব্যাপক ক্ষতিসাধন হৈছিল ৷ একেদিনাই ৰাজ্যখনত হোৱা দুটাকৈ ভয়াবহ অগ্নিকাণ্ডত ৭৩ টা পৰিয়াল গৃহহাৰা হ'ব লগা হয় ৷