দেশৰ সকলো অঞ্চলতে আৰম্ভ EPFO ৰ CPPS ব্যৱস্থা...

ডিজিটেল ডেস্কঃ পেঞ্চন পুঁজি সংস্থা ইপিএফঅ'য়ে দেশৰ সকলো অঞ্চলৰ কাৰ্যালয়ত কেন্দ্ৰীয় পেঞ্চন পৰিশোধ প্ৰণালী (চি পি পি এছ) মুকলি কৰিছে। যাৰ ফলত প্ৰায় ৬৮ লাখ পেঞ্চনাৰ লাভান্বিত হ'ব। শ্ৰম মন্ত্ৰালয়ে শুকুৰবাৰে এক বিবৃতিত এই কথা উল্লেখ কৰিছে।

বৰ্তমান, EPFO ৰ প্ৰতিটো আঞ্চলিক কাৰ্যালয়ে তিনি, চাৰিটা বিভিন্ন বেংকৰ সৈতে চুক্তি কৰি পেঞ্চন বিতৰণ কৰে। কিন্তু CPPS ৰ অধীনত, পেঞ্চনাৰসকলে দেশৰ যিকোনো বেংকৰ পৰা পেঞ্চন উলিয়াব পাৰিব আৰু পেঞ্চন আৰম্ভ কৰাৰ সময়ত বেঙ্কত প্ৰমাণীকৰণৰ কোনো প্ৰয়োজন নাথাকিব। পেঞ্চন লাভ কৰাৰ সময়ত পেঞ্চনৰ ধন তাৎক্ষণিকভাৱে পেঞ্চনাৰৰ একাউণ্টত জমা  হ'ব।

এই ব্যৱস্থাই জানুৱাৰী ২০২৫ ৰ পৰা পেঞ্চন বিতৰণ সহজ কৰি তুলিব বুলি আশা কৰা হৈছে। ই পেঞ্চন পৰিশোধ আদেশ (পি পি অ') স্থানান্তৰ কৰাৰ প্ৰয়োজনীয়তা নাইকিয়া কৰিব। পেঞ্চনৰ ক্ষেত্ৰত পেঞ্চনাৰজনে এঠাইৰ পৰা আন ঠাইলৈ যোৱা বা বেংকৰ শাখা পৰিবৰ্তন কৰাৰ দৰে প্ৰক্ৰিয়াবোৰ এতিয়া আৰু প্ৰয়োজন নহ’ব।

এয়া পেঞ্চনাৰসকলৰ বাবে এক ডাঙৰ সকাহ হ'ব বুলি কোৱা হৈছে। বিশেষকৈ যিসকলে অৱসৰৰ পিছত কৰ্মস্থানৰ পৰা তেওঁলোকৰ নিজা গৃহচহৰ বা নতুন ঠিকনালৈ যায় তেওঁলোকৰ বাবে।

এই ব্যৱস্থা ২০২৪ চনৰ অক্টোবৰত প্ৰথমে কৰ্ণাল, জম্মু আৰু শ্ৰীনগৰ অঞ্চলত প্ৰয়োগ কৰা হৈছিল। য'ত ৪৯,০০০ ই পি এছ পেঞ্চনাৰক প্ৰায় ১১ কোটি টকাৰ পেঞ্চন বিতৰণ কৰা হৈছিল। পৰৱৰ্তী সময়ত নৱেম্বৰত ২৪ টা অঞ্চলত এনে ব্যৱস্থা কাৰ্যকৰী কৰা হৈছিল। য'ত ৯.৩  লাখ পেঞ্চনাৰক ২১৩ কোটি টকাৰ পেঞ্চন বিতৰণ কৰা হৈছিল।

২০২৪ চনৰ ডিচেম্বৰত EPFO 'ৰ ১২২ টা পেঞ্চন বিতৰণ ক্ষেত্ৰত ৬৮ লাখ পেঞ্চনাৰক ১,৫৭০ কোটি টকাৰ পেঞ্চন বিতৰণ কৰা হৈছে।

এই ব্যৱস্থা সফল ৰূপায়ণৰ কথা ঘোষণা কৰি কেন্দ্ৰীয় মন্ত্ৰী মনসুখ মাণ্ডব্যয় কয়, " EPFO ৰ সকলো অঞ্চলতে CPPS ৰ সম্পূৰ্ণ ৰূপায়ণ এক ঐতিহাসিক মাইলৰ খুঁটি। এই পৰিৱৰ্তনশীল পদক্ষেপে দেশৰ যিকোনো বেংক, যিকোনো শাখাত পেঞ্চনদাতাসকলৰ বাবে পেঞ্চন সহজে লাভ কৰাত সহায় কৰিব। "

CPPS ৰ জৰিয়তে, শাৰীৰিক প্ৰমাণীকৰণৰ প্ৰক্ৰিয়া নাইকিয়া কৰা হৈছে। পেঞ্চন বিতৰণৰ প্ৰক্ৰিয়া সহজ আৰু স্বচ্ছ হৈ পৰিছে। ই হৈছে EPFO ৰ সেৱাৰ আধুনিকীকৰণৰ প্ৰতিফলন আৰু আমাৰ পেঞ্চনাৰসকলৰ বাবে অধিক দক্ষ, স্বচ্ছ আৰু সুবিধাজনক সেৱা নিশ্চিত কৰাৰ দিশত এক গুৰুত্বপূৰ্ণ পদক্ষেপ।