ডিজিটেল ডেস্ক: ম'বাইল ফোনটো আমাৰ প্ৰতিপলৰ বন্ধু।ম'বাইল নহ’লে যেন আমি আজি একোয়েই কৰিব নোৱাৰো।ম'বাইলটোক সুৰক্ষা দিবলৈ আমিবোৰে সাধাৰণতে এখন টেম্পাৰ্ড গ্লাছ আৰু ক’ভাৰ লগাওঁ। কিন্তু তাৰ পাছতো ফোনটো এশ শতাংশ সুৰক্ষিত নহয়। কেনেবাকৈ ফোনটো পৰিলে ভাঙি যোৱাৰ পূৰ্ণ সম্ভাৱনা থাকে।কিন্তু এতিয়া আৰু আপোনাৰ ফোনটোৰ সুৰক্ষাৰ বাবে চিন্তা কৰিব নালাগে। এতিয়া আপুনি বজাৰৰ পৰা ক্ৰয় কৰিব পাৰিব 'এয়াৰবেগ' থকা ম'বাইল ক’ভাৰ।
হয়, ছ’চিয়েল মেডিয়াত ভাইৰেল হোৱা শেহতীয়া এক ভিডিঅ’ দেখি বহুতেই হয়তো এতিয়া স্বস্তিৰ নিশ্বাস এৰিছে। @Vector নামৰ এটা ইনষ্টাগ্ৰাম একাউণ্টৰ পৰা এই ভিডিঅ’টো প’ষ্ট কৰা হৈছে।য’ত এয়াৰবেগ থকা এটা বিশেষ ফোন ক’ভাৰ দেখুওৱা হৈছে।ভিডিঅ’ত দেখা মতে সেই বিশেষ ভিডিঅ’ ক’ভাৰটো লগাই এজন যুৱকে তেওঁৰ ফোনটো ওপৰৰ পৰা পেলাই দিছে। কিন্তু ফোনটো মাটিত স্পৰ্শ কৰিবলৈ লোৱাৰ পূৰ্বেই এয়াৰবেগটো খোল খাই গৈ ফোনটোক সুৰক্ষিত কৰে।
ইনষ্টাগ্ৰামৰ লগতে সকলোবোৰ ছ'চিয়েল নেটৱৰ্কিং ছাইটত শ্বেয়াৰ হোৱা এই ভিডিঅ’টো বৰ্তমানলৈ প্ৰায় ৬০ নিযুত লোকে চাইছে আৰু স্বাভাৱিকভাৱেই প্ৰতিক্ৰিয়া প্ৰকাশ কৰিছে।সকলোয়ে কেৱল এই বিশেষ ফোনৰ ক’ভাৰটো কিনিবলৈ তৎপৰ হৈ পৰিছে। যাৰ বাবে ক’ভাৰটো ক’ত উপলব্ধ সেয়া জানিবলৈ বিচাৰিছে।উল্লেখ্য যে, একাংশই এই ক’ভাৰটো জীৱনৰ বাবেহে প্ৰয়োজন বুলি ধেমেলীয়াকৈ মন্তব্য কৰিছে।
