ডিজিটেল ডেস্ক: প্ৰতি বছৰে ৮ মাৰ্চত সমগ্ৰ বিশ্বজুৰি আন্তৰ্জাতিক নাৰী দিৱস পালন কৰা হয়।এই দিৱসত মূলতে পক্ষপাতমুক্ত এখন উন্নত সমাজ গঢ়ি তোলাৰ লক্ষ্যৰে লিংগ সমতাৰ বাৰ্তা প্ৰচাৰ কৰা হয়।বিশ্বৰ বেলেগ বেলেগ প্ৰান্তত নাৰী দিৱস উদযাপনৰ প্ৰধান লক্ষ্য বেলেগ বেলেগ যদিও মহিলাৰ সমান অধিকাৰ, মহিলাৰ বিৰুদ্ধে হিংসা আৰু উৎপীড়ন ৰোধ তথা নাৰীৰ প্ৰতি সন্মান আৰু শ্ৰদ্ধা জনোৱাই হৈছে এই দিৱস উদ্যাপনৰ মুখ্য বিষয়।
ইতিহাস
নাৰী দিৱস উদ্যাপনৰ লগত নাৰী শ্ৰমিকৰ অধিকাৰ আদায়ৰ সংগ্ৰামৰ ইতিহাস জড়িত হৈ আছে। ১৮৫৭ চনত মজুৰি বৈষম্য, কৰ্মঘণ্টা নিৰ্দিষ্ট কৰা, কামৰ অমানৱিক পৰিৱেশৰ বিৰুদ্ধে প্ৰতিবাদ জনাবলৈ মাৰ্কিন যুক্তৰাষ্ট্ৰৰ নিউয়ৰ্কৰ সূতা কাৰখানাৰ নাৰী শ্ৰমিক সকলে আন্দোলন কৰিছিল। সেই আন্দোলন চৰকাৰে কঠোৰ হাতেৰে দমন কৰিছিল। ১৯০৮ চনত নিউয়ৰ্কৰ সামাজিক গণতান্ত্ৰিক নাৰী সংগঠনে আয়োজিত কৰা নাৰী সমাবেশত জাৰ্মান সমাজতান্ত্ৰিক নেত্ৰী ক্লাৰা জেটকিনৰ নেতৃত্বত সৰ্বপ্ৰথম আন্তৰ্জাতিক নাৰী সন্মিলন অনুষ্ঠিত হৈছিল। ইয়াৰ পিছত ১৯১০ চনত ডেনমাৰ্কৰ কপেনহেগেনত অনুষ্ঠিত হয় দ্বিতীয় আন্তজাৰ্তিক নাৰী সন্মিলন। ১৭ খন দেশৰ পৰা ১০০ গৰাকী নাৰী প্ৰতিনিধিয়ে এই সন্মিলনত অংশগ্ৰহণ কৰিছিল। এই সন্মিলনতে ক্লাৰায়ে প্ৰতি বছৰে ৮ মাৰ্চত আন্তৰ্জাতিক নাৰী দিৱস হিচাপে পালন কৰাৰ প্ৰস্তাৱ দিয়ে। তাৰ ফলশ্ৰুতিত ১৯১১ চনৰ পৰা নাৰীসকলৰ সম-অধিকাৰ দিৱস হিচাপে এই দিনটো নাৰী দিৱস হিচাপে পালন কৰা হ’ল। ১৯১৪ চনৰ পৰা কেইবাখনো দেশত এই দিনটো নাৰী দিৱস হিচাপে পালন কৰিবলৈ আৰম্ভ কৰে।উল্লেখ্য যে, ১৯৭৫ চনৰ ৮ মাৰ্চত ৰাষ্ট্ৰসংঘই প্ৰথমবাৰৰ বাবে আনুষ্ঠানিকভাৱে আন্তঃৰাষ্ট্ৰীয় মহিলা দিৱস পালন কৰে।
এই বৰ্ষৰ বিষয়বস্তু
ৰাষ্ট্ৰসংঘই লিংগ সমস্যাবোৰ পোহৰলৈ অনাত প্ৰযুক্তিৰ প্ৰভাৱ সন্দৰ্ভত গুৰুত্ব আৰোপ কৰিবলৈ এই বছৰৰ নাৰী দিৱস উদযাপনৰ বিষয়বস্তু ‘ডিজিটেল : লিংগ সমতাৰ বাবে উদ্ভাৱন আৰু প্ৰযুক্তি’ বুলি ঘোষণা কৰিছে।
ডিজিটেল প্ৰযুক্তিৰ বিষয়ে মহিলাসকল কিমান জ্ঞাত ?
-আন্তৰ্জাতিক দূৰসংযোগ সংঘৰ (আইটিইউ) প্ৰতিবেদন অনুসৰি, ২০২২ চনলৈকে মাত্ৰ ৬৩ শতাংশ মহিলাইহে ইণ্টাৰনেট ব্যৱহাৰ কৰে, যি পুৰুষৰ তুলনাত তেনেই কম।
- বিশ্ব অৰ্থনৈতিক মঞ্চৰ (ডব্লিউইএফ) প্ৰতিবেদনত কোৱা হৈছে যে ২০৫০ চনৰ ভিতৰত ৭৫শতাংশ চাকৰিয়েই বিজ্ঞান, প্ৰযুক্তি, অভিযান্ত্ৰিক আৰু গণিত ক্ষেত্ৰৰ সৈতে সম্পৰ্কিত হ'ব। কিন্তু এই ক্ষেত্ৰসমূহত মহিলাৰ অংশগ্ৰহণ যথেষ্ট কম।
-২০২২ চনত জেণ্ডাৰ স্নেপশ্বট প্ৰতিবেদন অনুসৰি, ৫১ খন দেশৰ এক অধ্যয়নত প্ৰকাশ পাইছে যে ৩৮ শতাংশ মহিলাই ব্যক্তিগতভাৱে অনলাইন হিংসাৰ সন্মুখীন হৈছিল।
ইউনেস্ক’ৰ বাৰ্তা
ইউনেস্ক’ৰ সঞ্চালক প্ৰধান অড্ৰে আজোলে এই বছৰৰ আন্তৰ্জাতিক মহিলা দিৱসৰ বাবে তেওঁৰ বাৰ্তাত কৈছে যে প্ৰযুক্তিগত পৰিৱৰ্তনৰ দ্বাৰা প্ৰদান কৰা সুযোগৰ পৰা মহিলা আৰু ছোৱালীসকল উপকৃত হোৱাটো নিশ্চিত কৰাৰ প্ৰয়োজন আছে। তেওঁ লগতে কয় যে, এইবাৰ নাৰী দিৱসত "লিংগ সমতাৰ বাবে উদ্ভাৱন আৰু প্ৰযুক্তি"ৰ সন্দৰ্ভত গুৰুত্ব দিয়া হ'ব।
প্ৰতিগৰাকী নাৰীক এইদৰে জনাওঁক শুভেচ্ছা
শক্তিশালী, বুদ্ধিমান, প্ৰতিভাশালী মহিলাসকলক নাৰী দিৱসৰ শুভেচ্ছা ! আপুনি সঁচাকৈয়ে শ্ৰদ্ধা আৰু প্ৰশংসাৰ পাত্ৰ।
পৃথিৱীৰ সকলো মহিলাৰ বাবে কেৱল আজিই নহয়, প্ৰতিটো দিনেই জিলিকি উঠক। নাৰী দিৱসৰ শুভেচ্ছা জনালো।
এগৰাকী মহিলা হোৱাটো নিজেই এক মহাশক্তি। মোৰ জীৱনৰ ‘ছুপাৰহিৰো’ গৰাকীলৈ নাৰী দিৱসৰ শুভেচ্ছা !
মহিলা অবিহনে আমাৰ পৃথিৱীৰ অৰ্থহীন একো নহ'ব।নাৰী দিৱসৰ শুভেচ্ছা !
ৰাণীৰ দৰে চিন্তা কৰক। এগৰাকী ৰাণীয়ে বিফল হ'বলৈ ভয় নকৰে। বিফলতা হৈছে মহানতাৰ আন এটা পদক্ষেপ।নাৰী দিৱসৰ শুভেচ্ছা জনালো।
শুভ আন্তৰ্জাতিক নাৰী দিৱস। এগৰাকী মহিলা হিচাপে জন্ম লৈ গৌৰৱান্বিত হওঁক।
এই দিনটো আপোনাৰ। আপুনি সমৃদ্ধ হওঁক আৰু জীৱনত সকলো সুখ লাভ কৰক। শুভ আন্তৰ্জাতিক নাৰী দিৱস।
