বিশিষ্ট শিক্ষাবিদ, সংগীতজ্ঞ, নাট্য শিল্পী সত্যকৃষ্ণ মিশ্ৰৰ দেহাৱসান

ডিজিটেল ডেস্কঃ বিশিষ্ট শিক্ষাবিদ, শাস্ত্ৰীয় সংগীতজ্ঞ, সুদক্ষ বেহেলা বাদক, ক্ৰীড়াবিদ, নাট্য শিল্পী আৰু সমাজ সংগঠক সত্যকৃষ্ণ মিশ্ৰৰ দেহাৱসানত গভীৰ শোক প্ৰকাশ কৰিছে প্ৰাক্তন সাংসদ কুমাৰ দীপক দাসে। সোমবাৰে পুৱা ৮.৪৬ বজাত শেষ নিশ্বাস ত্যাগ কৰে বিশিষ্ট শিক্ষাবিদ গৰাকীয়ে। তেখেতৰ বিয়োগত সমগ্ৰ বৰপেটা জিলাৰ লগতে সাংস্কৃতিক জগতত পৰিছে গভীৰ শোকৰ ছাঁ ।

সত্যকৃষ্ণ মিশ্ৰই শিক্ষকৰূপে বৰপেটা বিদ্যাপীঠত দীঘলীয়া সময় ধৰি সেৱা আগবঢ়াইছিল। শাস্ত্ৰীয় সংগীতৰ প্ৰচাৰ আৰু প্ৰসাৰত মিশ্ৰৰ অৱদান অনস্বীকাৰ্য। আনহাতে, বেহেলা বাদনত তেখেতৰ নিপুণতাই বহু অনুৰাগীক অনুপ্ৰাণিত কৰিছিল। ইফালে, সত্যকৃষ্ণ মিশ্ৰ এজন সুদক্ষ ফুটবল আৰু ভলীবল খেলুৱৈ হিচাপেও পৰিচিত আছিল। লগতে নাট্যক্ষেত্ৰতো তেওঁৰ সক্ৰিয় উপস্থিতি বৰপেটাৰ ঐতিহাসিক মিলন মন্দিৰ আৰু ফুকন ৰঙমঞ্চত লক্ষ্য কৰা গৈছিল। 

অসম চৰকাৰৰ শিল্পী পেঞ্চন লাভ কৰা সত্যকৃষ্ণ মিশ্ৰক ‘বৰপেটা ৰত্ন’, ‘বৰপেটা শিৰোমণি বঁটা’, ‘হাউলী বঁটা’, আৰু ‘পুৰুষোত্তম দাস সোঁৱৰণী বঁটা’ আদি বিভিন্ন সন্মান প্ৰদান কৰা হৈছিল।

ইফালে, অসম আন্দোলনৰ সময়ত তেখেত এগৰাকী জ্যেষ্ঠ পৰামৰ্শ দাতা হিচাপে গুৰুত্বপূর্ণ ভূমিকা গ্ৰহণ কৰিছিল। শিক্ষাবিদ গৰাকীৰ মৃত্যুত শ্ৰদ্ধাঞ্জলি জ্ঞাপন কৰাৰ লগতে পৰিয়াললৈ গভীৰ সমবেদনা জ্ঞাপন কৰে কুমাৰ দীপক দাসে।