ডিজিটেল ডেস্ক : বিভিন্ন ধৰণৰ অপৰাধমূলক ঘটনাৰ বাবে কুখ্যাত দক্ষিণ আমেৰিকা মহাদেশৰ প্ৰায় সমূহ দেশেই । মহাদেশখনৰ মেক্সিকোও ব্যতিক্ৰম নহয় এই অপৰাধ প্ৰৱণতাৰ পৰা । সঘনেই হত্যা, ড্ৰাগছ, চুৰি কাণ্ড আদিৰ সমস্যাত ভূগি থকা দেশখনত এইবাৰ সংঘটিত হ'ল আন এক চাঞ্চল্যকৰ ঘটনা । মেক্সিকোৰ চান মিগুৱেল ট'ট'লাপান চহৰৰ চিটি হলৰ সন্মুখত থকা জন সমাৱেশলৈ লক্ষ্য কৰি দুৰ্বৃত্তই গুলীবৰ্ষণ কৰা ঘটনাত মৃত্যু হৈছে ১৮ জনকৈ ব্যক্তিৰ । এই ১৮ জন ব্যক্তিৰ মাজত আছে চহৰ খনৰ মেয়ৰ আৰু এটি ১২ বছৰীয়া শিশু ।
এই সমগ্ৰ ঘটনাটো এক সংগঠিত অপৰাধৰ সৈতে জড়িত বুলি সন্দেহ কৰিছে মেক্সিকান আৰক্ষীয়ে ।
এই সন্দৰ্ভত দেশখনৰ গুৰেৰ' ৰাজ্যৰ ৰাজ্যপাল এভেলীন চালগাডো পিনেডাই গভীৰ শোক প্ৰকাশ কৰি কয় যে, দোষীৰ বিৰুদ্ধে কঠোৰ স্থিতি অৱলম্বন কৰিব আৰক্ষীয়ে । আৰু ৰাজ্যখনৰ নাগৰিকৰ সুৰক্ষাৰ ক্ষেত্ৰত কেতিয়াও আপোচ নকৰে মেক্সিকো আৰক্ষীয়ে ।
উল্লেখ্য যে, মুদ্ৰাস্ফীতি, অৰ্থনৈতিক সংকট আদিয়ে জুৰুলা কৰি পেলোৱা মেক্সিকোত অপৰাধৰ হাৰ আন ৰাষ্ট্ৰৰ তুলনাত যথেষ্ট বেছি । ইয়াৰ ওপৰিও ড্ৰাগছৰ ঘাটিলৈ পৰিৱৰ্তিত হোৱা মেক্সিকো সন্দৰ্ভত নিমাত বিশ্বৰ সকলো সংগঠনো ।
