কবিতা ৬৬/ বৃদ্ধা মাতৃৰ অনুৰোধ

তই ক’ত আছ বোপাই…!/তোলৈ আৰু কিমান আশাৰে/পদূলি মূৰত হাতত টিপচাকি লৈ/সন্ধিয়া বাট চাম তই আহিবি আহিবি বুলি৷
কবিতা
কবিতা

ৰাজু বণিয়া

তই ক’ত আছ বোপাই…!

তোলৈ আৰু কিমান আশাৰে

পদূলি মূৰত হাতত টিপচাকি লৈ

সন্ধিয়া বাট চাম তই আহিবি আহিবি বুলি ৷

নোৱাৰিছো আৰু ভাগৰি পৰিছোঁ৷

তোলৈ বুলি বাট চাই চাই…!

তোলৈ বুলি বঢ়া ভাত পুৱা

দেউতাৰৰ মৰমৰ কালুটোয়ে খায়৷

তই আহিবি বুলি পদূলি মূখলৈ যাওঁতে যাওঁতে

ঠন ধৰি উঠা চোতালৰ দুৱৰি বন মৰহি গৈছে৷

কিন্ত,তই আহিয়ে নাপালিহি…!

আজি টিপচাকিটো তেল শেষ হ’ল

আৰু মোৰ দেহৰো এলাহ হ’ল৷

তই আহিবি বুলি আৰু আজি-কালি

পদূলি মূৰত আৰু ৰৈ বাট চাই নাথাকোঁ৷

মাত্ৰ কেইদিনমানৰ পাছত পুনৰ মৰহি যোৱা

চোতালৰ দুৱৰি বনে ঠন ধৰি উঠিব৷

গাওঁৰ মানুহবোৰে নিশা ন দহ বজালৈকে

মিনতি ঘৰৰ পদূলি মূৰত আৰু কেতিয়াও

টিপচাকি পোহৰ নেদেখিব…!

আপোন ঘৰখনৰ চৌপাশে আন্ধাৰে আৱৰি ধৰিব৷

বাটৰ মানুহবোৰে ভয় কৰিব ভূতৰ বাংলা বুলি৷

শত্ৰুয়ে হাঁহিব আৰু মিত্ৰয়ে কান্দিব৷

মই আছো বাবে আছে মোৰ আপোন ঘৰখন৷

তই ক’ত আছ বোপাই…!

তোক মই অনুৰোধ কৰিছোঁ৷

তই মোক একো দিব নালাগে

মাথোঁ এবাৰ মোৰ কাষলৈ আহ্৷

তই মোক নাচাবি লাগিলে ৰুমালেৰে ঢাকি আহিবি

তোৰ সেই পকা আপেলৰ দৰে মূখখনি৷

তই মোক মা বুলিও নালাগে মাতিব৷

মাথোঁ এবাৰ আহ্ মোৰ কাষলৈ৷

বেলিটি ডুবাৰ আগতে তোৰ সেয় কোমল হাতখনি

শেষ বাৰৰ বাবে স্পৰ্শ কৰি যাওঁ৷

আকৌ কেতিয়া আহিম বা ঘূৰি৷

Related Stories

No stories found.
Code:
logo
Asomiya Pratidin
www.asomiyapratidin.in