/asomiyapratidin/media/post_attachments/asomiyapratidin/import/website/2021/12/43e8781e-d687-4621-924a-81a40166e703.jpg)
ডিজিটেল সংবাদ , নগাঁও : ৰূপকোঁৱৰ জ্যোতি প্ৰসাদ আগৰৱালাৰ ওপৰত গবেষণামূলক এখনি গ্ৰন্হ বুধবাৰে নগাঁও প্ৰেছ ক্লাবত উন্মোচিত হয় ৷ চাৰিবছৰীয়া গবেষণাৰ অন্তত গ্ৰন্হ খনি ৰচনা কৰি উলিয়াইছে নগাঁৱৰ পাৰ্থজিৎ বৰুৱাই ৷ কঠোৰ পৰিশ্ৰমৰ অন্তত চলচিত্ৰ সমালোচক , চুটি ছবিৰ নিৰ্মাতা , লেখক পাৰ্থজিৎ বৰুৱাই ৰচনা কৰা ইংৰাজী ভাষাৰ "জ্যোতিপ্ৰসাদ , জয়মতী , ইন্দ্ৰমালতী এণ্ড বিয়ন্দ হিষ্টৰী অফ আচামিছ চিনেমা ' শীৰ্ষক গ্ৰন্হখন উন্মোচন কৰে ৰূপকোঁৱৰৰ কন্যা সত্যশ্ৰী আগৰৱালা দাসে ৷
প্ৰাঞ্জল কুমাৰ মহন্তই আত ধৰা গ্ৰন্হ উন্মোচনী সভা খনত ড° সুব্ৰত জ্যোতি নেওগ , অৰূপ মান্না , কৃষ্ণ দুলাল বৰুৱা , শিবানন্দ কাকতী আদি উপস্হিত থাকে ৷ নগাঁৱৰ ক্ৰান্তিকাল প্ৰকাশনে প্ৰকাশ কৰা গ্ৰন্হখনৰ বাবে সমল বিচাৰি লেখক পাৰ্থজিৎ বৰুৱা স্কটলেণ্ডলৈকো গৈছিল ৷ স্কটলেণ্ডৰ এডিনবড়া বিশ্ববিদ্যালয়লৰ পৰা গ্লাছগোলৈকে গৈ জ্যোতিপ্ৰসাদ আগৰৱালাই বিদেশত পাৰ কৰা সময়ৰ ওপৰত লেখকে অধ্যয়ন কৰিছিল ৷ ইংৰাজী ভাষাৰ গ্ৰন্হখনত ৰূপকোঁৱৰৰ ওপৰত ন ন তথ্য সন্নিবিষ্ট হৈছে ৷