‘প্ৰিয়বন্ধু’ উন্মোচন কৰি তিলক চন্দ্ৰ মজুমদাৰে ক’লে- শিশু আলোচনীৰ জন্ম ঠাই নগাঁও…

ডিজিটেল সংবাদ ,নগাঁও : নগাঁৱত শুক্ৰবাৰে "প্ৰিয়বন্ধু" নামৰ এখন শিশু আলোচনী উন্মোচন হয়।শংকৰী সাহিত্যৰ গৱেষক তিলক চন্দ্ৰ মজুমদাৰৰ বাসগৃহ "সাঁচিপাত"ৰ চোতালত অনুষ্ঠিত এখন সভাত শিশু আলোচনীখন উন্মোচন হয়। সভাত প্ৰিয়বন্ধু উন্মোচন কৰি বৰ্ষীয়ান সাহিত্যিক, তথা শংকৰী সাহিত্যৰ গৱেষক তিলক চন্দ্ৰ মজুমদাৰে কয় যে- "শিশু আলোচনীৰ জন্ম ঠাই নগাঁও।

এই নগাঁও জিলাৰ পৰাই ১৮৮৮ চনত কৰুণাভিৰাম বৰুৱাৰ সম্পাদনাত প্ৰথম শিশু আলোচনী "ল'ৰাবন্ধু" প্ৰকাশ হৈছিল।" আন এগৰাকী উন্মোচক শিশু সাহিত্যিক নুপুৰ মোমাইদেউ হিচাপে পৰিচিত ত্ৰৈলোক্য ভট্টাচাৰ্যই কয় যে- 'শিশুসকল হ'ল দেশৰ ভৱিষ্যত। শিশুসকলক সঠিক বাটৰ সন্ধান দিয়াৰ দায়িত্ব অভিভাৱকসকলৰ। কোন বাটে বাট বুলিব সেয়া নিৰ্ধাৰণ সঠিক হ'লেই শিশু এটিয়ে নিজকে সঠিক পথত পোনাই লৈ যাবলৈ সহজ হয় । "প্ৰিয়বন্ধু"ৰ দৰে আলোচনীয়ে তেনে বাটৰ সন্ধানে দিয়ে ।

উল্লেখযোগ্য যে 'প্ৰিয়বন্ধু' নামৰ শিশু আলোচনীখনৰ সম্পাদিকা হৈছে কাৰুণ্য ভট্টাচাৰ্য। শিশুবন্ধু দুলাল বৰাই আঁত ধৰা গ্ৰন্থ উন্মোচনী সভাখনত মহিলা নাট্যকাৰ-পৰিচালক, অভিনেতা তথা শিশু সাহিত্যিক গুণদা গোস্বামী, শ্ৰীমন্ত শঙ্কৰদেৱ সঙ্ঘৰ সেৱাবাহিনীৰ সংস্কৃতি উপ সচিব কৃষ্ণ কিংকৰ খাটনিয়াৰ, নগাঁও কবি সন্মিলনৰ উপ-সভাপতি আশোকৰাম ভট্টাচাৰ্য, সমাজকৰ্মী নীলাৰ্ণৱ কলিতা উপস্থিত থাকে। নগাঁও জিলাৰ লেখিকা সংস্থাৰ সভানেত্ৰী তথা লেখিকা উপমা মজুমদাৰে সভাৰ শেষত শলাগৰ শৰাই আগবঢ়াই।