এটা দশকত ৫৪.৮১% লৈ বৃদ্ধি ভাৰতীয় স্নাতক নিয়োগযোগ্যতা

ডিজিটেল ডেস্কঃ সমগ্ৰ বিশ্বতে দক্ষ পেছাদাৰীৰ চাহিদা বৃদ্ধি পোৱাৰ মাজতে চৰকাৰে গ্ৰহণ কৰা বিভিন্ন দক্ষতা বিকাশৰ পদক্ষেপৰ বাবে ভাৰতীয় স্নাতকসকলৰ নিয়োগযোগ্যতা বৃদ্ধি পাইছে। শনিবাৰে কেন্দ্ৰীয় ক্ৰীড়া আৰু যুৱ পৰিক্ৰমা মন্ত্ৰী মানসুখ মাণ্ডবিয়াই প্ৰকাশ কৰা তথ্য অনুসৰি ২০২৪ চনত নিয়োগযোগ্যতা ৫৪.৮১ শতাংশলৈ যথেষ্ট বৃদ্ধি পাইছে। 

উল্লেখ্য যে, ২০১৩ চনত নিয়োগযোগ্যতা ৩৩.৯৫ শতাংশ আছিল। মাণ্ডবিয়াই গান্ধীনগৰত বহুখণ্ডীয় কাৰিকৰী আৰু অৰ্থনৈতিক সহযোগিতাৰ বাবে বে অফ বেংগল ইনিচিয়েটিভ (বিমষ্টেক) যুৱ সন্মিলন উদ্বোধন কৰি এই তথ্য প্ৰকাশ কৰে। 

বিমষ্টেক যুৱ সন্মিলনৰ প্ৰধান উদ্দেশ্য হৈছে সদস্য দেশসমূহৰ মাজত অভিজ্ঞতাৰ আদান-প্ৰদান কৰা আৰু যুৱক-যুৱতীৰ নেতৃত্বত লোৱা পদক্ষেপসমূহৰ সুবিধা প্ৰদান কৰা। বিমষ্টেক সংস্থাৰ সদস্য দেশ সমূহ ক্ৰমে ভাৰত, বাংলাদেশ, ভূটান, ম্যানমাৰ, নেপাল, শ্ৰীলংকা, আৰু থাইলেণ্ড ।

তেওঁ কয় যে, দক্ষ পেছাদাৰীৰ বিশ্বব্যাপী চাহিদা বৃদ্ধিৰ মাজতে ভাৰতে দক্ষতাৰ ব্যৱধান দূৰ কৰাৰ বাবে বিভিন্ন পদক্ষেপ গ্ৰহণ কৰিছে, য’ত ১.৫ কোটিৰো অধিক যুৱক-যুৱতীয়ে এআই, ৰবটিক্স আৰু ডিজিটেল প্ৰযুক্তিৰ প্ৰশিক্ষণ লাভ কৰিছে।

সহযোগিতা, অভিজ্ঞতাৰ আদান-প্ৰদান আৰু যুৱ-নেতৃত্বাধীন উন্নয়ন ত্বৰান্বিত কৰাৰ বাবে বিমষ্টেক যুৱ সন্মিলনখনৰ আয়োজন কৰা হৈছে। বিমষ্টেক কেৱল চৰকাৰসমূহে একেলগে কাম কৰাটোৱেই নহয়, ই মানুহক সংযোগ কৰা, যুৱক-যুৱতীসকলক সবলীকৰণ কৰা আৰু ভৱিষ্যত গঢ়াৰ ক্ষেত্ৰতো ই পদক্ষেপ গ্ৰহণ কৰিব বুলি মাণ্ডাভিয়াই উল্লেখ কৰে।