অসম, ত্ৰিপুৰা আৰু পশ্চিম বংগক বাংলাদেশত অন্তৰ্ভুক্ত কৰাৰ দাবী...

ডিজিটেল ডেস্কঃ শেহতীয়াকৈ অসম, ত্ৰিপুৰা আৰু পশ্চিম বংগক বাংলাদেশত অন্তৰ্ভুক্ত কৰাৰ দাবী তুলিছে বাংলাদেশ চৰকাৰৰ এগৰাকী উপদেষ্টাই। এই প্ৰসংগটো পোহৰলৈ অহাৰ পাছতে দেশজুৰি চৰ্চিত হৈছে বিষয়টো। বাংলাদেশৰ অন্তৱৰ্তীকালীন চৰকাৰৰ অন্যতম উপদেষ্টা মাহফুজ আলমে পশ্চিম বংগ, অসম আৰু ত্ৰিপুৰাক বাংলাদেশত অন্তৰ্ভুক্ত কৰাৰ দাবী উত্থাপন কৰিছিল। 

অৱশ্যে এটা কথা জনা উচিত যে, সময়ে সময়ে এনে আজৱ দাবী উত্থাপিত হৈ আহিছে।  বাংলাদেশৰ সৈতে অসম, ত্ৰিপুৰা আৰু পশ্চিম বংগৰ কিছু অংশ অন্তৰ্ভুক্ত কৰাৰ দাবী নতুন নহয়। মাজে মাজে বাংলাদেশৰ নেতাসকলে এই দাবী উত্থাপন কৰি থাকে। ব্ৰিটিছৰ দিনতো সেই অঞ্চলৰ নেতাসকলে প্ৰায়েই কৈছিল যে অসম, ত্ৰিপুৰা আৰু বাংলাদেশ সেই অঞ্চলৰ মানুহৰ প্ৰাকৃতিক বাসস্থান। 

দেশ বিভাজনৰ সময়ত অসমক পূৰ্বৰ পূব পাকিস্তানত অন্তৰ্ভুক্ত কৰাৰ প্ৰয়াস চলিছিল। কিন্তু সেইটোৰ তীব্ৰ বিৰোধিতা কৰিছিল অসমৰ নেতাসকলে আৰু তেনেকৈয়ে ৰক্ষা পৰিছিল  অসম।  সেই সময়ত নগা যুৱক-যুৱতীসকলেও অসমৰ মানুহৰ সৈতে হাত মিলাই ৰাজ্যখন বাংলাদেশত অন্তৰ্ভুক্ত হোৱাৰ পৰা ৰক্ষা কৰিছিল। 

বংগৰ ক্ষেত্ৰত স্বাধীনতাৰ পূৰ্বে দুখন বিধান মণ্ডল আছিল । বিভাজনৰ সময়ত পূব বংগ বিধানসভাই পূব পাকিস্তানৰ সৈতে থকাৰ বাবে ভোটদান কৰিছিল আনহাতে পশ্চিম বংগ বিধানসভাই ১৯৪৭ চনৰ জুন মাহত ভাৰতৰ সৈতে থাকিবলৈ প্ৰস্তাৱ গৃহীত কৰিছিল। সেইটো সৰ্বসন্মতিক্ৰমে লোৱা সিদ্ধান্ত নাছিল কিয়নো দুই এজন বিধায়কে পূব পাকিস্তানত যোগদান কৰিব বিচাৰিছিল যদিও সংখ্যাগৰিষ্ঠই ভাৰতত থাকিব বিচাৰিছিল আৰু প্ৰস্তাৱ গৃহীত হৈছিল। 

দেশ বিভাজনৰ পাছতো বুদ্ধিজীৱীকে ধৰি পূব পাকিস্তানৰ নেতাসকলে প্ৰায়ে এই বিষয়টো উত্থাপন কৰিছিল যে অসম, ত্ৰিপুৰা আৰু পশ্চিম বংগ পূব পাকিস্তানৰ অংশ হ’ব লাগে। আনকি শ্বেইখ মজিবুৰ ৰহমানৰ দৰে ব্যক্তিয়েও কেইবাবাৰো এই দাবী উত্থাপন কৰিছিল। কিন্তু ভাৰতৰ সহায়ত বাংলাদেশ স্বাধীন হোৱাৰ পাছত আৰু তেওঁ বাংলাদেশৰ প্রথম প্রধানমন্ত্রী হোৱাৰ পাছত এই বিষয়টো উত্থাপন কৰা বন্ধ কৰিছিল।