চতিয়াত গড় হত্যাৰ সৈতে জড়িত ৩ চিকাৰী আটক

ডিজিটেল সংবাদ,জামুগুৰিহাটঃ চতিয়া আৰক্ষী থানাৰ ভাৰপ্ৰাপ্ত বিষয়া ভোলা বৰা আৰু বিশ্বনাথৰ আৰক্ষী অধীক্ষৰ নেতৃত্বত এক অভিযানকাৰী দলে শুকুৰবাৰে নিশা চতিয়াৰ দক্ষিণাঞ্চলৰ বোকাবিলত তিনি গড় চিকাৰীক আটক কৰিবলৈ সক্ষম হয় ৷ এই বিশেষ অভিযানত আৰক্ষীয়ে বোকাবিলৰ আবুল তাহিৰ, ঢেকিয়াজুলিৰ গড়মৰা পথাৰৰ আবু তাহেৰ আৰু জিনিজিয়াৰ চিলামৰাৰ মকতুল হুছেইনক আটক কৰিবলৈ সক্ষম হয়৷

উল্লেখ্য যে, আৰক্ষীৰ গোপন অনুসন্ধানত এইসকলৰ গতিবিধি লক্ষ্য কৰি পুনৰ গড় হত্যাৰ পৰিকল্পনাৰ তথ্য লাভ কৰি তিনিগৰাকীক আটক কৰে ৷ সম্প্ৰতি তিনিওকে জেৰাৰ অন্তত আৰক্ষীয়ে এন গোচৰৰ ভিত্তিত গ্ৰেপ্তাৰ কৰি জেল হাজোতলৈ প্ৰেৰণ কৰিছে ৷ এই তথ্যৰ ভিত্তিত বিগত সময়ত আন ৭ গৰাকী অভিযুক্তক আটক কৰি জেল হাজোতলৈ প্ৰেৰণ কৰা হৈছিল৷