২০২৬ত ৩৬টা সমষ্টিত প্ৰাৰ্থিত্ব দিব অখিল গগৈৰ ৰাইজৰ দলে!

ডিজিটেল ডেস্কঃ বিৰোধীৰ মিত্ৰতাৰ কুচকাৱাজৰ মাজতে অকলেই ২০২৬ ৰ বিধানসভা নির্বাচনলৈ সাজু হৈছে ৰাইজৰ দল। শিৱসাগৰৰ বিধায়ক অখিল গগৈ নেতৃত্বাধীন দলটোৱে আগত বিধানসভা নির্বাচনত অৱতীৰ্ণ হ'বলৈ ইতিমধ্যে প্রস্তুত কৰিছে ৩৬ জনীয়া সম্ভাব্য প্রার্থী তালিকা।

উজনি অসম, উত্তৰ অসম তথা মধ্য অসমৰ বিশটা সমষ্টি আৰু নামনি অসম, বৰাক উপত্যকাৰ যোল্পটা সমষ্টিত ভোটযুদ্ধত অৱতীৰ্ণ হ'বলৈ দলটোৱে কঁকালত টঙালি বান্ধিছে। ৰাজ্যৰ বিশিষ্ট বুদ্ধিজীৱী ড° হীৰেন গোহাঁইকে ধৰি কেইবাগৰাকীও বিশিষ্ট নাগৰিকে ২০২৬ ত বিজেপিক প্রতিহত কৰাৰ স্বাৰ্থত বিৰোধী দলবোৰৰ মিত্ৰতাৰ বাবে প্রচেষ্টা চলাই থকাৰ মাজতে ৰাইজৰ দলৰ সম্ভাব্য প্রার্থী তালিকাই বহন কৰিছে তাৎপর্য।

লক্ষণীয়ভাবে বিৰোধী দলসমূহৰ মিত্ৰতাৰ বাবে বিগত সময়ছোৱাত বিভিন্ন প্রচেষ্টা চলিছে। মিত্ৰতাৰ ক্ষেত্ৰত অধিক সক্রিয় ভূমিকা গ্রহণ কৰি আহিছিল ৰাইজৰ দলৰ সভাপতি অখিল গগৈয়ে। বিগত লোকসভা নির্বাচনত বিজেপিক প্ৰতিৰোধৰ স্বাৰ্থত ৰাইজৰ দলে এজনো প্রার্থী থিয় কৰোৱা নাছিল। তাৰ পৰৱৰ্তী সময়ত বিৰোধীৰ মিত্ৰতাক লৈ বহু আলোচনা-বিলোচনা হৈছে। অনুষ্ঠিত হৈছে বৈঠকৰ পিচত বৈঠক।

লগে লগে অখিল গগৈ আৰু কংগ্ৰেছৰ একাংশ নেতাৰ মাজত দেখা গৈছে বোকা ছটিওৱাৰ ৰাজনীতিও। ভিন্ন সময়ত দুয়োপক্ষই পৰস্পৰবিৰোধী মন্তব্যৰে বিৰোধীৰ মিত্ৰতাৰ বিষয়টোক জটিলৰ পৰা জটিলতৰ মাজলৈ ঠেলি দিছে। মুঠৰ ওপৰত ২০২৬ ৰ বিধানসভা নির্বাচনলৈ মাজত মাথোঁ আঠটা মাহ বাকী থকা অৱস্থাটো মিত্ৰতাৰ বিষয়টোৱে সঠিক গতি লাভ কৰা নাই।

ৰাইজৰ দলে অভিযোগ কৰি আহিছে যে প্রধান বিৰোধী দল কংগ্ৰেছৰ ফালৰ পৰা বিৰোধীৰ মিত্ৰতাৰ বিষয়টোত আশাব্যঞ্জক সঁহাৰি লাভ কৰা হোৱা নাই। তাৰ মাজতে ড° হীৰেন গোহাঁই আৰু কেইবাগৰাকীও বিশিষ্ট নাগৰিকে বিৰোধীক ঐক্যবদ্ধ কৰিবলৈ প্ৰচেষ্টা অব্যাহত ৰাখিছে। সময়ে সময়ে দলসমূহৰ মাজত অনুষ্ঠিত হৈছে বৈঠকো। অৱশ্যে এতিয়ালৈ মিত্রতা সন্দর্ভত কোনো স্পষ্ট সমাধানসূত্র প্রকাশ হোৱা নাই। এনে সময়তে শেহতীয়াকৈ ভাইৰেল হৈ পৰিছে ৰাইজৰ দলৰ সম্ভাব্য তালিকা।

এই তালিকা অনুসৰি অখিল গগৈয়ে ২০২৬ তো শিৱসাগৰ সমষ্টিতে প্রতিদ্বন্দ্বিতা আগবঢ়াব। ৰাইজৰ দলৰ কাৰ্যকৰী সভাপতি ভাস্কো ডি শইকীয়াই সৰুপথাৰত আৰু কবীন্দ্র চেতিয়া ফুকনে টীয়ক সমষ্টিত প্রতিদ্বন্দ্বিতা আগবঢ়াবলৈ কুচকাৱাজ আৰম্ভ কৰিছে। আনহাতে ছমৰীয়াত ৰাইজৰ দলৰ সম্ভাব্য প্রার্থীৰূপে প্রক্ষেপিত হৈছে দলটোৰ সাধাৰণ সম্পাদক ৰাছেল হুছেইন।

তালিকা অনুসৰি মাৰ্ঘেৰিটাত ৰাহুল চেত্রী, ডিগবৈত লক্ষ্যজ্যোতি গগৈ, শদিয়াত যুধিষ্ঠিৰ গগৈ, নাহৰকটীয়াত চিন্ময় বৰা, দুলীয়াজানত অৰুণা বৰা, খোৱাঙত জয়দীপ মালী, মাহমৰাত ড° ভবেন মহন, ডিমৌত ধৈর্য কোঁৱৰ, নাজিৰাত মানস কোঁৱৰ, মৰিয়নীত দেৱাংগ সৌৰভ গগৈ, দেৰগাঁৱত প্রবীণ দাস, বোকাখাতত ৰতন দাৱ, চিচিবৰগাঁৱত সম্ভাব্য প্রার্থীৰূপে তালিকাভুক্ত হৈছে বীৰেন্দ্ৰ গগৈ আৰু নৱজিৎ গগৈ।

একেদৰে ধেমাজিত বাবুল সোনোৱাল, নাওবৈচাত ডাঃ হৰিকান্ত দাস, তেজপুৰত ঋষিৰাজ কৈণ্ডিণ্য, বৰছলাত অলক নাথ, ধিঙত মেহবুব মুকতাৰ, বঢ়মপুৰত ৰাজু বৰা, দিছপুৰত ৰমেন বৰঠাকুৰ, গোৱালপাৰা পূবত এছ আই চৌধুৰী আৰু নূৰ আলম, জলেশ্বৰত ছান আলী মিঞা, বীৰসিং জৰুৱাত মুছলেমউদ্দিন চৌধুৰী, গৌৰীপুৰত জামাল হক আৰু আবুল মিঞা, মন্দিয়াত আশ্রাফুল ইছলাম, পাকা বেতবাৰীত ডাঃ আলী হুছেইন আৰু মণিৰুজ জামান, চেঙাত কাজী নাজিমুল হক, অভয়াপুৰীত মহিদুৰ বয়, মানাহত অঞ্জন তালুকদাৰ, ৰঙিয়াত গোপাল কাকতি, দলগাঁৱত আজিজুৰ ৰহমান, আলগাপুৰ কাটলিচেৰাত তহিৰুদ্দিন লস্কৰৰ নাম সম্ভাব্য প্রার্থী তালিকাত অন্তর্ভুক্ত হৈছে। লক্ষণীয়ভাবে ভাইৰেল হোৱা তালিকাখনক লৈ ৰাইজৰ দলৰ ফালৰ পৰা এতিয়াও কোনো আনুষ্ঠানিক বিবৃতি প্রকাশ কৰা নাই।

অৱশ্যে দলটোৰ এটা সূত্ৰৰ অনুসৰি অনাগত সময়ত শীঘ্ৰে বিৰোধীৰ মিত্ৰতাৰ স্থিতি স্পষ্ট নহ'লে এই তালিকাখনৰ ভিত্তিত নির্বাচনত অৱতীৰ্ণ হ'বলৈ ৰাইজৰ দলে প্রস্তুতি আৰম্ভ কৰিছে। অৱশ্যে কংগ্ৰেছে মিত্ৰতাৰ বাবে আগ্রহী নহ'লে নাইবা অন্যান্য বিৰোধী দলসমূহক অৱজ্ঞা কৰিলে ৰাইজৰ দলে ১২৬ টা সমষ্টিতে প্রার্থী থিয় কৰাব বুলি পূর্বে মন্তব্য কৰিছিল অখিল গগৈয়ে।

অৱশ্যে অখিল গগৈ, কংগ্রেছ তথা অন্যান্য বিৰোধী দলসমূহে ২০২৬ ত নিজা নিজাকৈ প্রার্থী থিয় কৰালে শাসকীয় বিজেপি মিত্রজোঁটেই লাভৱান হ'ব বুলি ৰাজনৈতিক বিশেষজ্ঞসকলে মতপ্রকাশ কৰি আহিছে। এনেস্থলত ইতিমধ্যে ভাইৰেল হোৱা ৰাইজৰ দলৰ সম্ভাব্য প্রার্থী তালিকাই ৰাজ্যৰ ৰাজনৈতিক মহলত প্রতিক্ৰিয়াৰ সৃষ্টি কৰিছে।