মুখ্যমন্ত্ৰী হিমন্ত বিশ্ব শৰ্মাই মুকলি কৰিলে শ্বহীদ স্মাৰক ক্ষেত্র...

ডিজিটেল সংবাদ,গুৱাহাটীঃ   ঐতিহাসিক অসম আন্দোলনত প্রাণ আহুতি দিয়া শ্বহীদৰ স্মৃতিত শ্রদ্ধা জনাই আজি ৰাজ্যজুৰি শ্বহীদ দিৱস পালন কৰা হৈছে। অসমীয়াৰ অস্তিত্ব ৰক্ষাৰ এই আন্দোলনত অংশ লৈ বহু লোকে জীবন হেৰুৱাইছিল। বহু লোক কাললৈ ঘূণীয়া হৈছিল।১৯৮৫ চনত অসম চুক্তি স্বাক্ষৰিত হোৱাৰ লগে লগে অসম আন্দোলনৰ পৰিসমাপ্তি ঘটিছিল যদিও অসম আন্দোলনৰ শ্বহীদসকলৰ প্রাপ্য স্বীকৃতিৰ পৰা বঞ্চিত হৈছিল।

শেহতীয়াকৈ অসম চৰকাৰৰ উদ্যোগত অসম আন্দোলনৰ শ্বহীদসকলৰ প্রকৃত সংখ্যা নিৰূপণ কৰি তেওঁলোকৰ তথ্য প্রণালীবদ্ধভাবে সংৰক্ষণ কৰা হয়। এই প্রয়াসৰ অংশ হিচাপে গুৱাহাটীৰ পশ্চিম বৰাগাঁৱত প্রায় ১০০ কোটি টকা ব্যয়সাপেক্ষে শ্বহীদ স্মাৰক ক্ষেত্র নির্মাণৰ কাম আৰম্ভ কৰা হয়। 

 এই শ্বহীদ স্মাৰকত মুঠ ৮৬০গৰাকী ছহিদৰ বহুসংখ্যকৰে প্রতিচ্ছবি সংৰক্ষণ কৰা হৈছে। স্মাৰক ক্ষেত্ৰত তেওঁলোকৰ আত্মবলিদানৰ বিষয়ে খোদিত কৰা হৈছে। অৱশেষত শ্বহীদ সকলৰ ত্যাগৰ প্রতি প্রদর্শন কৰা এই স্বীকৃতিয়ে শ্বহীদ পৰিয়ালসমূহক আনন্দিত কৰি তুলিছে।