ডিজিটেল সংবাদ, ধেমাজিঃ বানৰ পিছত এইবাৰ আকৌ চৰহা পোকে নষ্ট কৰিছে ধেমাজিৰ বহু কৃষিভূমি।পানীত হাঁহ নচৰা অৱস্থা কৃষকসকলৰ। এই চৰহা পোকে এফালৰ পৰা নষ্ট কৰি গৈছে শ শ বিঘা কৃষিভূমি। জিলাখনৰ কৃষি বিভাগটো আছে যদিও বিষয়া-কৰ্মচাৰীসকলৰ অদূৰদৰ্শিতা আৰু গুৰুত্বহীনতাৰ বাবে চৰহা পোক নিয়ন্ত্রণৰ বাবে কোনো ব্যৱস্থা গ্ৰহণ কৰা নাই।
এই গুৰুতৰ অভিযোগ উত্থাপন কৰিছে ভুক্তভোগী ৰাইজে৷ কৃষি বিভাগৰ এনে কৰ্মকাণ্ডৰ বিৰুদ্ধে সৰৱ হৈ শুকুৰবাৰে সদৌ ধেমাজি জিলা ছাত্র সন্থাৰ শতাধিক কৰ্মীয়ে বেনাৰ, পোষ্টাৰ, প্লে'কাৰ্ড লৈ কৃষি বিষয়া কাৰ্যালয় ঘেৰাও কৰে৷
প্ৰতিবাদকাৰীসকলে বান বিধ্বস্ত খেতিয়কসকলক পৰ্যাপ্ত সাহায্য প্ৰদান কৰা , চৰহা পোকৰ আক্ৰমণৰ পৰা খেতি-পথাৰসমূহ ৰক্ষা কৰিবলৈ ব্যৱস্থা কৰা , পথাৰ আৰু কৃষক ৰাইজৰ মাজত সম্পৰ্ক নথকা বিভাগৰ বিষয়া-কৰ্মচাৰীসকলৰ ওপৰত শীঘ্ৰে শাস্তিমূলক ব্যৱস্থা গ্ৰহণ কৰিবলৈ দাবী জনায়৷ কাৰ্যসূচীৰ অন্তত জিলা উপায়ুক্তৰ জৰিয়তে মুখ্যমন্ত্রীলৈ এখন স্মাৰক পত্র প্ৰদান কৰে ।
উল্লেখ্য যে, প্ৰতিবাদকাৰীসকলৰ সন্মুখতে জিলা কৃষি বিষয়াগৰাকীয়ে বিভাগটোত বিষয়া-কৰ্মচাৰীৰ অভাৱ, পৰ্যাপ্ত পৰিমাণৰ সা-সুবিধা নথকাৰ কথা মুকলিকৈ প্ৰকাশ কৰে। জিলাৰ অতিৰিক্ত উপায়ুক্ত গৰাকীয়ে স্মাৰক পত্ৰ গ্ৰহণ কৰি শীঘ্ৰে কৃষি বিভাগত হৈ থকা সকলো কাম-কাজ নিৰীক্ষণ কৰাৰ আশ্বাস প্ৰদান কৰে৷
