ডিজিটেল সংবাদ ,ঢকুৱাখনা : ঢকুৱাখনা মহকুমাত চাৰিকঢ়িয়া নদীৰ বান গৰাখহনীয়াৰ তাণ্ডৱ অব্যাহত আছে। নদীখনে পশ্চিম মাছখোৱাৰ পৰা কেঁকুৰী পৰ্যন্ত বিস্তৃত এলেকাত নিৰবিছিন্ন হাৰত অব্যাহত ৰাখিছে ভয়াৱহ গৰা খহনীয়া ।
শেহতীয়া ভাৱে নদীখনৰ বিধ্বংসী খহনীয়াই পূব ঢকুৱাখনা পঞ্চায়তৰ গোর্খালি নেপালী অঞ্চলতো সন্ত্রাস সৃষ্টি কৰিছে। নদীখনে অঞ্চলটোত থকা ৰাম মন্দিৰটোৰ লগতে বিস্তীৰ্ণ অঞ্চল কালি উটুৱাই নিয়ে । তাৰোপৰি গাঁওখনৰ চেক বাহাদুৰ কুমালৰ বাৰীৰ বিস্তীৰ্ণ অংশ গৰ্ভস্থ কৰে ।
সমগ্ৰ অঞ্চলটোত গৰা খহনীয়াই তীব্ৰ ৰূপ ধাৰণ কৰাৰ বিপৰীতে প্ৰশাসনীয় ভাবে কোনো অস্থায়ী প্ৰতিৰোধ ব্যৱস্থা গ্ৰহণ নকৰাত অঞ্চলবাসীয়ে বিনিদ্ৰ ৰজনী কটাইছে । সন্ত্ৰস্ত ৰাইজে শীঘ্ৰে এই খহনীয়া গ্ৰস্ত এলেকাত স্থায়ী বিজ্ঞানসন্মত প্ৰতিৰোধ আঁচনি গ্ৰহণ কৰি অঞ্চলটোৰ ভৌগলিক অস্তিত্ব সুৰক্ষিত কৰাৰ আহ্বান জনাইছে ঢকুৱাখনা মহকুমা প্ৰশাসনক।