ডিজিটেল সংবাদ, বটদ্ৰৱাঃ সোমবাৰে বিয়লি ৩ঃ৪০ বজাত মুখ্যমন্ত্ৰী সৰ্বানন্দ সোনোৱাল দ্বিতীয় বৈকুন্ঠ শ্ৰীশ্ৰী বটদ্ৰৱা থানত উপস্থিত হয় ৷ দিনটো অন্যান্য স্থানৰ লগতে শেষত মৰিগাঁও জিলাৰ লাহৰিঘাটৰ এখন নিৰ্বাচনী সভাত অংশগ্ৰহণ কৰি মুখ্যমন্ত্ৰীগৰাকী হেলিকপ্তাৰযোগে বটদ্ৰৱাত উপস্থিত হয় ৷ বটদ্ৰৱা শ্ৰীশ্ৰী শঙ্কৰদেৱ উচ্চতৰ মাধ্যমিক বিদ্যালয়ৰ খেলপথাৰৰ অস্থায়ী হেলিপেডত নগাঁও জিলাৰ উপায়ুক্ত তথা আৰক্ষী অধীক্ষকে মুখ্যমন্ত্ৰীগৰাকীক আদৰনি জনায় ৷
বিজেপি দলে অসমত চৰকাৰ গঠন কৰাৰ পিছত ৫ আৰু ৯ ডিচেম্বৰত ভোট গ্ৰহণ হ'বলগীয়া পঞ্চায়ত নিৰ্বাচন হৈছে প্ৰথমটো নিৰ্বাচন ৷ এই পঞ্চায়ত নিৰ্বাচনৰ ফলাফলে ৰাইজৰ মাজত বিজেপি দল তথা মুখ্যমন্ত্ৰী হিচাপে সৰ্বানন্দ সোনোৱালৰ জনপ্ৰিয়তা একপ্ৰকাৰ নিৰ্নয় কৰিব ৷ সেয়েহে সোমবাৰে নিৰ্বাচনৰ প্ৰচাৰ অভিযানৰ সামৰনি মাৰি সৰ্বানন্দ সোনোৱালৰ সন্মানৰ প্ৰশ্ন হিচাপে চিহ্নত পঞ্চায়ত নিৰ্বাচনত ভাল ফলাফল কামনাৰে মহাপুৰুষ গুৰুজনাৰ আৰ্শীবাদ বিচাৰিয়েই মুখ্যমন্ত্ৰী সোনোৱালে সেৱা নিবেদন কৰে পূণ্যভূমি বটদ্ৰৱা থানত ৷
মুখ্যমন্ত্ৰীগৰাকীয়ে কীৰ্তনঘৰত প্ৰায় ২০ মিনিট সময় বহি সন্ধ্যা প্ৰংসগত ভাগ লোৱাৰ লগতে সত্ৰাধিকাৰৰ পৰা ধৰ্মীয় দিহা-পৰামৰ্শ গ্ৰহন কৰি আৰ্শীষ নিৰ্মালী গ্ৰহণ কৰে ৷ পবিত্ৰ আকাশী গংগাৰ তীৰ থান পৰিচালনা সমিতিৰ বিষয়ববীয়া সকলৰ সৈতে বহুসময় ধৰি গুৰুজনাৰ একশৰণ নাম ধৰ্ম সম্পৰ্কে বাৰ্তালাপ কৰি বিগত দিনকেইটাৰ ব্যস্ততাপূৰ্ণ কাৰ্মসূচীৰ পিছত বটদ্ৰৱা থানলৈ আহি সুন্দৰ আধ্যাত্মিক বাতাবৰণত মানসিক প্ৰশান্তি লাভ কৰা বুলি মন্তব্য কৰে মুখ্যমন্ত্ৰীজনে।
সম্পূৰ্ণ ধৰ্মীয় কাৰ্যসূচীৰে বটদ্ৰৱা থানত প্ৰায় দুঘন্টা অতিবাহিত কৰাৰ অন্তত মুখ্যমন্ত্ৰীগৰাকী গুৱাহাটী অভিমুখে ৰাওঁনা হয় ৷ বটদ্ৰৱা থান দৰ্শণৰ সময়ত বিধায়িকা আঙুৰলতা ডেকা, নগাঁও জিলা উপায়ুক্ত বিশ্বজিৎ পেগু, নগাঁও জিলা আৰক্ষী অধীক্ষক শঙ্কৰব্ৰত ৰায় মেধিৰ লগতে শ্ৰীশ্ৰী বটদ্ৰৱা থান পৰিচালনা সমিতিৰ সভাপতি তথা সত্ৰাধিকাৰ দেৱানন্দ দেৱ গোস্বামী প্ৰমুখ্যে কাৰ্যনিৰ্বাহক সদস্যসকলে মুখ্যমন্ত্ৰীগৰাকীক সংগ দিয়া পৰিলক্ষিত হয় ৷
