বিজয় মালিয়াই হেৰুৱাব লণ্ডনৰ বিলাসী বাংলা

ডিজিটেল ডেস্কঃ চৰকাৰী বেংকৰ পৰা ঋণ লৈ ভাৰতৰ পৰা পলায়ন কৰা সুৰা ব্যৱসায়ী বিজয় মালিয়াৰ লণ্ডনত থকা বিলাসী বাংলা হেৰুৱাবলগীয়া হ'ব পাৰে৷ চুইচ বেংকে বিজয় মালিয়া, তেওঁৰ মাতৃ আৰু পুত্ৰক লণ্ডনৰ ৰেজেন্ট পাৰ্কস্থিত কোটিটকীয়া বাংলাটো ত্যাগ কৰিবলৈ আদালতৰ দ্বাৰা জাননী প্ৰেৰণ কৰিছে৷ জানিব পৰা মতে, বিজয় মালিয়াই তেওঁৰ এই বাংলাটো বন্ধকত ৰাখি চুইচ বেংকৰ পৰা লোন লোৱাত এতিয়া বেংকে তেওঁৰ সম্পত্তি দখলৰ বাবে উচ্চ ন্যায়ালয়ত আপীল কৰিছে৷

ইফালে, ৰোজ কেপিটেল বেঞ্চৰ্ছ লিমিটেড কোম্পানী, বিজয় মালিয়া, মাতৃ ললিতা মালিয়া আৰু পুত্ৰ সিদ্ধাৰ্থ মালিয়াৰ বিৰুদ্ধে আদালতত এই গোচৰৰ অহা ২৪ অক্টোবৰত শুনানি গ্ৰহণ কৰা হ'ব৷ উল্লেখ্য যে, বিজয় মালিয়াৰ চিলেটা ট্ৰাষ্টৰ মালিকানাধীন ৰোজ কেপিটেল বেঞ্চৰ্ছ লিমিটেড কোম্পানীয়ে ইউনিয়ন বেংক অৱ চুইজাৰলেণ্ডৰ পৰা ১৯৫ কোটি টকাৰ লোন লৈছিল৷

ইউনিয়ৱন বেংক অৱ চুইজাৰলেণ্ডৰ মতে লোন প্ৰদানৰ সময় সীমাৰ অন্ত পৰাৰ পিছতে বিজয় মালিয়াৰ পৰিয়ালক তেওঁলোকৰ সম্পত্তি খালী কৰিবলৈ নিৰ্দেশ দিয়া হৈছিল যদিও তেওঁলোকে সেয়া খালী কৰিবলৈ অস্বীকাৰ কৰে৷ জানিব পৰা মতে, বিজয় মালিয়াই লণ্ডনৰ বাংলাটো ২০০৫ চনৰ ৩ অক্টোবৰত প্ৰায় ৫২ কোটি টকা ভাৰতীয় মূল্যত ক্ৰয় কৰিছিল৷

বেংকৰ মতে, বিজয় মালিয়াৰ ঋণ ২০১৭ চনৰ ১ চেপ্তেম্বৰলৈ ১৯৮ কোটি টকা হয়৷ ঋণ পৰিশোধ নকৰাত বেংকে ২০১৬ চনৰ নৱেম্বৰত ঋণ আদায় আৰু সম্পত্তি বাজেয়াপ্ত কৰাৰ বাবে আদালতৰ দাৰস্থ হৈছিল৷

উল্লেখ্য যে, বিজয় মালিয়াই ভাৰতীয় বেংকৰ পৰাও প্ৰায় ৯ হাজাৰ কোটি টকাৰ ঋণ লৈ ভাৰতৰ পৰা পলায়ন কৰে৷ ইয়াৰ পিছতে ভাৰত চৰকাৰে পলাটক সুৰা ব্যৱসায়ীজনক ভাৰতলৈ প্ৰত্যাৰ্পন কৰাৰ বাবে চেষ্টা অব্যাহত ৰাখিছে৷ বিজয় মালিয়াৰ বিৰুদ্ধে এতিয়াও আদালতত গোচৰ চলি আছে৷