শেহতীয়া খবৰ
COVID-19ত আক্ৰান্ত চিকিৎসক দম্পত্তী...  •  নিশা ১২ বজালৈ COVID-19ত আক্ৰান্ত ১০ লক্ষাধিক লোক, পঢ়ক কোন দেশত কিমান লোকৰ মৃত্যু কোৰোনাত...  •  নিশা ১২ বজালৈ COVID-19ত আক্ৰান্ত ১০ লক্ষাধিক লোক, পঢ়ক কোন দেশত কিমান লোকৰ মৃত্যু কোৰোনাত...  •  COVID-19ত আক্ৰান্ত হৈ মৃত্যু হোৱা লোকৰ সংখ্যা ৫০ হাজাৰলৈ বৃদ্ধি, পঢ়ক সবিশেষ তথ্য...  •  COVID-19ত আক্ৰান্ত হৈ মৃত্যু হোৱা লোকৰ সংখ্যা ৫০ হাজাৰলৈ বৃদ্ধি, পঢ়ক সবিশেষ তথ্য...  •  কোৰোনাত আক্ৰান্ত হৈ স্পেইনতো মৃত্যু হৈছে ১০,০০০ লোকৰ...  •  এগৰাকী আশা কৰ্মীয়ে লিখা এই পত্ৰখন এবাৰ পঢ়ক স্বাস্থ্য মন্ত্ৰী মহোদয়ে...  •  কোৰানাত আক্ৰান্ত জাগীৰোডৰ ৩ ব্যক্তিৰ পৰিয়ালৰ সদস্যক কোৱাৰেন্টাইন হোমলৈ প্ৰেৰণ...  •  কোৰানাত আক্ৰান্ত জাগীৰোডৰ ৩ ব্যক্তিৰ পৰিয়ালৰ সদস্যক কোৱাৰেন্টাইন হোমলৈ প্ৰেৰণ...  •  নিজামুদ্দিনৰ ৰোগীয়ে চিকিৎসালয়ত চলাইছে তাণ্ডৱ, নিৰাপত্তা ব্যৱস্থা কৰিবলৈ আৰক্ষী আয়ুক্তলৈ চৰকাৰৰ পত্ৰ...

বিটিআৰৰ নিৰ্বাচনঃ হাগ্ৰামা নে প্ৰমোদ বড়ো হ’ব বিজেপিৰ বন্ধু…

363

সন্মুখত বিটিআৰৰ নিৰ্বাচন। এইবাৰ নিৰ্বাচনত কোনে বাজী মাৰিবলৈ সক্ষম হ’ব? বিজেপিয়ে কাক কৰিব সমৰ্থন? বিটিআৰত ক্ষমতা সলনি হ’লে বিপিএফ প্ৰধান হাগ্ৰামা মহিলাৰীৰ বিৰুদ্ধে হ’ব নেকি চিবিআইৰ তদন্ত? এনে বহু প্ৰশ্নৰৰ উত্তৰেৰে ইউপিপিএলৰ সভাপতি প্ৰমোদ বড়োৰ সৈতে ‘অসমীয়া প্ৰতিদিন’ৰ ডিজিটেল সংস্কৰণৰ এক বিশেষ প্ৰতিবেদন।

এবছু এৰি ৰাজনীতিত ভৰি দিয়া আৰু শেহতীয়াকৈ ইউপিপিএলৰ সভাপতিৰ দায়িত্ব গ্ৰহণ কৰা প্ৰমোদ বড়োৰ দাবী- বিটিআৰত পৰিৱৰ্তন হ’ব। দীৰ্ঘদিন ধৰি বিটিচিত দুৰ্নীতিৰ বেহা বহিছে। এই দুৰ্নীতিৰ তদন্ত হ’লে বহু বাঘা বাঘা নেতা জে’ললৈ যাব লাগিব।

সঁচাকৈয়ে পূৰ্বৰ বিটিচি আৰু এতিয়াৰ বিটিআৰত সলনি হ’ব নেকি ৰাজনৈতিক সমীকৰণ? বৰ্তমান বিজেপিৰ সৈতে মিলি ৰাজ্যৰ চৰকাৰত থকা আৰু বিটিচিত শাসনাধিষ্ঠিত বিপিএফৰ পতন ঘটিব নেকি আগন্তুক নিৰ্বাচনত!

হাগ্ৰামা মহিলাৰীৰ নেতৃত্বাধীন বিপিএফৰ বিৰুদ্ধে সৰৱ হৈছে প্ৰমোদ বড়ো। ইয়াৰ বিপৰীতে শাসনাধিষ্ঠিত বিপিএফৰ দাবী- এইবাৰো তেওঁলোকেই দখল কৰিব বিটিআৰ। বিজেপিৰ ৰাজ্যিক সভাপতি ৰঞ্জিত দাসে ইতিমধ্যে প্ৰয়োজনত মিত্ৰতা সলনি হোৱাৰ ইংগিত দিয়াত আশাবাদী প্ৰমোদ বড়ো নেতৃত্বাধীন ইউপিপিএল।

কিছু দিনৰ পাছতে অনুষ্ঠিত হ’বলগা অসমৰ ৰাজ্যসভাৰ ৩ আসনৰ দুখন আসনত শাসক দলৰ প্ৰাৰ্থী জয়ী হোৱাটো নিশ্চিত। পূৰ্বৰ প্ৰতিশ্ৰুতি অনুসৰিয়েই তাৰে এখন আসন বিপিএফৰ প্ৰাৰ্থীক এৰি দিব বুলি বিজেপিয়ে সদৰী কৰাত দুই দলৰ মাজত যে মিত্ৰতা এতিয়াও সুদৃঢ় হৈ আছে, তাৰ ইংগিতেই বহন কৰে।

এনে পৰিপ্ৰেক্ষিতত কোনোবাই হাগ্ৰামা মহিলাৰীক দুৰ্বল বুলি ভাৱিলেও প্ৰকৃতাৰ্থত হাগ্ৰামাৰ বিৰুদ্ধে বিটিআৰ নিৰ্বাচনত কোনো পক্ষই জয়ী হোৱাটো সহজ হৈ থকা নাই। বিটিআৰত থকা অনা-বড়ো লোকৰো কিছু সংখ্যকৰ আছে হাগ্ৰামা মহিলাৰীৰ প্ৰতি সমৰ্থন।

এনে পৰিস্থিতিত বিটিআৰৰ ৰাজনৈতিক ভৱিষ্যত আৰু দীৰ্ঘদিনৰ সংগ্ৰামৰ পৰিণতিত স্বাক্ষৰিত ঐতিহাসিক বড়ো চুক্তিৰ প্ৰভাৱ কিদৰে পৰিব আগন্তুক দিনবোৰত? কাৰ্বি আংলঙৰ দৰেই বিজেপিয়ে নিজৰ দখললৈ বিটিআৰ অনাৰ স্বাৰ্থত আন ৰাজনৈতিক অভিসন্ধিৰে হাগ্ৰামা মহিলাৰীক দুৰ্বল কৰি বিপিএফক বিজেপিত চামিল কৰাৰ চেষ্টা চলাইছে নেকি? এই প্ৰশ্নৰো উত্থাপন হৈছে এতিয়া।

এনে খবৰো ওলাইছে যে হাগ্ৰামা মহিলাৰীয়ে বিজেপিৰ তেনে পদক্ষেপৰ প্ৰতি ইতিবাচক সঁহাৰি নজনালে বা ৰাজনৈতিক বতাহ কোনফালে বয়, সেই দিশত চিন্তা চৰ্চা কৰি মিত্ৰতাৰ হাত ইউপিপিএলৰ পক্ষে আগবঢ়াব নেকি? তেনেবোৰ প্ৰশ্ন আৰু বিটিআৰৰ শেহতীয়া ৰাজনৈতিক তৎপৰতা সন্দৰ্ভত একালৰ ছাত্ৰ নেতা প্ৰমোদ বড়োক সোধা হৈছিল কেইটামান প্ৰশ্ন।

এনডিএফবি শান্তি প্ৰক্ৰিয়ালৈ অহা বুলি ক’লেও এতিয়াও বাহিৰতে আছে সংবিজিত। ঐতিহাসিক বড়ো চুক্তিত স্বাক্ষৰ কৰা সকলৰ মাজতো ভালেকেইটা শিৱিৰ হৈছে। সেই সকলে বিটিআৰৰ নিৰ্বাচনত কোনে কাক সহায় কৰে বা পক্ষত থাকে, সেয়াও হ’ব লক্ষণীয়। কিন্তু এই কথা ঠিক যে, হাগ্ৰামা মহিলাৰী এতিয়াও অপ্ৰাসংগিক হৈ পৰা নাই।

ইয়াৰ বিপৰীতে বিটিআৰ নিৰ্বাচনত জয়ী হোৱাৰ সপোন দেখিছে ইউপিপিএলে। ঐতিহাসিক বড়ো চুক্তি ৰূপায়ণ কিদৰে হ’ব আৰু ইয়াৰ ভৱিষ্যত কাৰ্যপন্থা সন্দৰ্ভত প্ৰমোদ বড়োক সোধাত তেওঁ ক’লে- ‘সেই সন্দৰ্ভত আমি সদায় সজাগ। এই চুক্তি অনুসৰি কাম কৰিব নোৱাৰিলে আমাকো ৰাইজে ৰেহাই নিদিব। পৰিবৰ্তন বিচাৰে এতিয়া সকলোৱে।’

প্ৰমোদ বড়োক সোধা হৈছিল- পৃথক বড়োলেণ্ড গঠনৰ দাবী আৰু কেতিয়াবা উত্থাপন হ’ব নেকি? তেওঁ ক’লে- ‘সমস্যাবোৰ যদি সমাধান হয় তেন্তে কোনো ৰাজপথলৈ ওলাই নাহে। যদি প্ৰতিবাদকাৰী ৰাজপথলৈ ওলাই অহাতো বন্ধ হ’ব লাগে তেনেহ’লে চুক্তি অতি শীঘ্ৰে ৰূপায়ন হ’ব লাগে।’

পৃথক বড়োলেণ্ডৰ সন্দৰ্ভত এইদৰে ক’লে প্ৰমোদ বড়োৱে। আনহাতে ‘কা’ক অৰ্থাৎ নাগৰিকত্ব সংশোধনী আইনক তেওঁলোকে সমৰ্থন কৰিব নে নকৰে বুলি সোধাত প্ৰমোদ বড়োৰ উত্তৰ আছিল- ‘মই ইউ পি পি এলৰ সভাপতি হিচাপে এদিনহে হৈছে। এতিয়ালৈকে এই বিষয়টো আমি পাৰ্টীত আলোচনা কৰা নাই। খিলঞ্জীয়া মানুহৰ স্বাৰ্থ যাতে ক্ষতি নহয়, তেওঁলোকৰ যি প্ৰাপ্য-অধিকাৰ তাৰ বাবে আমি সদায় মাত মাতি আহিছো আৰু মাতি যাম।’

‘কা’ৰ সমৰ্থন নকৰে প্ৰমোদ বড়োৱে। এই সন্দৰ্ভত তেওঁৰ প্ৰতিক্ৰিয়া আছিল এনেধৰণৰ- ‘সমৰ্থন কৰাৰ কোনো কথা নাই। আজি মই পাৰ্টী হিচাপে এই কথা কোৱা নাই। নিখিল বড়ো ছাত্ৰ সন্থা হিচাপে আমি ম’ভমেন্টত মৰেল ছাপৰ্ট দি আহিছো। লাষ্ট ম’ভমেন্টটোত আমি জড়িত হোৱা নাই। কিন্তু বহুত মভমেন্টত আমি জড়িত হৈছিলো। লাষ্ট ম’ভমেন্টত আমাৰো বহুত ইছ্যু আহি গ’ল। আমাৰ হাতত ইমান ডাঙৰ এটা এছাইমেন্ট আছিলে। সেইকাৰণে জাতিটোক আমি এটা সমস্যাৰ পৰা উদ্ধাৰৰ বাবে এই পন্থা লৈছিলো। সেই কাৰণে লাষ্ট ম’ভমেন্টত আমি জড়িত হ’ব নোৱাৰিলো।’

বিভিন্ন সময়ত তেওঁ বিটিআৰত সংঘটিত দুৰ্নীতিৰ বিৰুদ্ধে সৰৱ হৈ আহিছে। আঙুলি তুলিছিল বৰ্তমানৰ শাসনত থকা নেতৃত্বৰ বিৰুদ্ধে। কি ধৰণৰ দুৰ্নীতি হৈছে, সেই কথা জানিব বিচৰাত তেওঁ উত্তৰ দিলে- ‘কেগত স্পষ্ট হৈছে, ইয়াতে দুৰ্নীতি হৈছে। তিনিটা কেগ ৰিপৰ্ট ওলাইছে। আৰু মই বিচাৰো আপোনালোকে কেগৰ ৰিপৰ্ট প্ৰকাশ কৰিব লাগে। এই প্ৰতিবেদনবোৰ প্ৰকাশ পালে ৰাইজৰ চকু খোল খাব। চিডি ফাণ্ডৰ নামতো অহা ১০০ কোটি টকাত দুৰ্নীতি সংঘটিত কৰিছিল।’

আগন্তুক বিটিআৰ নিৰ্বাচনত তেওঁলোকৰ বাবে মূলতঃ কোন প্ৰতিদ্বন্দ্বী হ’ব বুলি সোধা হৈছিল ইউপিপিএলৰ সভাপতিগৰাকীক। তেওঁৰ মতে, কোনো ৰাজনৈতিক দল বা ব্যক্তিক মূল প্ৰতিদ্বন্দ্বী বুলি নাভাৱে- ‘নাই নাই, আমাৰ প্ৰতিদ্বন্দ্বী হৈছে সমস্যা। সমস্যাই আমাৰ মূল প্ৰতিদ্বন্দ্বী। কোনো ব্যক্তি আমাৰ প্ৰতিদ্বন্দ্বী নহয়।’

বিটিআৰত পৰিবৰ্তন বিচাৰে ইউপিপিএলে। কেনে পৰিবৰ্তন বিচাৰে তেওঁলোকে? এয়া কেৱল ৰাজনৈতিক পৰিৱৰ্তন নে? কি হ’ব বড়োভূমিত শংকিত হৈ থকা অনা-বড়ো সকলৰ ভৱিষ্যত? এই প্ৰশ্ন সন্দৰ্ভত প্ৰমোদ বড়োৰ উত্তৰ আছিল- ‘উদাৰতা মনোভাৱ সকলোৰে থাকিব লাগে। বিটিআৰ অঞ্চলৰ ৰাইজে এতিয়া পৰিৱৰ্তন বিচাৰিছে। আৰু সেই পৰিৱৰ্তন বিচৰা মনোভাৱক আমি সঁহাৰি জনাব লাগিব। কাৰণ গণতন্ত্ৰখন ৰাইজৰে হয়, চৰকাৰখনো ৰাইজৰে হয়। তাত যদি এজন বা দুজন ব্যক্তিয়ে খামোচ মাৰি ধৰি থাকে আৰু সদায় দুৰ্নীতি কৰে তেনেহলে সমাজখন কেনেকৈ আগুৱাই যাব? অঞ্চলটোৰ কেনেকৈ উন্নয়ন হ’ব? সেইকাৰণে এই উদাৰতা মনোভাৱটো ল’ব লাগে। আৰু যিয়ে ভাল কাম কৰে তাৰ সৈতে মিলি-জুলি কাম কৰিব লাগে। তেতিয়াহে আমাৰ দেশ আৰু ৰাজ্যখন আগুৱাই যাব।’

পৰিৱৰ্তন যে আহিব, সেয়া তেওঁ কেনেদৰে নিশ্চিত হৈছে? তেওঁলোক শাসনলৈ আহিলে সলনি হৈ যাব নেকি সকলো? প্ৰমোদ বড়োৱে ইয়াৰ উত্তৰত ক’লে- ‘পৰিৱৰ্তন আমি কৰিব লাগিব। এনেটো আশা কৰি বহি থাকিলে নহ’ব। যদি আমি সকলোৱে মিলি কাম কৰে তেতিয়াহে পৰিৱৰ্তন আহিব। বিটিআৰ চুক্তি কৰা লোক কেইজন কেইটামান ব্যক্তি আৰু দলহে। সেই কেইজনমান ব্যক্তিয়েটো পৰিৱৰ্তন আনিব নোৱাৰিব যদিহে সৰ্বসাধাৰণ ৰাইজে ইয়াত যোগদান নকৰে। সেইকাৰণে আমাৰ দায়িত্ব ল’ব আমি ৰাইজক বিশ্বাস আৰু আস্থাত ল’ব লাগিব। আৰু ৰাইজেও আমাক বিশ্বাস-আস্থাত ল’ব লাগিব। আৰু তেতিয়াহে পৰিৱৰ্তন আহিব। আৰু পৰিৱৰ্তন অহাটো নিশ্চিত বুলি ভাবিছো। আগতে আমি ৰাজনীতিত নাছিলো। দুই-এটা বিষয়ত মাজে সময়তে ছাপৰ্ট কৰি আহিছিলো। কিন্তু এতিয়া ৰাজনীতিত ভৰি দি যি পৰিৱেশ দেখা পাইছো। বিভিন্ন জাতি-জনগোষ্ঠীৰ স্বতঃস্ফূৰ্ত সমৰ্থন দেখিবলৈ পাইছো। সেইকাৰণে পৰিৱৰ্তন অহাটো নিশ্চিত বুলি ভাবিছো।’

এনডিএফবিৰ দুৰ্ধৰ্ষ কেডাৰ জি বিদাইকে ধৰি সকলো এই প্ৰক্ৰিয়াত চামিল হৈছেনে? কোনোবা ৰৈ গৈছে নেকি এই শান্তি প্ৰক্ৰিয়াত অংশগ্ৰহণ কৰাৰ পৰা? ইউপিপিএলৰ বৰ্তমানৰ সভাপতি তথা ঐতিহাসিক বিটিআৰ চুক্তিৰ অন্যতম স্বাক্ষৰকাৰী প্ৰমোদ বড়োৱে ক’লে- ‘তেখেতো আছে। এই প্ৰক্ৰিয়াটোৰ পৰা কোনো লোক বাহিৰত ৰৈ যোৱা নাই। সকলোৱে আছে এই প্ৰক্ৰিয়াটোত। হয়তো কোনো বিশেষ কাৰণত জি বিদাইক দেখা পোৱা হোৱা নাই।’

হাগ্ৰামা মহিলাৰীৰ বিৰুদ্ধে চিবিআইৰ তদন্ত দাবী কৰি আহিছে ইউপিপিএলৰ সভাপতিগৰাকীয়ে। আনকি শাসনলৈ আহিলে বৰ্তমানৰ বিটিচিৰ শাসক সকলৰ বিৰুদ্ধে চিবিআই তদন্ত দিব বুলি ঘোষণা কৰিছে। কি অভিযোগ আছে তেওঁলোকৰ বিৰুদ্ধে? এই কথা সোধা হৈছিল প্ৰমোদ বড়োক। ইয়াৰ উত্তৰ দিলে তেওঁ এইদৰে- ‘সেই তালিকাখন মই এতিয়া দিব বিচৰা নাই। ইতিমধ্যে সংবাদমাধ্যমত সেই সন্দৰ্ভত খবৰ প্ৰকাশ পাইছে। কি কি দুৰ্নীতি কৰিছে ৰাজহুৱা গৈছে। পি চিদাম্বৰাম জে’ললৈ গ’ল। শাসনত থাকিলে পি চিদাম্বৰাম জে’ললৈ নগ’লহেঁতেন। দেশৰ আইনগত প্ৰক্ৰিয়া অনুসৰি কোনো লোকে দুৰ্নীতি কৰিলে সাৰি যাব নোৱাৰে। আজি ময়ো তেনেকুৱা কিবা কাম কৰিলে উপযুক্ত শাস্তি এই চিষ্টেমৰ দ্বাৰা পাব লাগে।’

বিটিআৰ চুক্তি স্বাক্ষৰিত কৰাৰ সময়ত বড়ো অধ্যুষিত নতুন অঞ্চল ইয়াৰ অন্তৰ্ভূক্ত কৰা আৰু অনা-বড়ো গাঁওসমূহ বিটিআৰৰ পৰা কৰ্তন কৰিবলৈ এখন কমিটী গঠন কৰাৰ কথা আছিল। সেই কমিটী গঠন হ’লনে? এই বিষয়ে জানিব বিচৰাত তেওঁৰ উত্তৰ আছিল- ‘এতিয়ালৈকে কমিটীখন গঠন হোৱা নাই। ইয়াক লৈ কোনোৱেই শংকিত হোৱাৰ প্ৰয়োজন নাই। ৰাজনৈতিক স্বাৰ্থত কিছু লোকে এই ভুৱা খবৰ ওলাইছে। ইয়াক লৈ ভয় কৰাৰ কোনো প্ৰয়োজন নাই। ভাৰতৰ সংবিধানে ভাৰতীয় নাগৰিকক ক্ষতি কৰি কোনো এটা জাতি বা জনগোষ্ঠীক অধিকাৰ প্ৰদান নকৰে। ইয়াত জেনেৰেল কাষ্টৰ লোকৰ বাবেও ৰিজাৰ্ভ ছীট আছে, যিটো ভাৰতৰ আন কোনো ঠাইত নাই। গতিকে কোনোৱে ভয় বা শংকিত হোৱাৰ কাৰণ নাই।’

প্ৰমোদ বড়ো ছাত্ৰনেতা হিচাপে সফল হ’ব পাৰে। কিন্তু এইবাৰ ৰাজনীতিবিদ হিচাপে যে তেওঁ সফল হ’ব সেই আস্থা ৰাইজে কেনেকৈ কৰিব? ছাত্ৰ ৰাজনীতিৰ পৰা সংসদীয় ৰাজনীতিলৈ অহা বহু নেতাই ইতিমধ্যে ব্যৰ্থতাৰ পৰিচয় দিছে। কেৱল ব্যক্তিস্বাৰ্থত গুৰুত্ব দি তেওঁলোকে ক্ষমতা লাভৰ পাছত কাম কৰাৰ হে উদাহৰণ আছে। ৰাইজৰ স্বাৰ্থলৈ পিঠি দিয়া এনে নেতাসকলে পাহৰি যায় পূৰ্বৰ প্ৰতিশ্ৰুতি। প্ৰমোদ বড়োৰ ক্ষেত্ৰতো ইয়াৰ ব্যতিক্ৰম নহয় বুলি ৰাইজে কেনেদৰে বিশ্বাস কৰিব? এই প্ৰশ্নৰ উত্তৰ দি প্ৰমোদ বড়োৱে ৰাজনীতি তেওঁৰ নিচা বা পেছা নহয় বুলি উল্লেখ কৰিলে। তেওঁ ক’লে- ‘মোৰ কাৰণে ৰাজনীতি নিচাও নহয় পেচাও নহয়। ৰাজনীতি মোৰ লক্ষ্যও নহয়। এয়া মোৰ কাৰণে এটা এছাইমেন্ট আৰু প্ৰজেক্ট। দুৰ্নীতি চৰকাৰখন আঁতৰাই এজন ভাল নেতাক দায়িত্ব দিব লাগে। আৰু উন্নয়ন স্থবিৰ হৈ পৰিছে, তাক গতি দিব লাগে। এটা জাতিৰ আনটো জাতিৰ পৰা যি ভয়ৰ সৃষ্টি হৈছে সেয়া অপশাসনৰ বাবে হৈছে। সকলো মানুহ, জাতি-জনগোষ্ঠীৰ বিশ্বাস ঘূৰাই অনা দিনাহে মোৰ প্ৰজেক্ট সম্পূৰ্ণ হ’ব।’

বিজেপিয়ে আগন্তুক বিটিআৰ নিৰ্বাচনত ইউপিপিএলৰ সৈতে মিত্ৰতা কৰিব নেকি? চলিছে নেকি তেনে আলোচনা? তেওঁৰ মুখত শুনা পোৱা গৈছিল বিজেপিৰ গুণ গান। লক্ষ্য কৰি লৈছে হাগ্ৰামাক। ইয়াৰ অন্তৰালত কি উদ্দেশ্য আছে? প্ৰমোদ বড়োৰ উত্তৰ আছিল এই ধৰণৰ- ‘প্ৰশ্নটো উত্থাপন হৈছে মানুহৰ মাজত। এই সন্দৰ্ভত কোনো আনুষ্ঠানিকভাৱে আলোচনাও হোৱা নাই। বড়োচুক্তি সম্পন্ন হোৱাৰ পূৰ্বে মন্ত্ৰী হিমন্ত বিশ্ব শৰ্মাকে ধৰি বহু কেইজন নেতা-মন্ত্ৰীৰ সৈতে আলোচনাত হৈছিল। সেই কাৰণহে হয়তো এই সন্দেহ কৰা হৈছে। কিন্তু ৰাজনীতিৰ ক্ষেত্ৰত আজিলৈকে আমাৰ মাজত তেনেধৰণৰ কোনো আলোচনা হোৱা নাই। এই সন্দৰ্ভত আমাৰ দলত কোনো আলোচনা হোৱা নাই। যিহেতু বিজেপি এটা বৃহৎ দল গতিকে এই সন্দৰ্ভত আলোচনা কৰা হ’ব। বিজেপিৰ সভাপতি ৰঞ্জিত দাসে সংবাদমাধ্যমৰ আগত মাজে সময়ে কৈছে যে তেওঁলোকে অন্য দলৰ সৈতে মিলি আগবাঢ়িব। সেই উদাৰতা মনোভাৱক মই ধন্যবাদ জনাইছো।’

বড়ো ভূমিত এতিয়া বিভিন্ন ৰাজনৈতিক সমীকৰণৰ লৈ ব্যস্ত মানুহ। এফালে প্ৰমোদ বড়ো, আনফালে হাগ্ৰামা মহিলাৰী। বিজেপিয়ে শেষ মুহূৰ্তত কাক আঁকোৱালি লয়, সেয়া এতিয়াও নিশ্চিত হোৱা নাই। প্ৰয়োজনত সংগী সলনি হ’ব পাৰে বুলি কৈ থৈছে ৰাজ্যিক বিজেপিৰ সভাপতি ৰঞ্জিত দাসে।

দেখা পোৱা গৈছিল বড়ো চুক্তি স্বাক্ষৰ হোৱাৰ সময়ত নাম মাত্ৰহে অস্ত্ৰ শস্ত্ৰ জমা দিছিল এনডিএফবি কেডাৰ সকলে। এনে শংকাও এতিয়া কিছুৱে কৰে- এনডিএফবি কেডাৰ সকলে তেওঁলোকৰ হাতত মজুত থকা গৰিষ্ঠ সংখ্যক অস্ত্ৰ শস্ত্ৰই জমা  নিদিলে। সেই অভিযোগৰ আধাৰত আগন্তুক বিটিআৰ নিৰ্বাচনত লুকাই থোৱা এনে অস্ত্ৰৰ জনজননি শুনিবলৈ পোৱা যাব নেকি? নিৰ্বাচনৰ নামত আকৌ ৰক্তাক্ত হ’ব নেকি বড়োভূমি!

ইতিমধ্যে বিটিআৰত বলিছে ৰাজনীতিৰ বতাহ। বিপিএফৰ কৰ্মীক হত্যা কৰাৰ ঘটনাই সেই ইংগিতেই বহন কৰিছে নেকি? হাগ্ৰামা মহিলাৰীৰ ক্ষেত্ৰত বিজেপি নেতৃত্বৰ আস্থা পূৰ্বৰ দৰেই থাকিবনে? কিয়নো বড়ো চুক্তি স্বাক্ষৰ কৰাৰ পাছত বড়োভূমিত এক আবেগে ক্ৰিয়া কৰিব। সেই আবেগৰ ঢৌত বিজেপিয়ে কাক কাষ চপাই ল’ব, সেয়া এতিয়াই কোৱা টান। কিন্তু এই কথা ঠিক যে, বড়োভূমিত হাগ্ৰামা মহিলাৰী এতিয়াও অপ্ৰাসংগিক হৈ পৰা নাই।

আপুনি পঢ়ি ভাল পাব পৰা বাতৰি