ডিজিটেল সংবাদ বৰপেটাঃ জটিল বানপৰিস্থিতিৰ মাজতে আজি এক শোকাবহ ঘটনা সংঘটিত হয় বৰপেটা চহৰত ৷ বানত ডুবি থকা নিজৰ ঘৰৰ ইনভাৰ্টাৰ খুলিবলৈ গৈ মৃত্যুক সাৱটিলে ২৪ বছৰীয়া এজন যুৱকে ৷ এই ঘটনা সংঘটিত হৈছে বৰপেটা চহৰৰ ৭ নং ৱাৰ্ডৰ অন্তৰ্গত গায়ন হাটীত ৷
কৰুণভাৱে মৃত্যুক সাৱটি লোৱা যুৱকজন জ্যোতিকেশ গায়ন বুলি জনা গৈছে ৷ উল্লেখ্য যে, গায়নহাটীৰ প্ৰয়াত গুনীন গায়ন আৰু গোলাপী গায়নৰ কনিষ্ঠ পুত্ৰ জ্যোতিকেশ গায়নে ক্ষুদ্ৰ ব্যৱসায়ী কৰি জীৱন নিৰ্বাহ কৰিছিল ৷ এইবেলি বানত চহৰখনৰ অন্যান্য এলেকাৰ লগতে গায়ন হাটীও জলমগ্ন হৈ পৰে ৷
বানপানীয়ে নিজৰ ঘৰ বুৰাই পেলোৱাৰ বাবেই জ্যোতিকেশ গায়নে মাতৃৰ সৈতে আন মানুহৰ ঘৰত আশ্ৰয় গ্ৰহণ কৰে ৷ অলপ পানী কমাত আজি জ্যোতিকেশে দিনৰ প্ৰায় ১১-৩০ বজাত নিজৰ ঘৰলৈ যায় ৷ বৰ্তমানেও জলমগ্ন হৈ থকা ঘৰৰ ভিতৰত থকা ইনভাৰ্টাৰটো যুৱকজনে খুলিবলৈ চেষ্টা কৰে ৷
পানীৰ তলতে ইনভাৰ্টাৰটো খুলিবলৈ ধৰোতে বিদ্যুৎপৃষ্ট হৈ মৃত্যুক সাৱটি লয় জ্যোতিকেশ নামৰ যুৱকজনে ৷ মৃত্যুৰ সময়ত যুৱকজনে মাতৃ আৰু এগৰাকী জ্যেষ্ঠ ভাতৃক ইহ সংসাৰত এৰি থৈ যায় ৷ ইপিনে, যুৱকজনৰ মৃত্যুত সমগ্ৰ চহৰখনতে এক শোকাকুল পৰিৱেশৰ সৃষ্টি হয় ৷
যুৱকজনৰ এনে অকালমৃত্যুত গভীৰ শোক প্ৰকাশ কৰাৰ লগতে শোকসন্তপ পৰিয়াললৈ সমবেদনা জ্ঞাপন কৰিছে ৭ নং ৱাৰ্ডৰ ৱাৰ্ড কমিচনাৰ ধনজিৎ পাঠকে ৷ ধনজিৎ পাঠকে মৃতকৰ পৰিয়াললৈ পৰ্যাপ্ত সাহায্য প্ৰদান কৰিবলৈ চৰকাৰৰ ওচৰত দাবী উত্থাপন কৰিছে ৷ জ্যোতিকেশ গায়নৰ মৃত্যুত শোক প্ৰকাশ কৰিছে বৰপেটা জিলা ছাত্ৰ সন্থাই৷ জিলা ছাত্ৰ সন্থাৰ সভাপতি কৃষ্ণকান্ত দাসেও পৰিয়ালটোক পৰ্যাপ্ত আৰ্থিক সাহায্য প্ৰদান কৰাৰ দাবী উত্থাপন কৰিছে চৰকাৰৰ ওচৰত ৷
