ডিজিটেল সংবাদ, বঙাইগাঁওঃ এটা কাৰ্যালয়ৰ বিষয়াক পিন্ধোৱা হ'ল ফুলৰ মালা৷ কাৰ্যালয়টোৰ সকলো কৰ্মচাৰীক খুৱালে মিঠাই৷ ৰ'ব, ভাল কামৰ বাবে এওঁলোকক মালা পিন্ধোৱা বা মিঠাই খুওৱা হোৱা নাই৷ বিদ্যুৎ যোগানত ব্যৰ্থ হোৱা বাবেহে কাৰ্যালয়টোৰ বিষয়াক ফুলৰ মালা পিন্ধোৱা হৈছে।কৰ্মচাৰীক খুওৱা হ'ল মিঠাই৷
হয়, অভয়াপুৰী বিদ্যুৎ বিভাগৰ কাৰ্যালয়ত বুধবাৰে এই আজৱ প্ৰতিবাদ সাব্যস্ত কৰে বঙাইগাঁও জিলা কৃষক মুক্তি সংগ্ৰাম সমিতিয়ে৷ বঙাইগাঁও জিলা কৃষক মুক্তি সংগ্ৰাম সমিতিৰ সম্পাদক নন্দন দেৱনাথৰ নেতৃত্বত বুধবাৰে এই প্ৰতিবাদ সাব্যস্ত কৰা হয়।
উল্লেখ্য যে, দীৰ্ঘদিন ধৰি বৃহত্তৰ বইটামাৰী অঞ্চলত বিদ্যুৎ যোগানত ব্যৰ্থ হৈছে বিদ্যুৎ বিভাগ৷ আনহাতে এজাক বৰষুণ আহিলেই ঘন্টাৰ পিছত ঘন্টা বিদ্যুৎ কৰ্তন কৰে গাঁও অঞ্চলত৷
