-পংকজ পৰাণ
ৰাতি ৰাতি তোমাৰ চকুৰ টোপনিবোৰ
মোৰ দুচকুলৈ উৰি আহিছিল ৷ আৰু গানবোৰ
তোমাৰ ওঁঠৰপৰা বৈ আহি
মোৰ বুকুৰ মাজত এটা বাহ সাজিছিল
মোৰ চুলিৰ ভাঁজবোৰে
তোমাৰ আঙুলিৰ কথা মানিছিল ৷ কিন্তু ভৰি আৰু হাত দুখনে
তোমাক ভাগৰ লগাইছিল ৷
তোমাৰ ভাগৰবোৰে ৰাতিৰ আকাশত
মোৰ স'তে তৰা গণিছিল ৷
………………………..
এই মাজনিশাও মোৰ চকুত টোপনি নাই
অলপ টোপনি দিয়া
ৰাতিৰ আকাশত এতিয়া অকলেই চাওঁ তৰা
এই মহানগৰে মোক আঁতৰাই ৰাখে তোমাৰ পৰা
তুমি ভালে আছানে !