মণিপুৰত দুই ভাতৃক গ্ৰেপ্তাৰক লৈ আছাম ৰাইফলছৰ চকী ঘেৰাও কৰে চল্লিশ খন গাওঁৰ বাসিন্দাই…

ডিজিটেল সংবাদ, ৱাখা : ২৫ নং আছাম ৰাইফলছে মণিপুৰৰ টেঙনৌপাল জিলাৰ পৰা আটক কৰি নিয়া দুজন যুৱকক আৰক্ষী চকীত চমজায় নিদিয়াৰ প্ৰতিবাদত মংগলবাৰে প্ৰায় ৪০ খন গাঁৱৰ সহস্ৰাধিক ৰাইজে পি ছেজল গাঁৱ থকা আছাম ৰাইফলছৰ চকী ঘেৰাও কৰি উত্তপ্ত পৰিস্থিতি সৃষ্টি কৰে ।

প্ৰাপ্ত খবৰ অনুসৰি যোৱা ২৭ ডিচেম্বৰত টুইলাফি গাঁৱৰ অনখলুঙ (৩৭) আৰু খাওখগিন (৩৫) পৰা ২৫ নং আছাম ৰাইফলছৰ মেজৰ এম কে চৌহানৰ নেতৃত্বত যোৱা সেনাৰ দল এটাই দগৰাকী ভাতৃক গ্ৰেপ্তাৰ কৰি নিয়াৰ পিছত আজিলৈকে স্থানীয় আৰক্ষীক চমজায় নিদিয়াত টেঙনৌপাল জিলাৰ ৰাইজ ক্ষুব্ধ হৈ পৰে । যুৱক দুজনক সেনাৰ জিম্মাৰ পৰা আৰক্ষীক হস্তান্তৰ নকৰাৰ পৰিপ্ৰেক্ষিতত টুইলা আৰু ছঙপি গাঁৱৰ এছচিয়েচন আৰু কুকি ৱমেন ইউনিয়নৰ সহস্ৰাধিক ৰাইজে দিনৰ ১১ বজাত আছাম ৰাইফলছৰ কেম্পলৈ বিশাল প্ৰতিবাদী সমদল উলিয়ায় ।

প্ৰতিবাদীকাৰীয়ে ছেজল আছাম ৰাইফলছ কেম্পৰ সন্মুখ পোৱাৰ লগে লগে আৰক্ষীয়ে বেৰিকেড লগা বাধা প্ৰদান কৰে । লগে লগে প্ৰতিবাদকাৰী আৰু আৰক্ষীৰ মাজত তীব্ৰ তৰ্ক বিতৰ্ক আৰু পিচলৈ খণ্ড যুদ্ধত লিপ্ত হয়। প্ৰতিবাদী ৰাইজে আছাম ৰাইফলছক এনে কাৰ্যৰ তীব্ৰ প্ৰতিবাদ জনাই গ্ৰেপ্তাৰ কৰা দুই যুৱকক শীঘ্ৰে মণিপুৰ আৰক্ষীৰ হাতত গতাই দিবলৈ দাবী জনায় ।