দেশৰ বাবে মই আহিলো ওলাই…

মৃদুল কুমাৰ সন্দিকৈ

১ জানুৱাৰী, ২০২০। স্থান- অসম প্ৰশাসনিক পদাধিকাৰী মহাবিদ্যালয়। সন্মুখত অসমৰ বাতৰিকাকত, আলোচনীৰ জ্যেষ্ঠ সাংবাদিক আৰু সম্পাদকসকল। নতুন বছৰৰ প্ৰথম দিনটোত সাংবাদিক-সম্পাদকৰ পৰা দিহা-পৰামৰ্শ বিচাৰিছিল মুখ্যমন্ত্ৰীয়ে।

এই অনুষ্ঠানটোত উপস্থিত আছিল প্ৰান্তিকৰ সম্পাদক প্ৰদীপ বৰুৱা। মুখ্যমন্ত্ৰীক উদ্দেশ্যি তেওঁ কেইবাটাও গুৰুত্বপূৰ্ণ কথা কৈছিল। তাৰ ভিতৰত এটা উপদেশ আছিল- কা বিৰোধী আন্দোলনক দমন নীতিৰে মষিমূৰ নকৰিব।

প্ৰদীপ বৰুৱাই কৈছিল- পূৰ্বৰ চৰকাৰৰ দমন নীতিৰ বাবেই আলফাৰ জন্ম হৈছিল। আলফাৰ জন্মৰ বাবে তেওঁ দায়ী কৰিছিল সেই সময়ৰ বিতৰ্কিত আই পি এছ বিষয়া কে পি এছ গীলক। আনকি তেওঁ গীলক আলফাৰ পিতৃও আখ্যা দিছিল। মুখ্যমন্ত্ৰীক সতৰ্ক কৰি দি 'কা'ৰ বিৰুদ্ধে ৰাজ্যত গঢ় লৈ উঠা এই আন্দোলনক তেনে দমন নীতিৰে মষিমূৰ কৰাৰ চেষ্টা কৰিলে ইয়াৰ পৰিণতিও অনুৰূপ হ'ব বুলি সাৱধানবাণী শুনাইছিল।

৩ জানুৱাৰী, ২০২০। হঠাৎ এক খবৰে ৰাজ্যবাসীৰ দৃষ্টি আকৰ্ষণ কৰিছিল। সেই খবৰ আছিল কা বিৰোধী আন্দোলনলৈ ঘৰৰ পৰা ওলাই যোৱা এজন যুৱক সন্ধানহীন হৈছে। পেঙেৰী আঞ্চলিক ছাত্ৰ সন্থাৰ সহকাৰী সাধাৰণ সম্পাদক আছিল এই যুৱকজন।

৩ জানুৱাৰীত তিনিচুকীয়াত অনুষ্ঠিত হোৱা আছুৰ গণসমাবেশলৈ বুলি ঘৰৰ পৰা ওলাই গৈছিল বিজু গগৈ। পেঙেৰীৰ নগাপথাৰত ঘৰ বিজুৰ। তিনিচুকীয়াৰ গগৈগুৰিত থকা আই টি খেলপথাৰলৈ বুলি ওলাই গৈ ঘৰলৈ ঘূৰি নহাত পৰিয়ালৰ লোক সকল চিন্তিত হৈছিল।

ক'ত গ'ল বিজু গগৈ? তাৰ সন্ধান নাপালে পৰিয়ালে। তিনিচুকীয়া আৰক্ষীৰ কাষ চাপিছিল বিজুৰ পৰিয়াল। স্থানীয় আছুৰ নেতৃত্বয়ো বিজু গগৈ সন্ধানহীন হোৱাৰ সন্দৰ্ভত স্থানীয় আৰক্ষীক এজাহাৰ দাখিল কৰিছিল।

আৰক্ষীয়েও সেয়া এক সাধাৰণ নিৰুদ্দেশৰ ঘটনা বুলিহে হয়তো বিষয়টো গুৰুত্ব দিয়া নাছিল। তাৰপাছত লাহে লাহে পোহৰলৈ আহিছিল বিজু গগৈ সন্দৰ্ভত কিছু তথ্য। বিজু গগৈৰ সৈতে সু-সম্পৰ্ক থকা এজন যুৱকে হঠাৎ বিজুৱে তেওঁৰ হোৱাটছএপত দিয়া ষ্টেটাছ দেখি সেই খবৰ লগৰবোৰৰ লগতে পৰিয়ালক জনাইছিল।

সেই হোৱাটছএপ ষ্টেটাছত বিজুৱে লিখিছিল- 'জয় আই অসম। সংযুক্ত মুক্তি বাহিনীৰ জয়। মোক আৰু কোনো লগ নোপোৱা।' ১ জানুৱাৰীত প্ৰদীপ বৰুৱাই মুখ্যমন্ত্ৰীক দিয়া সাৱধানবাণীৰ যে প্ৰতিফলন এয়া।

এই খবৰ কিমান সঁচা? ইয়াৰ পূৰ্বেও 'কেব'ক লৈ হোৱা আন্দোলনৰ সময়ত অসমৰ পৰা কেইবাজনো শিক্ষিত যুৱকে চৰকাৰৰ এনে জাতি বিৰোধী নীতিৰ বিৰুদ্ধে প্ৰতিবাদ সাব্যস্ত কৰি বিদ্ৰোহী সংগঠন আলফা স্বাধীনত যোগ দিয়াৰ খবৰে বিশেষ চৰ্চা লাভ কৰিছিল।

তাৰপাছত পেঙেৰীৰ বিজু গগৈ সন্ধানহীন হৈ থকাৰ পাছত তেওঁৰ হোৱাটছএপৰ ষ্টেটাছে তেনে এক ইংগিতেই দিলে। এই সন্দৰ্ভত অসম আৰক্ষীৰ এক উচ্চস্তৰীয় সূত্ৰৰ পৰা জানিব বিচৰাত তেনে সম্ভাৱনা নুই নকৰিলে।

বিজু গগৈৰ পিতৃ ব্ৰজেন গগৈয়ে এই সন্দৰ্ভত ক'লে- 'ক'ত গৈছে সেই বিষয়ে আমি কোনো কথাই নাজানো। উচ্চতৰ মাধ্যমিকৰ লৈকে পঢ়িছিল সি। ভণীয়েকক পঢ়াবলৈ সি নিজেই পঢ়া এৰি দিছিল। এবছৰ মানৰ আগতে বাংগালুৰুৰ পৰা ঘৰলৈ উভতি আহি সামাজিক কাম-কাজত জড়িত হৈ পৰিছিল। আছুৰ পেঙেৰী আঞ্চলিকৰ সহকাৰী সম্পাদক আছিল । বাংগালুৰুত সি আইচক্ৰীম ফেক্টৰী এটাত কাম কৰিছিল।'

তীব্ৰ জাতীয়তাবোধ আৰু জাতিৰ প্ৰেমৰ গৰাকী বিজুৰ বয়স ২১ বছৰ। বিজুৱে ব্যৱহাৰ কৰা ম'বাইল নম্বৰটো আছিল ৭০৩৫৮৭৩৮১০। ৫.১ ফুট ওখ বিজুৱে বগা চাৰ্ট আৰু খাকী পেন্ট এটা পিন্ধি ৩ জানুৱাৰীৰ দিনা ঘৰৰ পৰা ওলাই গৈছিল।

বিজু সন্ধানহীন হোৱাৰ পাছৰে পৰা শোকত ভাগি পৰিছে পৰিয়ালটো। বিজুৰ পিতৃ ব্ৰজেন গগৈয়ে ক'লে- 'সি নাইকিয়া হোৱাৰ পাছৰে পৰা মাকৰ অৱস্থা কাহিল হৈছে। লেবেৰজান হৈ পৰিছে মাক। যোৱা দুই-তিনি দিন ভাত-পানী মুখলৈ নিয়াই নাই। আজিহে দুগৰা ভাত খুৱাও বুলি মই লৈছো। '

আৰক্ষীক এই সন্দৰ্ভত এজাহাৰ দাখিল কৰাত লগৰবোৰে কিবা জানে নেকি সেয়া সুধিছে। আমি কৈছো তেনে কোনো খবৰ আমাৰ হাতত নাই। লগতে পিতৃয়ে আহ্বান জনালে- সি য'তেই আছে সুশৰীৰে ঘৰলৈ ঘূৰি আহক।

নাগৰিকত্ব সংশোধনী আইনক লৈ হোৱা আন্দোলনৰ সমান্তৰালভাৱে এজন অসমীয়া যুৱক সন্ধানহীন হোৱা আৰু সেই যুৱকজনে আলফা স্বাধীনত যোগ দিয়া বুলি চলা চৰ্চা মুখ্যমন্ত্ৰী সৰ্বানন্দ সোণোৱালে সহজভাৱে ল'লে নহ'ব।

আজি এজন বিজু গগৈ, সেই কন্টকময় সংগ্ৰামী পথেদি বাট লৈছে। কাইলৈ সেই সংখ্যা বাঢ়িলে তাৰ উত্তৰ আৰু ভৱিষ্যতৰ পৰিৱেশ-পৰিস্থিতি সন্দৰ্ভত সময়ে নিশ্চয় মুখ্যমন্ত্ৰীকে জগৰীয়া কৰিব। যি সময়ত তেনে সংঘাতময় পথ এৰি আলোচনাৰ জৰিয়তে বিদ্ৰোহী সংগঠন সমূহৰ সৈতে সমস্যা সমাধানৰ প্ৰচেষ্টা অব্যাহত আছে, সেই সময়ত এনে এক পৰিৱেশ সৃষ্টি কৰাৰ বাবে কোন জগৰীয়া সেয়াও ৰাজ্য চৰকাৰে বা দিল্লী-দিছপুৰে অনুভৱ কৰিব লাগিব।

আৱেগ আৰু জাতীয় জীৱনৰ প্ৰতি থকা দায়িত্ববোধৰ বাবে, চৰকাৰৰ দমন নীতিৰ বিৰুদ্ধে অসমীয়া যুৱকে মুল সুতিৰ পৰা পুনৰ কিয় উভতি যাব বিচাৰিছে সেই বিচাৰ-বিশ্লেষণো কৰাৰ সময় এয়া। নৱবৰ্ষৰ প্ৰথম দিনটোতে মুখ্যমন্ত্ৰীক সকীয়াই দিছিল প্ৰান্তিকৰ সম্পাদক প্ৰদীপ বৰুৱাই। দমন নীতিৰ বিপৰীতে অসমীয়া আৰু খিলঞ্জীয়াৰ দাবীক গুৰুত্ব দি দিল্লী-দিছপুৰৰ বহতীয়া নহ'বলৈ আহ্বান জনাই স্পষ্টকৈ কৈছিল- 'আমি স্বাধীনচেতিয়া। কাৰো বহতীয়া হৈ ভাল নাপাওঁ। আপুনি আমাৰ এতিয়াও নেতা, আমাৰ অহংকাৰ। আমাৰ সন্মান আপুনিয়েই জীয়াই ৰাখিব লাগিব। সেই কাৰণে আপুনি কাৰো বহতীয়া নহ'ব।'

মুখ্যমন্ত্ৰীয়ে সেই পৰামৰ্শত হয়তো গুৰুত্ব দিয়া নাছিল। কিন্তু এই পৰামৰ্শ দিয়া দুদিনৰ পাছতেই আহিল সেই খবৰ। জোৰজবৰদস্তি এই আন্দোলনক প্ৰতিহত কৰিবলৈ চৰকাৰে, আৰক্ষীয়ে দমন চলালে তাৰ ফল ইয়াতকৈ যে ভয়াৱহ হ'ব সেই কথা এতিয়াও চৰকাৰে বুজক।

দিল্লী বা দিছপুৰে নাগৰিকত্ব সংশোধনী আইন নালাগে বুলি অসমত হোৱা প্ৰতিবাদক ভেঙুচালি কৰাৰ সলনি ইয়াৰ নায্যতাক উপলব্ধি কৰক। কোনোবা তৃতীয় বা চতুৰ্থ পক্ষৰ গাত ভেজা দি এই আন্দোলনক অস্তিত্বহীন কৰিব খুজিলেও ৰাজ্যৰ বিভিন্ন স্তৰৰ লোক জড়িত হৈ পৰা এই গণসংগ্ৰাম কিমান তীব্ৰতৰ হ'ব পাৰে, কি পৰ্যায়লৈকে ত্যাগ কৰিবলৈ প্ৰস্তুত আছে তাৰেই জানো প্ৰমাণ বিজু গগৈয়ে নিদিলে…।