নিশা দ্ৰুতবেগী ট্ৰিপাৰৰ খুণ্ডাত শিলচৰত থিতাতে নিহত চিত্ৰ সাংবাদিক মলিন শৰ্মা, সাংবাদিক সহ ক্ষুদ্ধ ৰাইজৰ পথ অৱৰোধ…

ডিজিটেল সংবাদ, শিলচৰঃ দেওবাৰে নিশা শিলচৰত সংঘটিত এক পথ দুৰ্ঘটনাত থিতাতে নিহত হয় এজন সাংবাদিক ৷ নিহত হয় শিলচৰৰ পৰা সম্প্ৰচাৰিত কেৱল নিউজ চেনেল বিটিএনৰ চিত্ৰ সাংবাদিক মলিন শৰ্মা ৷ সাংবাদিক জনে কৰ্তব্য সম্পন্ন কৰি নিশা এঘাৰ বজাত তাৰাপুৰৰ নিজ ঘৰলৈ স্কটীৰে অহাৰ সময়তে এই মৰ্মান্তিক দুৰ্ঘটনাৰ কৱলত পৰে ৷

পিছফালৰ পৰা অহা দ্ৰুতবেগী এখন ট্ৰিপাৰে স্কুটী সহ সাংবাদিক জনক প্ৰচণ্ড খুণ্ডা মাৰি তেওঁৰ মূৰৰ ওপৰেৰে পাৰ হৈ যায় ৷ ফলত থিতাতে নিহত হয় 43 বছৰীয়া সাংবাদিক মলিন শৰ্মা ৷ ইফালে, দুৰ্ঘটনা সংঘটিত কৰি ঘাটক ট্ৰিপাৰখন পলায়ন কৰে ৷ এই ঘটনাৰ পিচতে উত্তেজিত স্হানীয় ৰাইজে পথ অৱৰোধ কৰে ৷ খবৰ পাই সংবাদ কৰ্মী সকলো উপস্হিত হয় ঘটনাস্হলীত ৷ নিশা শিলচৰ চহৰত চলাচল কৰা তীব্ৰবেগী ট্ৰিপাৰ সমুহৰ বিৰুদ্ধে সৰব হৈ পৰে অৱৰোধ কাৰী সকল ৷ ঘটনাস্হলীত উপস্হিত হয় আৰক্ষী সহ নিৰাপত্তা বাহিনী ৷

নিশা আঢ়ৈ বজাত উপস্হিত হয় দণ্ডাধীশ ধ্ৰুৱজ্যোতি পাঠক ৷ ঘাটক ট্ৰিপাৰ আৰু ট্ৰিপাৰ চালকক গ্ৰেপ্তাৰ কৰা, নিহত সাংবাদিকৰ পৰিয়ালক দহ লাখ টকাৰ ক্ষতিপুৰণ, নিশাৰ বাৰ বজাৰ পিচত তাৰাপুৰৰ মাজেৰে ট্ৰিপাৰ সহ গভীৰ যান বাহনৰ চলাচলা বন্ধ ৰখা, ট্ৰিপাৰৰ চালক সকলৰ ড্ৰাইভিং লাইছেঞ্চ পৰীক্ষা কৰা আদি দাবী উত্থাপন কৰে অৱৰোধ কাৰী সকলে ৷

উপায়ুক্ত আৰু এছ পিৰ সৈতে আলোছনা কৰি দাবীবোৰ পুৰণৰ আশ্বাস দিয়াত নিশা তিনি বজাত পথ অৱৰোধ প্ৰত্যাহাৰ কৰা হয় ৷ তদুপৰি, আজি আবেলি পাচ বজাত উপায়ুক্তৰ কাৰ্যলয়ত সাংবাদিক সকলৰ সৈতে প্ৰশাসনে এখন বৈঠকৰো আহ্বান কৰা হয় ৷ মৃত্যুৰ সময়ত সাংবাদিক মলিন শৰ্মাই পত্নী আৰু বাৰ বছৰীয়া এজনী কন্যা সন্তানক এৰি যায় ৷