ডিজিটেল সংবাদ, চিলাপথাৰঃ কেনেদৰে চলিছে মন্ত্ৰী ৰণোজ পেগুৰ শিক্ষা বিভাগ । চৰকাৰে শিক্ষা সংস্কাৰৰ নামত প্ৰণয়ন কৰিছে ইখনৰ পিছত সিখন আইন । বলবৎ কৰিছে ইটোৰ পিছত সিটো নীতি । কিন্তু প্ৰকৃততে শিক্ষাৰ নামত ভিতৰুৱা অঞ্চলৰ বিদ্যালয়সমূহত চলি আছে কি ? এইখন চিচিবৰগাঁও ৰাজহ চক্ৰৰ অধীনৰ এক অতি ভিতৰুৱা অঞ্চলত অৱস্থিত মেচাকী টঙানী প্ৰাথমিক বিদ্যালয় ।
১৯৪৬ চনতেই স্থাপন কৰা এই বিদ্যালয়খনে অঞ্চলটোৰ শিক্ষাৰ ক্ষেত্ৰত মুখ্য ভূমিকা পালন কৰি আহিছে । বৰ্তমান বিদ্যালয়খনত চৰকাৰীভাৱে নিযুক্ত হৈ আছে চাৰিজনকৈ শিক্ষক । কিন্তু বিদ্যালয়লৈ নিয়মীয়াকৈ নাহে এজনো শিক্ষক । বিদ্যালয়খনৰ প্ৰধান শিক্ষক বিনোদ পেগু বিদ্যালয়লৈ কেতিয়াবাহে আহে । বাকী তিনিজন শিক্ষকৰো অৱস্থা একেই ।
বৰ্তমান বিদ্যালয়সমূহত চলি আছে ছমহীয়া পৰীক্ষা । শিক্ষা বিভাগে দিয়া ৰুটিন অনুসৰি পুৱতেই পৰীক্ষা দিবলৈ বিদ্যালয়ত উপস্হিত হ'লগৈ কণ কণ ছাত্ৰ ছাত্ৰী । কিন্তু এঘাৰ বজালৈকে বিদ্যালয়ত উপস্থিত নহ'ল এজনো শিক্ষক । বিদ্যালয়ত উপস্থিত হ'লগৈ খণ্ড সমল শিক্ষক, বিদ্যালয়ৰ পৰিদৰ্শক, শিশুৰ স্বাস্থ্য পৰীক্ষাৰ বাৱে যোৱা স্বাস্থ্য কর্মীৰ দল ।
কিন্তু উপস্থিত নহ'ল এজনো শিক্ষক । কণ কণ ছাত্ৰ ছাত্ৰীসকলৰ শিক্ষা জীৱনক লৈ এইদৰে হেতালি খেলা শিক্ষকৰ বিৰুদ্ধে তৎকালে বিহিত ব্যৱস্থা গ্ৰহণ কৰাৰ বাবে মুখ্যমন্ত্ৰী, শিক্ষামন্ত্ৰী তথা শিক্ষা বিভাগৰ ওচৰত সংবাদ মাধ্যমৰ জৰিয়তে দাবী জনালে ক্ষুব্ধ ৰাইজে ।
